ខេត្តបន្ទាយមានជ័យ ៖ ជនសង្ស័យចំនួន៥នាក់ត្រូវបានកម្លាំងកងរាជអាវុធហត្ថឃាត់ខ្លួនពីបទជួញដូរគ្រឿងញៀនខេទឹកកកចំនួន៩កូនថង់ត្រូវបានបញ្ជូនទៅសាលាដំបូងខេត្តបន្ទាយមានជ័យចាត់ការតាមច្បាប់នៅថ្ងៃទី២៦ ខែមករា ឆ្នាំ២០១៩។
ជនសង្ស័យចំនួន៥នាក់ខាងលើរួមមាន ១-ឈ្មោះកន ឈុនលី ភេទប្រុស អាយុ៤៨ឆ្នាំ ២-ឈ្មោះ កន សេងយី ហៅយ៉េស ភេទប្រុស អាយុ២៧ឆ្នាំ ៣-ឈ្មោះ រី សុខរ៉ាន់ ភេទប្រុស អាយុ២៤ឆ្នាំ ៤-ឈ្មោះ ឆាន់ វ៉ាន់ដា ភេទប្រុស អាយុ២៥ឆ្នាំ និង៥-ឈ្មោះ ស៊ុម ថា ភេទប្រុស អាយុ២៨ឆ្នាំ ។ ជនសង្ស័យទាំង៥នាក់ស្នាក់នៅក្រុងសិរីសោភ័ណ។
លោកវរសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្តបន្ទាយមានជ័យបានប្រាប់ថា នៅពេលឃាត់ខ្លួនជនសង្ស័យទាំង៥នាក់ខាងលើ គឺកម្លាំងកងរាជអាវុធហត្ថក្រុងសិរីសោភ័ណបានសហការជាមួយកម្លាំងកងរាជអាវុធហត្ថខេត្តបានធ្វើការស្រាវជ្រាវ និងកំណត់មុខសញ្ញាបង្ក្រាបឃាត់ខ្លួនជនសង្ស័យបានចំនួន៥នាក់ និងវត្ថុតាងរួមមានគ្រឿងញៀនមេតំហ្វេតាមីន(ខេទឹកកក)ចំនួន៩ថង់តូចស្មើ២,៤៨ក្រាម មធ្យោបាយម៉ូតូ២គ្រឿង ដែលសមត្ថកិច្ចបានចុះប្រតិបត្តិការបង្ក្រាបកាលពីថ្ងៃទី២៣ ខែមករា ឆ្នាំ២០១៩ នៅចំណុចភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ។
លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបានបញ្ជាក់ថា រាល់បទល្មើសគ្រឿង
ញៀនបានដាក់វិធានការដល់កងកម្លាំងកងរាជអាវុធហត្ថខេត្ត ស្រុក ក្រុង ត្រូវមានវិធានការបង្ក្រាបលុបបំបាត់ ហើយជាក់ស្តែងបានបង្ក្រាបឃាត់ខ្លួនបានចំនួន៥នាក់ និងវត្ថុតាងគ្រឿងញៀនត្រូវបានកសាងសំណុំរឿងបញ្ជូនទៅសាលាដំបូងខេត្តចាត់ការតាមច្បាប់៕
ចែករំលែកព័តមាននេះ