ខេត្តកណ្តាល ៖ តាមសេចក្តីរាយការណ៍បឋមបានឱ្យដឹងថា មានករណីគ្រោះថ្នាក់ចរាចរណ៍មួយបានកើតឡើងរវាងរថយន្តធុនធំមួយគ្រឿងបុកជាមួយម៉ូតូមួយគ្រឿង បណ្តាលឱ្យស្ត្រីម្នាក់ស្លាប់នៅនឹងកន្លែងកើតហេតុ ។
ហេតុការណ៍ខាងលើបានបង្កឱ្យមានការភ្ញាក់ផ្អើលកាលពីវេលាម៉ោង៦ព្រឹកថ្ងៃទី២៨ ខែមករា ឆ្នាំ២០១៩ នៅចំណុចស្តុបព្រែកសំរោង A-9 ស្ថិតក្នុងភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល ។
ប្រភពព័ត៌មានពីសមត្ថកិច្ចបានឱ្យដឹងថា មុនពេលកើតហេតុ គេឃើញម៉ូតូមួយគ្រឿងម៉ាកគុបបើកបរដោយស្ត្រីម្នាក់កំពុងឈប់នៅចំណុចស្តុបខាងលើ ស្រាប់តែមានរថយន្តធុនធំមួយគ្រឿងម៉ាកហ៊ីយ៉ាន់ដាយ ដែលបើកបរដោយបុរសម្នាក់មិនស្គាល់អត្តសញ្ញាណ ហើយត្រូវគេសង្ស័យថារថយន្តនោះដាច់ហ្វ្រាំងបានបុកពីក្រោយម៉ូតូម៉ាកគុប បណ្តាលឲ្យស្ត្រីជាអ្នកបើកបរម៉ូតូស្លាប់ភ្លាមៗនៅនឹងកន្លែងកើតហេតុ ។ បន្ទាប់ពីកើតហេតុ អ្នកបើកបររថយន្តត្រូវបានសមត្ថកិច្ចចាប់ឃាត់ខ្លួន ។
ក្រោយកើតហេតុ រថយន្ត និងម៉ូតូ ត្រូវបានកម្លាំងជំនាញផ្នែកចរាចរណ៍នៃអធិការដ្ឋាននគរបាលក្រុងតាខ្មៅបញ្ជូនទៅរក្សាទុកដើម្បីដោះស្រាយតាមនីតិវិធី ។ ចំណែកសពជនរងគ្រោះត្រូវបានប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណី ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