រាជធានីភ្នំពេញ ៖ លោក គឹម កុល វ័យ៥៥ឆ្នាំ ជាជនមានពិការភាពមួយរូប ពិតជាមានការរារែកចិត្តក្នុងការទៅទទួលសេវាសុខាភិបាលនៅតាមមន្ទីរពេទ្យ ដោយសារតែគ្រួសាររបស់លោកមានជីវភាពក្រីក្រខ្លាំង មិនមានលទ្ធភាពក្នុងការបង់កម្រៃសេវាដល់មន្ទីរពេទ្យឡើយកាលពីប៉ុន្មានឆ្នាំកន្លងទៅ ។
ប៉ុន្តែនៅពេលនេះ លោក គឹម កុល លែងមានការរារែកទៀតហើយ ។ លោកមានប្រសាសន៍បញ្ជាក់យ៉ាងដូច្នេះថា «នៅពេលនេះ ខ្ញុំមានប័ណ្ណមួយសន្លឹកនេះ គឺយើងមិនមានការរារែកចិត្តក្នុងការទៅកាន់មន្ទីរពេទ្យទៀតទេ នៅពេលដែលយើងត្រូវការទៅពិនិត្យសុខភាពនៅមន្ទីរពេទ្យ »។
សូមបញ្ជាក់ថា លោក គឹម កុល គឺជាប្រជាពលរដ្ឋខ្មែរមួយរូបដែលទទួលបានប័ណ្ណសមធម៌ ឬហៅថា “Equity Card” បន្ទាប់ពីរូបលោកត្រូវបានកំណត់អត្តសញ្ញាណតាមរយៈកម្មវិធីកំណត់អត្តសញ្ញាណកម្មគ្រួសារក្រីក្រ (IDPoor)។
សុខភាពទន់ខ្សោយ បានធ្វើឱ្យគ្រួសារកម្ពុជាជាច្រើន ងាយរងគ្រោះក្នុងការធ្លាក់ចូលក្នុងភាពក្រីក្រវិញ ។ លើសពីនេះទៀត នៅពេលដែលប្រជាជនមានសុខភាពទន់ខ្សោយ អាចធ្វើឲ្យកំណើនសេដ្ឋកិច្ច អាចនឹងធ្លាក់ចុះវិញ ដោយកាត់បន្ថយការចូលរួមកម្លាំងពលកម្ម និង ផលិតភាពរបស់កម្មករក្នុងវិស័យផ្សេងៗ ។
រដ្ឋាភិបាលអូស្ត្រាលី កំពុងជួយប្រជាជនកម្ពុជាឲ្យទទួលបានការថែទាំសុខភាពប្រកបដោយគុណភាព។ ការវិនិយោគផ្នែកសុខាភិបាលប្រកបដោយនិរន្តរភាពពីរាជរដ្ឋាភិបាលកម្ពុជា និងដៃគូអភិវឌ្ឍន៍នានា រួមទាំងប្រទេសអូស្ត្រាលីបាននាំទៅរកការរីកចម្រើនគួរឲ្យកត់សម្គាល់នូវលទ្ធផលសំខាន់ៗក្នុងវិស័យសុខាភិបាលក្នុងប៉ុន្មានឆ្នាំចុងក្រោយនេះ ។ ឧទាហរណ៍ ស្ត្រីប្រមាណ៨៩ភាគរយ បានសម្រាលកូននៅតាមមូលដ្ឋានសុខាភិបាលក្នុងឆ្នាំ ២០១៧ បើប្រៀបធៀបទៅនឹង៥៤ភាគរយនៅឆ្នាំ២០១០ ។
