សហរដ្ឋអាមេរិក ៖ ក្រោមទម្ងន់នៃការគាបសង្កត់ខាងនយោបាយ ទីបំផុតប្រធានាធិបតីអាមេរិកលោកដូណាល់ត្រាំ សុខចិត្តបោះបង់ចោលបណ្ដោះអាសន្ន ការទាមទារហិរញ្ញវត្ថុសម្រាប់ការកសាងជញ្ជាំងព្រំដែនជាមួយម៉ិកស៊ិក ដើម្បីអាចចាកចេញ ពីSHUTDOWNដែលអូសបន្លាយពេលយូរបំផុត ជាប្រវត្តិសាស្ត្ររបស់សហរដ្ឋអាមេរិក។ ស្ថិតក្រោមការគាបសង្កត់ខ្លាំងបំផុតមួយ…
សហរដ្ឋអាមេរិក ៖ ក្រោមទម្ងន់នៃការគាបសង្កត់ខាងនយោបាយ ទីបំផុតប្រធានាធិបតីអាមេរិកលោកដូណាល់ត្រាំ សុខចិត្តបោះបង់ចោលបណ្ដោះអាសន្ន ការទាមទារហិរញ្ញវត្ថុសម្រាប់ការកសាងជញ្ជាំងព្រំដែនជាមួយម៉ិកស៊ិក ដើម្បីអាចចាកចេញ ពីSHUTDOWNដែលអូសបន្លាយពេលយូរបំផុត ជាប្រវត្តិសាស្ត្ររបស់សហរដ្ឋអាមេរិក។
ស្ថិតក្រោមការគាបសង្កត់ខ្លាំងបំផុតមួយ លោកត្រាំទីបំផុត យល់ព្រមតាមអ្វីដែលពួកអ្នកប្រជាធិបតេយ្យទាមទារ ចាប់តាំងពីច្រើនសប្ដាហ៍មកហើយ ដើម្បីចាកចេញពីភាពទ័លច្រកខាងថវិកា មុនពេលធ្វើការចរចាជាថ្មីលើបណ្ដាវិធានការត្រួតពិនិត្យអន្តោប្រវេសន៍លួចលាក់។
ក្រោយរយៈពេលជាង១ខែនៃការស្ទះថវិកា ប៉ះពាល់ដល់មន្ត្រីរដ្ឋការ៨០០.០០០នាក់ ដែលដាច់ប្រាក់ខែ លោកត្រាំនិយាយថាលោកមានមោទនភាព ប្រកាសពីកិច្ចព្រមព្រៀងមួយដើម្បីបញ្ចប់SHUTDOWNមួយផ្នែក ដោយកិច្ចព្រមព្រៀងនេះគ្រោងផ្ដល់ហិរញ្ញវត្ថុដល់បណ្ដាផ្នែកសហព័ន្ធរហូតដល់ថ្ងៃទី១៥កុម្ភៈ។ សភាទីបំផុតបានអនុម័តកាលពីថ្ងៃទី២៥មករា ជាឯកច្ឆ័ន្ទលើកិច្ចព្រមព្រៀងនោះ ដែលនៅសល់តែការចុះហត្ថលេខារបស់លោកត្រាំប៉ុណ្ណោះ។
លោកCHUCK SCHUMER ប្រមុខក្រុមព្រឹទ្ធសមាជិក នៃគណបក្សប្រជាធិបតេយ្យ និយាយថា នោះជាជោគជ័យមួយរបស់យើងរួចយើងសង្ឃឹមថា លោកត្រាំនឹងចងចាំចំពោះមេរៀននេះ។
ទោះបីយ៉ាងណាលោកត្រាំបានគំរាមពីការស្ទះថ្មីនៃថវិកា ចាប់ពីថ្ងៃទី១៥កុម្ភៈទៅ ប្រសិនបើកុងសង់ស៊ុសមួយ មិនត្រូវបានរកឃើញលើគម្រោងកសាងជញ្ជាំងព្រំដែនរបស់លោកទេនោះ។ លោករហូតដល់លើកពីការប្រកាសសភាពការណ៍បន្ទាន់មួយផង ដែលអាចឲ្យលោកប្រើអំណាចវិសាមញ្ញនានាដើម្បីវាងសភា។ លោកត្រាំថា យើងគ្មានជម្រើសណាក្រៅពីកសាងជញ្ជាំងដ៏រឹងមាំមួយឬរបាំងដែកមួយឡើយ។
យោងតាមពួកអ្នកវិភាគថាSHUTDOWNមួយរយៈពេលយូរនេះ ធ្វើឲ្យសេដ្ឋកិច្ចអាមេរិកខាតបង់យ៉ាងតិច៦ពាន់លានដុល្លារ រហូតមកដល់ថ្ងៃទី២៥មករា គឹលើសពីទឹកប្រាក់៥,៧ពាន់លានដុល្លារ ដែលសេតវិមានស្នើសុំសម្រាប់ការកសាងជញ្ជាំងព្រំដែនជាមួយម៉ិកស៊ិកផង៕
ចែករំលែកព័តមាននេះ