រាជធានីភ្នំពេញ ៖ សម្តេចក្រឡាហោម ស ខេង ឧបកនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានអះអាងថា ការប្រកាសវិលចូលស្រុករបស់លោក សម រង្ស៊ី អតីតប្រធានគណបក្សស ង្គ្រោះជាតិ គឺជាការទាល់ច្រកនយោបាយតែប៉ុណ្ណោះ ។
ការលើកឡើងរបស់សម្តេច ស ខេង ដែលជាមន្ត្រីជាន់ខ្ពស់គណបក្សប្រជាជនកម្ពុជាធ្វើឡើងបន្ទាប់ពីលោក សម រង្ស៊ី បានប្រកាសថា នឹងចូលស្រុកវិញ នៅក្នុងឆ្នាំ២០១៩នេះ ជាងនេះ ថ្នាក់ដឹកនាំអតីតបក្សប្រឆាំងបានសម្រេចឲ្យមេបក្សប្រឆាំងរូបនេះចូលស្រុក បន្ទាប់ពីបើកកិច្ចប្រជុំគណៈកម្មាធិការអចិន្ត្រៃយ៍ កាលពីពេលថ្មីៗកន្លងមកនេះ ។ ថ្លែងក្នុងពិធីផ្សព្វផ្សាយលទ្ធផលនៃសន្និបាតគណៈកម្មាធិការកណ្ដាលលើកទី៤១ អាណត្តិទី៥ របស់គណបក្សប្រជាជនកម្ពុជា ថ្ងៃទី២៦ ខែមករា ឆ្នាំ២០១៩ នៅខេត្តបាត់ដំបង សម្តេច ស ខេងបានលើកឡើងយ៉ាងដូច្នេះថា «អីចឹងរឿងចេញទៅក្រៅ ហើយមិនមកស្រុកនេះមិនមែនមានតែម្តងទេ ហើយក៏គ្មានអ្នកណាបណ្តេញគាត់ ។
ពីព្រោះថា កុំច្រឡំ ថា ដីកាស្វែងរកចាប់ខ្លួនជាការបណ្តេញ គឺសុខគ្នា ។ អាមួយគេបណ្តេញចេញ ឬនិរទេស រឿងផ្សេងឯដូការចាប់ខ្លូនមិនមែនរឿងបណ្តេញទេ» ។ សម្តេចក៏បានគូសបញ្ជាក់ថា ការវិលចូលស្រុករបស់លោក សម រង្ស៊ី ក៏គ្មានអ្នកណាហាមឃាត់នោះទេ ។ សម្តេចបញ្ជាក់ថា «ក្នុងច្បាប់ធម្មនុញ្ញចែងថា ខ្មែរមិនឲ្យនិរទេសខ្មែរទេ ។ ខ្ញុំមិនមែនអ្នកច្បាប់ទេ ខ្ញុំគ្រាន់តែជាអ្នកអនុវត្តច្បាប់ ហើយខ្ញុំក៏មើលច្បាប់ដែរត្រង់ណាយល់ក៏យល់ត្រង់ណាមិនយល់ក៏សួរនាំគ្នីគ្នាអ្នកច្បាប់ទៅ ។
អីញ្ចឹងគេថា រដ្ឋាភិបាលមិនអាចនិរទេសជនជាតិខ្មែរបានទេ អីញ្ចឹងមានន័យថា គ្មានអ្នករារាំងជនជាតិខ្មែរទេ» ។ ចំពោះផែនការវិលចូលស្រុករបស់លោក សម រង្ស៊ី អតីតមេបក្សប្រឆាំងត្រូវសម្តេចលើកឡើងយ៉ាងដូច្នេះថា គាត់មានផែនការវិលចូលស្រុកខ្មែរវិញ៥០% មក និង៥០ភាគអត់មក គឺជាល្បែងនយោបាយប្រថុយប្រថានតែប៉ុណ្ណោះ ។ សម្តេច ស ខេង ក៏បានគូសបញ្ជាក់យ៉ាងដូច្នេះថា « សម រង្ស៊ី មកជាការប្រថុយប្រថាន យើងគិតថា សព្វថ្ងៃនេះគណបក្សសង្គ្រោះជាតិអត់មានទេ ! ជាផ្លូវច្បាប់ សម រង្ស៊ី ទៅធ្វើប្រធានស្តីទីគណបក្សដែលអត់មាន យើងយល់យ៉ាងណា បើគណបក្សនឹងអត់មាន ហើយគ្មានចុះបញ្ជីនៅក្រសួងមហាផ្ទៃនោះទេ បើតុលាការលុបបាត់ហើយ» ។
