រាជធានីភ្នំពេញ ៖ បុរសម្នាក់បើករថយន្តស៊េរីទំនើបមួយគ្រឿងបានបុកជាមួយម៉ូតូមួយគ្រឿងម៉ាកសង់កូរ៉េ រួចដេញបុកម៉ូតូបណ្តាលឲ្យដួល ថែមទាំងដកកាំភ្លើងដេញបាញ់អស់ចំនួន៤គ្រាប់ធ្វើឲ្យអ្នកបើកបរម៉ូតូភ័យរត់ទាំងព្រលឹងចុងសក់ និងបង្កការភ្ញាក់ផ្អើលដល់ប្រជាពលរដ្ឋទាំងយប់។
ហេតុការណ៍នេះកើតឡើងកាលពីវេលាម៉ោង១១និង២០នាទីយប់ថ្ងៃទី២៦ ខែមករា ឆ្នាំ២០១៩ ស្ថិតតាមបណ្ដោយផ្លូវ៥៩៨ ចំណុចដីឡូត៍លីហួលក់រថយន្ត ក្នុងសង្កាត់ទួលសង្កែ២ ខណ្ឌឫស្សីកែវ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុ គេបុរសម្នាក់បើករថយន្តស៊េរីទំនើបមួយគ្រឿងម៉ាកឡិចស៊ីស៤៥០ ពណ៌ស ពាក់ស្លាកលេខ ភ្នំពេញ ២AT-៩៤៦៦ ធ្វើដំណើរតាមផ្លូវលេខ៥៩៨ ក្នុងទិសដៅពីត្បូងទៅជើង លុះមកដល់ចំណុចកើតហេតុខាងលើបានបុកជាមួយម៉ូតូមួយគ្រឿងម៉ាកសង់កូរ៉េ ពណ៌ក្រហម ពាក់ស្លាកលេខ ក៤៥៨៤.ស្វ រ.១ បើកបរដោយបុរសម្នាក់ បណ្ដាលឱ្យភាគីខាងរថយន្តរងការខូចខាតផ្នែកខាងមុខ ។
ភ្លាមៗនោះខាងអ្នកបើកបររថយន្តបានបើកដេញបុកម៉ូតូ បណ្ដាលឲ្យដួល រួចហើយអ្នកបើកបររថយន្តបានបើកទ្វារចុះពីលើរថយន្តដកកាំភ្លើងដេញបាញ់ប្រហារទៅអ្នកបើកបរម៉ូតូចំនួន៤គ្រាប់ ធ្វើឱ្យអ្នកបើកបរម៉ូតូភិតភ័យព្រលឹងចុងសក់ក៏រត់គេចខ្លួនបាត់ស្រមោល។
ក្រោយកើតហេតុសមត្ថកិច្ចមូលដ្ឋានបានចុះមកដល់កន្លែងកើតហេតុភ្លាមៗ ហើយក៏មិនបានឃាត់ម្ចាស់រថយន្តសួរកដើមហេតុនៃការផ្ទុះអាវុធនោះទេ បណ្ដែតបណ្ដោយឲ្យអ្នកបើកបររថយន្តដែលបានផ្ទុះអាវុធជាច្រើនគ្រាប់ឡើងបើករថយន្តត្រឡប់ក្រោយគេចខ្លួនបាត់ស្រមោល៕
ចែករំលែកព័តមាននេះ