ខេត្តសៀមរាប ៖ បុរសម្នាក់ជាកម្មកររបស់ក្រុមហ៊ុនមិត្តហ្វូនបានឡើងអូសខ្សែមិត្តហ្វូន ដើម្បីតបណ្តាញនៅលើដំបូលសង្ក័សីរបស់ហាងលក់ម៉ូតូមួយកន្លែង ត្រូវខ្សែភ្លើងឆក់ជាប់នៅលើដំបូល បណ្តាលឱ្យរបួសធ្ងន់ កុំតែបានប៉ូលិសស្រុកឃើញជួយទាន់ កុំអីមានគ្រោះថ្នាក់ដល់ជីវិតបាត់ទៅហើយ។
ហេតុការណ៍ខាងលើបានបានកើតឡើងកាលពីវេលាម៉ោង១២និង៣០នាទីថ្ងៃត្រង់ថ្ងៃទី២៦ ខែមករា ឆ្នាំ២០១៩ ស្ថិតនៅលើដំបូលហាងលក់ម៉ូតូមួយកន្លែង មុខផ្សារដំដែក នៅជាប់នឹងអធិការដ្ឋាននគរបាលស្រុកសូទ្រនិគម ក្នុងភូមិដំដែកផ្សារ ឃុំដំដែក ស្រុកសូទ្រនិគម ខេត្តសៀមរាប។
លោកវរសេនីយ៍ឯក ណុប សារ៉ាក់ អធិការស្រុកសូទ្រនិគមបានប្រាប់នៅវេលាម៉ោង១១និង៥៣នាទីថ្ងៃត្រង់ថ្ងៃទី២៧ ខែមករា ឆ្នាំ២០១៩ នេះថា នៅក្នុងមូលដ្ឋានរបស់លោក មានករណីកម្មកររបស់ក្រុមហ៊ុនមិត្តហ្វូនម្នាក់ត្រូវខ្សែភ្លើងឆក់នៅលើដំបូលហាងលក់ម៉ូតូមួយកន្លែង ដែលនៅជាប់នឹងអធិការដ្ឋាននគរបាលស្រុកសូទ្រនិគមតែម្តង ។
លោកបានបន្តថា ជនរងគ្រោះឈ្មោះ កែវ ធី ភេទប្រុស អាយុ៤៣ឆ្នាំ ជាកម្មកររបស់ក្រុមហ៊ុនមិត្តហ្វូន មានទីលំនៅបច្ចុប្បន្នភូមិខ្នា សង្កាត់ជ្រាវ ក្រុងសៀមរាប ។
មុនពេលកើតហេតុ ជនរងគ្រោះបានឡើងទៅអូសខ្សែភ្លើងមិត្តហ្វូនកាត់លើដំបូលហាងលក់ម៉ូតូមួយកន្លែងនៅជាប់នឹងអធិការដ្ឋាននគរបាលស្រុកសូទ្រនិគម បណ្តាឱ្យខ្សែភ្លើងឆក់ជនរងគ្រោះតែម្តង ។
លោកបានបញ្ជាក់ថា ជនរងគ្រោះដែលត្រូវខ្សែភ្លើងឆក់ បណ្ដាលឱ្យរងរបួសឆេះស្លោកជើង ខាងឆ្វេង និងដើមទ្រូង តែពុំបណ្តាលឱ្យមានគ្រោះថ្នាក់ដល់អាយុជីវិតនោះទេ ព្រោះពេលកើតហេតុ កម្លាំងនគរបាលបានបញ្ជូនជនរងគ្រោះយកទៅមន្ទីពេទ្យបង្អែកស្រុកសូទ្រនិគម ដើម្បីជួយសង្គ្រោះភ្លាមៗនោះផងដែរ។
បច្ចុប្បន្នជនរងគ្រោះបានធូរស្បើយខ្លះហើយ ប៉ុន្តែក្រុមគ្រូពេទ្យកំពុងឱ្យនៅសម្រាកក្នុងមន្ទីរពេទ្យ ដើម្បីតាមដានជាបន្តទៅទៀត៕
ចែករំលែកព័តមាននេះ