សម្តេច ស ខេង ចំអកទៅកាន់លោក សម រង្ស៊ី ចំពោះការធ្វើជាប្រធានស្តីទីគណបក្សសង្គ្រោះជាតិ នៅក្រៅប្រទេសថា គ្មានអ្នកណាទទួលស្គាល់នោះទេ ព្រោះថា ផ្លូវច្បាប់គ្មាននោះទេ ។ សម្តេចសខេងថា « អត់បានចុះបញ្ជីនៅក្រសួងមហាផ្ទៃផង អ្នកណាទទួលស្គាល់ (បើចុះក៏ គ្មានចុះឲ្យ) លើសពីនេះខ្លូនគាត់ «សម រង្ស៊ី» ជាអ្នកមានពិរុទ្ធជនផងជាទណ្ឌិតផងជា ជន សង្ស័យ អីញ្ចឹងគាត់នឹងពាក់ព័ន្ធច្រើនយ៉ាង» ។
សម្តេចក៏បានដាក់សំណួរថា តើលោក សម រង្ស៊ី ចូលមកស្រុកខ្មែរវិញ តាមរយៈបៀបណា ហើយអ្នកខ្លះជូនមក និងអ្នកខ្លះទៅទទួល ? សម្តេចស ខេង ថា វាអត់មានដូចពីមុនទេ ព្រោះពី មុនលើកលែងទោសពីព្រះមហាក្សត្រឡាយព្រះហត្ថលើកលែងទោសអ្នកណាទៅទទួលប៉ុណ្ណោះក៏បានដែរ ។ ប៉ុន្តែលើកនេះ តើសម រង្ស៊ី មកតាមណា ? មកតាមព្រលានយន្ត ឬតាម ផ្លូវទឹក ឬតាមផ្លូវគោក ហើយអ្នកទៅទទួលមានហេតុផលអីទៅទទួល ។
សម្តេចស ខេង ក៏បានហៅការអំពាវនាវ និងការប្រកាសរបស់លោក សម រង្ស៊ី គឺធ្វើឲ្យស្រុកទេសមានចលនាអស្ថេរភាព និងអសន្តិសុខ ។ សម្តេចបានគូសបញ្ជាក់យ៉ាងដូច្នេះថា « សម រង្ស៊ី អស់ក្រឡាហើយ «ចប់» បើគាត់មិនសម្រេចចិត្តិអីញ្ចឹង គឺចប់ទាំងអន្តរជាតិ និងផ្ទៃក្នុងក៏ អស់» ។ សម្តេចស ខេង ថា ប្រសិនបើលោក សម រង្ស៊ី មិនធ្វើសកម្មភាពដូចអ្វីដែលខ្លួននិយាយទេនោះទេ អ្វីៗនឹងត្រូវបញ្ចប់អស់រួមការគាំទ្រពីអន្តរជាតិ និងអ្នកគាំទ្ររបស់ខ្លួនរួមទាំង បញ្ហាផ្ទៃក្នុងបក្សក៏លែងមានអ្នកជឿងទុកចិត្តលោកទៀតទេ ។
សម្តេចក៏បានលើកឡើងថា ការប្រកាសរបស់លោក សម រង្ស៊ី វិលចូលស្រុក គឺជាវិធីសាស្ត្រដដែលតែប៉ុណ្ណោះ ដើម្បីរក្សាកម្លាំងគាំទ្ររបស់ខ្លួននៅក្នុងប្រទេសថា សម រង្ស៊ី នៅតែជាមេដឹកនាំនៅមានឥទ្ធិពល ៕
ចែករំលែកព័តមាននេះ