ពាក់ព័ន្ធនឹងបញ្ហាសុខភាពប្រជាជនកម្ពុជា ប្រទេសអូស្ត្រាលីបាននឹងកំពុងជួយដល់ប្រជាជនកម្ពុជាដែលក្រីក្រ ឲ្យទទួលបានការថែទាំសុខភាពដោយឥតគិតថ្លៃអស់រយៈពេលជាង១០ឆ្នាំ តាមរយៈកម្មវិធីមូលនិធិសមធម៌សុខាភិបាលរបស់កម្ពុជា (HEF) តាមរយៈត្រាស់ហ្វាន់ពហុភាគី (Multi Donor Trust Fund) ដែលគ្រប់គ្រងដោយធនាគារពិភពលោក និងកម្មវិធីអត្តសញ្ញាណកម្មគ្រួសារក្រីក្រ (IDPoor) ទទួលបានការគាំទ្រពីរដ្ឋាភិបាលអូស្ត្រាលី និងរដ្ឋាភិបាលអាល្លឺម៉ង់។ កម្មវិធីអត្តសញ្ញាណកម្មគ្រួសារក្រីក្រ(IDPoor)នេះអនុវត្តដោយក្រសួងផែនការ ។
ឯកអគ្គរាជទូតអូស្ត្រាលីប្រចាំនៅកម្ពុជា លោកជំទាវAngela Corcoran មានប្រសាសន៍ ទទួលស្គាល់ថា ប្រព័ន្ធសុខាភិបាលដ៏ល្អមួយប្រកបដោយសមធម៌ គឺជារឿងចាំបាច់សម្រាប់ប្រជាជនកម្ពុជា ។
លោកជំទាវ Angela Corcoran មានប្រសាសន៍ថា «ប្រព័ន្ធសុខាភិបាលកម្ពុជា ដែលមានភាពរឹងមាំ និងប្រកបដោយសមធម៌ជួយដល់ជីវភាពរស់នៅប្រចាំថ្ងៃរបស់ពលរដ្ឋកម្ពុជា។
ប្រព័ន្ធសុខាភិបាលនេះ ក៏ជួយដល់ប្រទេសអូស្ត្រាលី ប្រទេសកម្ពុជា និងប្រទេសជិតខាងក្នុងតំបន់ ដើម្បីឆ្លើយតបទៅនឹងការលេចឡើងនៃជំងឺ និងការគំរាមកំហែងដល់សន្តិសុខសុខភាពឆ្លងព្រំដែន ដូចជាភាពស៊ាំនឹងថ្នាំអង់ទីប៊ីយ៉ូទិកជាដើម »។
មូលនិធិសមធម៌សុខាភិបាល គឺជាកម្មវិធីមួយសម្រាប់គាំទ្រការចំណាយលើការថែទាំសុខភាពដល់គ្រួសារក្រីក្រ ដែលត្រូវបានផ្តល់ហិរញ្ញប្បទាន ដោយរាជរដ្ឋាភិបាលកម្ពុជា និងដៃគូអភិវឌ្ឍន៍នានា ដូចជារដ្ឋាភិបាលអូស្ត្រាលី រដ្ឋាភិបាលអាល្លឺម៉ង់ រដ្ឋាភិបាលកូរ៉េ និងធនាគារពិភពលោក។ គោលបំណង នៃមូលនិធិសមធម៌សុខាភិបាល គឺដើម្បីបង្កើន ការប្រើប្រាស់សេវាសុខាភិបាលសាធារណៈ ដោយប្រជាជនក្រីក្រ (តាមរយៈការលុបបំបាត់របាំងហិរញ្ញវត្ថុ) និងកាត់បន្ថយផលប៉ះពាល់ហិរញ្ញវត្ថុដោយសារការព្យាបាលជំងឺធ្ងន់ធ្ងរ ឬគ្រោះថ្នាក់លើគ្រួសារក្រីក្រ ។
