រាជធានីភ្នំពេញ ៖ សពតារាចម្រៀងនាង ខេមរៈ ស្រីពៅ បានមកដល់ស្រុកខ្មែរនៅព្រលប់ថ្ងៃទី២៧ ខែមករា ឆ្នាំ២០១៩នេះហើយ ដើម្បីត្រៀមធ្វើបុណ្យតាមប្រពៃណី។
បើតាមបងតារាចម្រៀងរូបនេះលោក ខេមរៈ ភារុណ បានអះអាងថា សពប្អូនស្រីរបស់លោកបានមកដល់ប្រទេសវិញអំឡុងម៉ោង៧យប់ ក្រោយពីរៀបចំពិធីយកសពចេញពីប្រទេសឥណ្ឌា។ លោកបញ្ជាក់ថា សពប្អូនស្រីរបស់លោកបានយកមកដល់ប្រទេសថៃ មុនមកដល់ប្រទេសកម្ពុជានៅថ្ងៃដដែល ខណៈពេលដែលពិធីបុណ្យបានរៀបចំទុកជាស្រេចនៅគេហដ្ឋានលោក ខេមរៈ ភារុណ។
បើតាមលោក ភារុណ ពិធី៧ថ្ងៃសពប្អូនស្រីរបស់លោកនឹងធ្វើឡើងនៅថ្ងៃទី៣០ ខែមករា ឆ្នាំ២០១៩។ លោក ខេមរៈ ភារុណ អះអាងបន្ថែមថា អំឡុងពេលដឹកសពប្អូនស្រីមកតាមផ្លូវលោកពិតជាមានការអាឡោះអាល័យនឹងពាក្យសម្តីដែលប្អូនស្រីបាននិយាយ ជាពិសេសម្តាយរបស់លោកបានហៅកូនស្រីឲ្យទៅផ្ទះស្ទើរមិនដាច់។ យ៉ាងណាលោកបានថ្លែងដល់មិត្តភក្តិ និងប្រិយមិត្តគាំទ្រដែលបានផ្ញើសាររំលែកទុក្ខដល់ក្រុមគ្រួសាររបស់លោកនាពេលនេះ។
តារាចម្រៀង ខេមរៈ ស្រីពៅ ប្អូនតារាចម្រៀង ខេមរៈ សិរីមន្ត បានទទួលមរណភាពនៅមន្ទីរពេទ្យប្រទេសឥណ្ឌា នៅរសៀលថ្ងៃទី២៥ ខែមករា ឆ្នាំ២០១៩។ ក្រុមគ្រួសាររបស់លោក ខេមរៈ សិរីមន្ត បានបញ្ជាក់ថា តាមការពិត ខេមរៈ ស្រីពៅ មានជំងឺសួត និងក្រលៀនធ្ងន់ធ្ងរ ៤ឆ្នាំមកហើយ ប៉ុន្តែក្រុមគ្រួសារមិនសូវជាចាប់អារម្មណ៍ប៉ុន្មាននោះទេ ពោលគឺទើបតែរយៈពេល២ខែនេះ នាងមានអាការៈធ្ងន់ធ្ងរ ទើបក្រុមគ្រួសារសម្រេចបញ្ជូនទៅព្យាបាលនៅប្រទេសឥណ្ឌា ប៉ុន្តែជាអកុសលក្រុមគ្រូពេទ្យមិនអាចជួយសង្គ្រោះជីវិតរបស់នាងបានឡើយ។
ដំណឹងនេះ ពិតជាដំណឹងដ៏សោកសៅ និងក្ដុកក្ដួលជាទីបំផុតសម្រាប់ក្រុមគ្រួសារតារាចម្រៀង ខេមរៈ សិរីមន្ត ក៏ដូចជាអ្នកសិល្បៈទូទាំងប្រទេសដែលបានបាត់បង់អ្នកសិល្បៈម្នាក់ប្រកបដោយសមត្ថភាពខ្ពស់៕
ចែករំលែកព័តមាននេះ