រាជធានីភ្នំពេញ ៖ ការបង្ហាញខ្លួនរបស់អ្នកប្រដាល់ គួន ប៊ុនហ៊ីម លើកនេះ ពិតជាធ្វើឱ្យម្នាក់ៗមានការចាប់អារម្មណ៍មិនតិចនោះទេ ដោយសារតែដណ្ដើមបានតំណែងបានកៅអី៤នាក់។ ក្រោយជ័យជម្នះនេះ ធ្វើឱ្យគេកាន់តែមានក្ដីសង្ឃឹម បើទោះមិនទាន់ដឹងថា តើអាចក្លាយជាម្ចាស់ពានជើងឯក ឬមិនបាន។
ប្រដាល់កំពូលជើងឯក TV5 BOXING KNOCK OUT SERIES (K-Cement) កាលពីយប់មិញថ្ងៃសៅរ៍ ទី២៦ មករា ឆ្នាំ២០១៩ ស្ថិតនៅស្ថានីយទូរទស្សន៍ប៉ុស្តិ៍លេខ៥ ក្នុងភូមិព្រែកថ្លