ខេត្តមណ្ឌលគិរី ៖ តាមសេចក្តីរាយការណ៍បឋមបានឲ្យដឹងថា រថយន្តធុនយក្សមួយគ្រឿងបានបង្កការកកស្ទះលើកំណាត់ផ្លូវជាតិលេខ៧៦ ត្រង់ចំនុចផ្លូវឡើងចំណោត ស្ពានអូរងើយស្ទើរពេញមួយថ្ងៃ ។ សេចក្តីរាយការណ៍បានបន្តថា តាំងពីម៉ោង៧ព្រឹកថ្ងៃទី២៧ មករា…
ខេត្តមណ្ឌលគិរី ៖ តាមសេចក្តីរាយការណ៍បឋមបានឲ្យដឹងថា រថយន្តធុនយក្សមួយគ្រឿងបានបង្កការកកស្ទះលើកំណាត់ផ្លូវជាតិលេខ៧៦ ត្រង់ចំនុចផ្លូវឡើងចំណោត ស្ពានអូរងើយស្ទើរពេញមួយថ្ងៃ ។
សេចក្តីរាយការណ៍បានបន្តថា តាំងពីម៉ោង៧ព្រឹកថ្ងៃទី២៧ មករា ២០១៩ រថយន្តអ្នកដំណើររាប់សិបគ្រឿងត្រូវបានខកខានការធ្វើដំណើរនៅចំនុចភូមិអណ្តូងក្រឡឹង ឃុំសែនមនោរម្យ ស្រុកអូររាំង ព្រោះតែមានរថយន្តធុនយក្សមួយគ្រឿង សង្ស័យដឹកដំឡូងមី លើសចំណុះឡើងចំណោតមិនរួចរអិលថយក្រោយ រាំងជាប់កណ្តាលផ្លូវធ្វើឲ្យម្ចាស់យានយន្តដទៃក្រវីក្បាលហួសចិត្តគ្រប់ៗគ្នា ព្រោះតែមិនអាចទៅមុខរួច ។
បើតាមអ្នកបើកបររថយន្តខាងលើថា រថយន្តនេះបានដឹកដំឡូងមី ចេញពីទីរួមខេត្តរតនគិរី ឆ្ពោះទៅស្រុកកែវសីមា ដើម្បីឆ្លងដែនទៅវៀតណាម ។ ប្រភពដដែលបញ្ជាក់ថា ពេលរថយន្តមកដល់ចំណុចកើតហេតុ ស្រាប់តែម៉ាស៊ីនខូចកណ្ដាលផ្លូវតែម្ដង ហើយសំណាងល្អដែលរថយន្តនេះពុំបានធ្លាក់ទៅជ្រោះខាងក្រោម ។
គិតត្រឹមវេលាម៉ោង២និង៣០នាទីរសៀលថ្ងៃដដែល សមត្ថកិច្ចបានឲ្យដឹងថា ការកាត់ផ្តាច់ចរាចរណ៍នៅចំនុចខាងលើ មិនទាន់ដំណើរការឡើងវិញឡើយព្រោះម្ចាស់រថយន្តកំពុងសាងដំឡូងដាក់ឡានផ្សេង ។ ទោះជាយ៉ាងណាករណីខាងលើនេះ មិនបានធ្វើឲ្យមនុស្សណាម្នាក់របួស ឬស្លាប់ទេ ។
មហាជនបានលើកឡើងថា ការដឹកជញ្ជូនលើសទម្ងន់នៅតាមបណ្តោយផ្លូវជាតិលេខ៧៦ បានកើតមានជាប្រចាំថ្ងៃ បណ្តាលឲ្យផ្លូវជាតិមួយខ្សែនេះរងការខូចខាតរាប់សិបកន្លែងខាតបង់ដល់ថវិកាជាតិ ដែលត្រូវចំណាយលើការជុសជុលឡើងវិញគ្មានលោះពេល ៕
ចែករំលែកព័តមាននេះ