អ្នកស្រី លី ណារ៉េត មន្ត្រីផ្នែកសុខាភិបាលរបស់ធនាគារពិភពលោកនៅកម្ពុជា (Senior Health Specialist of World Bank Cambodia Office) បានមានប្រសាសន៍ថា កម្មវិធីមូនិធិសមធម៌សុខាភិបាល ត្រូវបានពង្រីកវិសាលភាពជាជំហានៗ ដោយចាប់ផ្តើមក្នុងទ្រង់ទ្រាយតូច នៅក្នុងដើមទសវត្សរ៍ឆ្នាំ២០០០ ហើយក៏ក្លាយទៅជាយន្តការផ្តល់ហិរញ្ញប្បទានសុខុមាលភាពសង្គម និងគាំពារសុខភាពទូទាំងប្រទេស។ គម្រោងនេះគ្រប់គ្រងដោយរាជរដ្ឋាភិបាលកម្ពុជា ដោយផ្ដល់នូវការគ្របដណ្តប់សេវាសុខភាពយ៉ាងទូលំទូលាយ។ កម្មវិធីមូលនិធិសមធម៌សុខាភិបាល បានគ្របដណ្តប់ទូទាំងប្រទេស ដោយរួមមានមណ្ឌលសុខភាពសរុបចំនួនប្រមាណ១.១០០កន្លែង មន្ទីរពេទ្យបង្អែកស្រុកនិងខេត្តចំនួនប្រមាណ១០០ និងមន្ទីរពេទ្យជាតិមួយ គឺមន្ទីរពេទ្យមិត្តភាពខ្មែរ-សូវៀត នៅឆ្នាំ២០១៥ ។
នៅឆ្នាំ២០១៨ កម្មវិធីមូលនិធិសមធម៌សុខាភិបាលនេះ ត្រូវបានពង្រីកបន្ថែមទៅដល់មន្ទីរពេទ្យថ្នាក់ចំនួន៥ទៀត រួមមានមន្ទីរពេទ្យកាល់ម៉ែត មន្ទីរពេទ្យព្រះកុសុមៈ មន្ទីរពេទ្យកុមារជាតិ និងមជ្ឈមណ្ឌលជាតិគាំពារមាតានិងទារក និងមន្ទីរពេទ្យព្រះអង្គឌួង។ បច្ចុប្បន្ននេះ ប្រជាពលរដ្ឋក្រីក្រកម្ពុជាប្រមាណ៣លាននាក់ ទទួលបានអត្ថប្រយោជន៍ពីកម្មវិធីមូលនិធិសមធម៌សុខាភិបាល ។
អ្នកស្រី លី ណារ៉េត បន្តថា ប័ណ្ណសមធម៌នេះ ត្រូវបានធ្វើបច្ចុប្បន្នភាពរៀងរាល់៣ឆ្នាំម្តងដោយក្រសួងផែនការ ។ បន្ទាប់ពីទទួលបានទិន្នន័យពេញលេញពីគ្រួសារ ដែលត្រូវបានកំណត់ថាក្រីក្រ ពីក្រសួងផែនការហើយនោះ ក្រសួងសុខាភិបាលបានបញ្ចូលទិន្នន័យទៅក្នុងប្រព័ន្ធគ្រប់គ្រងចុះឈ្មោះ និងគ្រងគ្រងទិន្នន័យជំងឺរបស់មន្ទីរពេទ្យ ឬហៅថា (Patient Management Registration System -PMRS)។
គ្រួសារក្រីក្រដែលត្រូវបានកំណត់នៅក្នុងដំណើរការកំណត់អត្តសញ្ញាណកម្មគ្រួសារក្រីក្រ ត្រូវបានផ្តល់ «ប័ណ្ណសមធម៌» ដែលរួមមានចំនួនគ្រួសាររូបភាពសមាជិកគ្រួសារ អាសយដ្ឋាន និងឈ្មោះមេគ្រួសារ។ សមាជិកទាំងអស់នៅក្នុងគ្រួសារដែលមានប័ណ្ណសមធម៌ មានសិទ្ធិទទួលបានអត្ថប្រយោជន៍ពីកម្មវិធីមូលនិធិសមធម៌។ ប្រសិនបើសមាជិកគ្រួសារមិនមានវត្តមានក្នុងដំណើរការកំណត់អត្តសញ្ញាណកម្មគ្រួសារក្រីក្រ ក៏ពួកគេអាចត្រូវបានបញ្ចូលបន្ថែមនៅឯមន្ទីរពេទ្យ ឬមណ្ឌលសុខភាពសាធារណៈនៅពេលដាក់ស្នើឯកសារ ដោយមានការបញ្ជាក់ពីអាជ្ញាធរមូលដ្ឋានអំពីការបន្ថែមសមាជិកថ្មី ។
