រាជធានីភ្នំពេញ៖ វាមិនទាន់ប្រាកដប្រជា តែមានការលេចឮថាតារាចម្រៀងលោកខេម នឹងចាកចេញពីផលិតកម្មថោន ។ ពេលវេលាមិនទាន់មកដល់មានតែរង់ចាំមើល តើពិត ឬមិនពិត ?
អ្នកផលិតកម្មវិធីទូរទស្សន៍ម្នាក់ នាពេលថ្មីៗកន្លងមកបានលើកឡើងថា តារាចម្រៀងខេម ដែលឈរជើងមិនតិចជាង១០ឆ្នាំនៅផលិតកម្មថោននោះគ្រោងចាកចេញពីផលិតកម្មមួយនេះហើយ ។ ការចាកចេញព្រោះតែតារាចម្រៀងរូបនេះមិនសប្បាយចិត្តនឹងការមិនយកចិត្តទុកដាក់លើការផលិតបទចម្រៀងរបស់លោកដើម្បីបំពេញចិត្តអ្នកគាំទ្រ ។
ទន្ទឹមនឹងការទម្លាយរឿងនេះក៏ស្របពេលដែលតារាចម្រៀងលោកខេមបង្ហោះសារខ្លីមួយនៅលើហ្វេសប៊ុកផ្ទាល់របស់លោកថា«ពេលខ្ញុំនៅ អ្នកមិនថែរក្សា តែបើខ្ញុំសម្រេចថាចាកចេញហើយមិនបាច់បញ្ជូនអ្នកណាមកនិយាយនឹងខ្ញុំទេ ។ បាយមួយគ្រាប់ខ្ញុំញាំមួយជីវិត តែបើបាយមួយចានឲ្យខ្ញុំហើយមើលងាយខ្ញុំវិញ បាយមួយគ្រាប់ក៏អាចធ្វើឲ្យខ្ញុំឆ្អែតដែរ អស់ចិត្ត ដល់ម៉ោងហើយ»។
បើទោះបីជាតារាចម្រៀងលោកខេម មិនបានបញ្ជាក់ច្បាស់អំពីការសម្តៅទៅលើផលិតកម្ម ប៉ុន្តែប្រភពដដែលនោះអះអាងថា «គឺខេម ឆ្អែតចិត្តនឹងផលិតកម្មដែលមិនបានសម្រួលនិងបញ្ចេញបទចម្រៀងមួយចំនួន ពិសេសមិនចង់បញ្ចេញការសម្តែងក្នុងបទចម្រៀងថ្មីរបស់លោកជាដើម »។ ទោះជាយ៉ាងណាក្តីមិនទាន់មានការអះអាងទេថាតើតារាចម្រៀងរូបនេះនឹងងាកទៅផលិតកម្មណាមួយថ្មីនៅឡើយ ។
នៅមិនទាន់អាចស្វែងរកការបញ្ជាក់បន្ថែមពីផលិតកម្មថោន និងតារាចម្រៀងខេម បាននៅឡើយ ។ ប៉ុន្តែប្រភពដដែលនោះបញ្ជាក់ថា ដំណឹងនៃគម្រោងចាកចោលផលិតកម្មថោនដែលផុតកិច្ចសន្យាជាង៦ឆ្នាំមកហើយនោះ បានលេចលឺដល់ផលិតកម្ម ធំៗមួយចំនួនដែលចង់បានតារាចម្រៀងរូបនេះ ។ ទោះជាយ៉ាងណាក្តីប្រសិនបើតារាចម្រៀងរូបនេះសម្រេចចិត្តចាកចេញពីផលិតកម្មថោនមែន ផលិតកម្មមួយនេះនឹងបាត់បង់តារាចម្រៀងល្បីឈ្មោះមួយរូបមិនខុសពីផលិតកម្មសាន់ដេបាត់បង់តារាចម្រៀងខេមរៈ សិរីមន្ត ទេ ។
ទោះជាយ៉ាងណាក្តីប៉ុន្មានថ្ងៃមុននេះផលិតកម្មថោន បានចេញបទចម្រៀងមួយបទរបស់តារាចម្រៀងលោកខេម មានចំណងជើងថា «តាកែវដួងចិត្ត» ហើយមានការ Comment សរសើរថាពីរោះ ដោយបទនេះនិពន្ធ Melody និងទំនុកច្រៀងដោយ ប៉ែន សំណព្វ និងនិពន្ធភ្លេងថ្មីដោយដាភ្លេង ។
បច្ចុប្បន្នលោកខេម បានចេញទៅសម្តែងនៅសហរដ្ឋអាមេរិក និងបន្តទៅប្រទេសបារាំង រយៈពេលជាង៣ខែទៀត ។ នេះជាលើកដំបូងហើយដែលខេម បានចាកចេញពីផ្ទះយូរបំផុត ដោយកន្លងមកលោកធ្លាប់តែចេញទៅសម្តែងនៅក្រៅប្រទេសត្រឹមតែ១ខែប៉ុណ្ណោះ ៕
ចែករំលែកព័តមាននេះ