ខេត្តតាកែវ ៖ ប្រជាពលរដ្ឋប្រមាណជាង៤០០គ្រួសារ នៅឃុំព្រែផ្គាំ នៅស្រុកអង្គរបូរី ខេត្តតាកែវ បានផ្ទុះការតវាទាំងព្រឹក នៅសាលាឃុំព្រៃផ្គាំ ឲ្យអាជ្ញាធរជួយរកដោះស្រាយដោយប្រជាពលរដ្ឋទាំងនោះបានចោទប្រកាន់លោកប្រធានសហគមន៍ផ្គត់ផ្គង់ទឹកសម្រាប់ធ្វើស្រែប្រាំងថា បានកេងចំណេញពួកគាត់តាមរបៀបជាន់កស្លាប់ទាំងរស់…
ខេត្តតាកែវ ៖ ប្រជាពលរដ្ឋប្រមាណជាង៤០០គ្រួសារ នៅឃុំព្រែផ្គាំ នៅស្រុកអង្គរបូរី ខេត្តតាកែវ បានផ្ទុះការតវាទាំងព្រឹក នៅសាលាឃុំព្រៃផ្គាំ ឲ្យអាជ្ញាធរជួយរកដោះស្រាយដោយប្រជាពលរដ្ឋទាំងនោះបានចោទប្រកាន់លោកប្រធានសហគមន៍ផ្គត់ផ្គង់ទឹកសម្រាប់ធ្វើស្រែប្រាំងថា បានកេងចំណេញពួកគាត់តាមរបៀបជាន់កស្លាប់ទាំងរស់ ។
ក្រុមប្រជាពលរដ្ឋមួយឃុំនៅស្រុកអង្គរបូរី ខេត្តតាកែវ នៅព្រឹកថ្ងៃទី២៦ ខែមករា ឆ្នាំ២០១៩នេះ បាននាំគ្នាមកប្រមូលផ្តុំ នៅខាងមុខសាលាឃុំទាំងព្រឹក ដើម្បីស្នើសុំឲ្យអាជ្ញាធរជួយដោះស្រាយដល់ពួកគាត់ ខណៈដែលប្រធានសហគមន៍ផ្គត់ផ្គង់ទឹកសម្រាប់ស្រោចស្របស្រែប្រាំងពួកគាត់ប្រែក្រឡាសសម្តីក្នុងការយកថ្លៃសេវាផ្គត់ផ្គង់ទឹកខុសពីសន្យាដែលធ្លាប់ធ្វើជាហេតុធ្វើឲ្យពួកគាត់ជួបប្រទះនូវការខាត់បង់យ៉ាងធ្ងន់ធ្ងរ ។
តាមការឲ្យដឹងពីក្រុមប្រជាពលរដ្ឋទាំងនោះបាននិយាយថា តាមកិច្ចសន្យាដំណាក់កាលធ្វើស្រែលើទី១ពួកគាត់ត្រូវបង់ថ្លៃសេវាផ្គត់ផ្គង់ទឹក (បូមទឹកចូលដាក់ស្រែ) ដោយគិតជាស្រូវចំនួន៣៥០គីឡូក្រាម ក្នុងមួយហិកតា លុះដល់ដំណាក់កាលធ្វើស្រែលើកទី២ពួកគាត់ត្រូវបង់លុយតែ១៧ម៉ឺនរៀលវិញ ។ កិច្ចសន្យានេះត្រូវបានធ្វើជាច្រើនឆ្នាំមកហើយលុះមកដល់ឆ្នាំនេះបែរជាលោកប្រធានសហគមន៍ឈ្មោះ ឈុន សារិន អនុវត្តការយកថ្លៃសេវាផ្គត់ផ្គង់ទឹកទាំងពីរលើកគិតជាស្រូវ៣៥០គីឡូក្រាម ក្នុង១ហិកតាខុសពីសន្យាទៅវិញដែលនាំឲ្យពួកគាត់ត្រូវចំណាយបន្ថែមពី៧ទៅ៨ម៉ឺនរៀលទៀតក្នុង១ហិកតា ។
លោក មិន ម៉ៅ មេឃុំព្រៃផ្គាំបានប្រាប់អ្នកយកព័ត៌មានយើងឲ្យដឹងថា លោកមិនហ៊ានអាកាត់នោះទេ ចំពោះបញ្ហាដែលកំពុងតែកើតមាននេះព្រោះវាជាសិទ្ធរបស់លោកប្រធានសហគមន៍ដែលគាត់បានដេញថ្លៃសម្រាប់ការផ្គត់ផ្គង់ទឹកធ្វើស្រែនេះ ហើយលោក និងហៅលោក ឈុន សារិន ប្រធានសហគមន៍មកដោះស្រាយគ្នា នៅព្រឹកថ្ងៃទី២៧ ខែមករា ឆ្នាំ២០១៩ ដើម្បីរកដំណោះស្រាយគ្នាជាមួយ និងប្រជាពលរដ្ឋ ។
ក្រុមប្រជាពលរដ្ឋទាំងនោះបានធ្វើការសំណូមពរដល់អាជ្ញាធរពាក់ព័ន្ធមានលោក ឌឹម គឹមសាន អភិបាលស្រុកអង្គរបូរី ពិសេសលោក អ៊ូច ភា អភិបាលនៃគណៈអភិបាលខេត្តតាកែវ ជួយរកដំណោះស្រាយឲ្យពួកគាត់ផងកុំឲ្យម្ចាស់ស្ថានីយ៍ផ្គត់ផ្គងទឹកនេះធ្វើអ្វីខុសពីកិច្ចសន្យា ហើយកាតវ៉ានេះដែរ មិនត្រូវបានលោកមេឃុំលោកចៅហ្វាយស្រុកជួយដោះស្រាយអោយឡើយទើបនៅថ្ងៃនេះបានលើកគ្នាមកដល់សាលាឃុំធ្វើការតវ៉ាតែម្តង។
គួរំលឹកដែរថា ប្រធានសហគមន៍ផ្គត់ផ្គង់ទឹកសម្រាប់ធ្វើស្រែប្រាំងនេះបានទទួលសិទ្ធដោយការដេញថ្លៃសម្រាប់លក់ទឹកឲ្យពលរដ្ឋធ្វើស្រែជាង១ពាន់ហិកតា និងបានស្តាប្រឡាយយកទឹកសម្រាប់ផ្គត់ផ្គង់ ក្នុងនោះប្រជាពលរដ្ឋ៦ភូមិ នៅឃុំព្រៃផ្គាំទាំងមូល កំពុងតែប្រើប្រាស់នូវសេវាផ្គត់ផ្គង់ទឹកពីស្ថានីយដែលគ្រប់គ្រងដោយលោក ឈុន សារិន ។ នៅព្រឹកថ្ងៃទី២៧ ខែមករា នេះប្រជាពលរដ្ឋនឹងលោកឈុន សារិន ម្ចាស់ផ្គត់ផ្គង់ទឹកក៏បានយល់ឯកភាពគ្នារាល់ចំនុចដែលប្រជាពលរដ្ឋបានលើកឡើងនេះហើយដោយភាគីលោកឈុន សារិន យល់ព្រមបន្តអនុវត្តទៅតាមកិច្ចសន្យាដែលបានធ្វើរួចហើយនោះ ៕
ចែករំលែកព័តមាននេះ