រាជធានីភ្នំពេញ ៖ លោកនីរិទ្ឋ អែនឌ្រូ ជាពិធីករ និងតារាសម្តែងម្នាក់បានងាកទៅច្រៀងភ្លេងការវិញ ។លោកទើបតែចាប់យកអាជីពសិល្បៈថ្មីនេះ តែលោកសប្បាយចិត្តដ្បិតទទួលបានដល់ទៅជិត១០០រោងឯណោះ ។ លោកនីរិទ្ឋ…
រាជធានីភ្នំពេញ ៖ លោកនីរិទ្ឋ អែនឌ្រូ ជាពិធីករ និងតារាសម្តែងម្នាក់បានងាកទៅច្រៀងភ្លេងការវិញ ។លោកទើបតែចាប់យកអាជីពសិល្បៈថ្មីនេះ តែលោកសប្បាយចិត្តដ្បិតទទួលបានដល់ទៅជិត១០០រោងឯណោះ ។ លោកនីរិទ្ឋ អែនឌ្រូ ដោយខ្លួនមានទឹកដមសំឡេងល្អក៏ហាត់រៀនច្រៀងចម្រៀងប្រពៃណីពីលោកគ្រូសាស្ត្រាចារ្យ ល្បីៗមួយចំនួនរយៈពេល២ទៅ៣ខែ ។ ម្យ៉ាងដោយសារតែលោកយល់ថាមានតារាចម្រៀងសម័យទំនើបច្រើនទើបលោកចាប់អាជីពចម្រៀងប្រពៃណីវិញ ។
លោកនីរិទ្ឋ អែនឌ្រូ ចាប់យកអាជីពចម្រៀងប្រពៃណីបានកាក់កបសមតាមបំណង ដោយបានឱកាសច្រៀងតាមពិធីមង្គលការក្នុងកម្មវិធីពេលព្រឹកយ៉ាងមមាញឹក ។ វាជាជោគជ័យខ្លាំងស្ទើរតែមិននឹកស្មានថាលោកអាចធ្វើបាន។ លោកនីរិទ្ឋ អែនឌ្រូ កាលពីពេល ថ្មីៗកន្លងមកឲ្យដឹងថាលោកទើបតែចូលច្រៀងកាត់សក់តាមបណ្តារោងការនានាមួយរយៈនេះ ពោលគឺនៅចុងឆ្នាំ២០១៨ដើមឆ្នាំ២០១៩ ។ ចេះច្រៀងដោយលោកបានចូលរៀនច្រៀងវគ្គ ខ្លីៗពីសាលាវិចិត្រសិល្បៈ ពិសេសពីលោកគ្រូយ៉ាន់ បូរិន និងលោកគ្រូសំអាត ទាំងប្រពៃណីនិងមហោរីជាមួយគ្នាតែម្តង ។ រៀនផងអនុវត្តតាមរោងការផង ទើបលោកបានរលូនទៅមុខបែបនេះ ។អែនឌ្រូ ក៏ចេះច្រៀងបទសម័យដែរ តែគិតថាមិនចាំបាច់ពេកនោះទេ ។
លោកនីរិទ្ឋ អែនឌ្រូ និយាយថា«អ្វីដែលសប្បាយចិត្តខ្ញុំអាចចាប់អាជីពថ្មីច្រៀងតាមរោងការបានរលូន ហើយមិនត្រឹមតែប៉ុណ្ណឹងទេអាចលេងកំប្លែងពេលដល់ម៉ោងកាត់សក់កូនប្រុសកូនស្រីបានច្រើនរោងដែរ ។
ការចាប់អាជីពចម្រៀងសម័យមិនសូវប៉ុន្មានទេ តែអ្វីដែលខ្ញុំពេញចិត្ត គឺចម្រៀងបុរាណខ្លាំងជាង ទើបបំបែកសមត្ថភាពឲ្យច្រើន ហើយក៏មករៀនជាមួយគ្រូជំនាញទើបអាចជួយយើងបានដោយសារពួកគាត់ច្បាសលាស់» ។ ប្រសិនបើម្ចាស់ដើមការត្រូវការអ្នកកំប្លែងអាជីពច្រៀងកាត់សក់ លោកនីរិទ្ឋ អែនឌ្រូ មានឲ្យរើសដែរឲ្យតែពេញចិត្ត ។
មិត្តភក្តិជាច្រើនភ្ញាក់ផ្អើលពេលឃើញនីរិទ្ឋ អែនឌ្រូ ច្រៀងភ្លេងការ មិនតែប៉ុណ្ណោះពួកគេសរសើរទឹកដមសំឡេងរបស់លោក ។ ទោះជាយ៉ាងណាក្តីលោកនឹងព្យាយាមហាត់រៀនច្រៀងឲ្យកាន់តែល្អឡើង ។ លោក នីរទ្ធ អែនឌ្រូ និយាយថាប្រសិនបើអ្នកចម្រៀងវ័យក្មេងមានសំឡេងល្អអាចងាកទៅច្រៀងបែបបុរាណក៏មានទីផ្សារដែរ ៕
ចែករំលែកព័តមាននេះ