ខេត្តស្វាយរៀង ៖ បើតាមសេចក្តីរាយការណ៍បានឱ្យដឹងថា ក្រុមចោរចាប់ផ្តើមធ្វើសកម្មភាពលួចរថយន្តហើយ ក្នុងមួយយប់លួចបាន២គ្រឿងយកទៅបាត់ដោយសុវត្ថិភាព។
ដោយករណីទី១ គឺកើតឡើងម៉ោងប្រមាណ២យប់រំលងអធ្រាត្រ ថ្ងៃទី២៦ ខែមករា ឆ្នាំ២០១៩ ស្ថិតនៅភូមិស្រះវង្ស សង្កាត់ស្វាយរៀង ក្រុងស្វាយរៀង។ សមត្ថកិច្ចបានឲ្យដឹងថា ជនរងគ្រោះឈ្មោះ មាស សាមី ភេទប្រុស អាយុ៣៦ឆ្នាំ មុខរបរជាគ្រូបង្រៀននៅវិទ្យាល័យស្វាយរៀង មានទីលំនៅក្នុងភូមិ-ឃុំកន្លែងកើត ហើយខណៈជនរងគ្រោះមានជំងឺទៅសម្រាកព្យាបាលនៅមន្ទីរពេទ្យ ដោយទុកឪពុក និងម្តាយចាស់ជរានៅចាំផ្ទះ។
ប្រភពដដែលបន្តទៀតថា ជនរងគ្រោះបានទុករថយន្តនៅខាងមុខផ្ទះ ហើយរាល់ដងគឺចាក់សោ លុះយប់កើតហេតុភ្លេចមិនដឹងថា បានចាក់សោឬអត់ទេ ទើបចោរលួចទៅបានយ៉ាងងាយស្រួលបែបនេះ រហូតដល់ព្រឹកឡើងម៉ោង៥ព្រឹក ឪពុកក្រោកឡើងពីដំណេកទើបដឹងថា បាត់ឡានក៏ឆោឡោប្តឹងសមត្ថកិច្ចតែម្តង។ រថយន្តដែលបាត់នោះម៉ាកបាឡែនពណ៌ទឹកប្រាក់ ពាក់ស្លាកលេខភ្នំពេញ២U-៨០៥០ ស៊េរី២០០២។
ចំណែកករណីទី២ គឺនៅក្រុងបាវិតក៏មានចោរលួចរថយន្ត១គ្រឿងម៉ាកហាយឡែនឌ័រពណ៌ទឹកមាស ពាក់ស្លាកលេខភ្នំពេញ ២W-០១០៦ ស្ថិតនៅភូមិព្រៃផ្តៅ សង្កាត់ច្រកម្ទេស ក្រុងបាវិត ដោយបាត់ម៉ោងប្រមាណ២ទៀបភ្លឺដែរ។
ចែករំលែកព័តមាននេះ