ប្រសិនបើគ្រួសារក្រីក្រ មិនត្រូវបានចុះបញ្ជីក្នុងអំឡុងពេលនៃដំណើរការកំណត់អត្តសញ្ញាណកម្មគ្រួសារក្រីក្រ ដោយសារហេតុផលណាមួយ ពួកគេអាចទៅសម្ភាសន៍ ដើម្បីកំណត់អត្តសញ្ញាណកម្មនៅតាមមន្ទីរពេទ្យរដ្ឋ (Post-ID poor) ពេលពួកគាត់ទៅទទួលការព្យាបាលនៅមន្ទីរពេទ្យ ។ ដំណើរការធ្វើ Post-ID poor រួមមានការសម្ភាសន៍ ការដាក់ពិន្ទុតាមតាមស្ថានភាពជាក់ស្តែង និងការពិនិត្យផ្ទៀងផ្ទាត់សហគមន៍បន្ត។ បន្ទាប់ពីការអនុវត្តតាមដំណើរការ Post-ID poor រួចរាល់សមាជិកគ្រួសាររបស់អ្នកជំងឺ មានសិទ្ធិទទួលបានអត្ថប្រយោជន៍ពីកម្មវិធីមូលនិធិសមធម៌សុខាភិបាលដូចគ្នា ។ «ប័ណ្ណអាទិភាព» ដែលធ្វើតាមរយៈ Post-ID poor មានសុពលភាពរហូតដល់ជុំបន្ទាប់នៃកម្មវិធីកំណត់អត្តសញ្ញាណកម្មគ្រួសារក្រីក្រ ។
កម្មវិធីមូលនិធិសមធម៌ គឺជាប្រព័ន្ធហិរញ្ញប្បទានសុខាភិបាល ដែលផ្តល់ការទូទាត់ថ្លៃសេវាដល់មន្ទីរពេទ្យ និងមណ្ឌលសុខភាពរដ្ឋ ជំនួសឲ្យអ្នកជំងឺក្រីក្រ។ កម្មវិធីនេះធ្វើឲ្យកាន់តែប្រសើរឡើងនូវការទទួលបានសេវាសុខភាពសម្រាប់ជនក្រីក្រ និងបានផ្តល់ប្រភពចំណូលដ៏ចម្បងមួយនៅក្នុងប្រព័ន្ធសុខាភិបាល ។ ការសិក្សាមួយចំនួនបានលើកឡើងថា កម្មវីធីមូលនិធិសមធម៌សុខាភិបាល បានផ្តល់លទ្ធភាពទទួលបានការថែទាំសុខភាពកាន់តែប្រសើរ និងបង្កើនការការពារផ្នែកហិរញ្ញវត្ថុ ជាពិសេសសម្រាប់ថ្លៃសេវាសុខាភិបាលដែលមានតម្លៃខ្ពស់ ។
មន្ត្រីស្ថានទូតអូស្ត្រាលីបញ្ជាក់ថា ការឧបត្ថម្ភកម្មវិធី ដែលមានប្រយោជន៍ដល់ប្រជាពលរដ្ឋខ្មែរសម្រាប់ជីវភាពប្រចាំថ្ងៃ ដូចជាករណីរបស់លោក គឹម កុល បញ្ជាក់ឲ្យឃើញថា ប្រទេសអូស្ត្រាលីជាដៃគូអភិវឌ្ឍន៍ដ៏យូរអង្វែង និងគួរឲ្យជឿទុកចិត្តសម្រាប់ប្រជាជនកម្ពុជា ៕
ចែករំលែកព័តមាននេះ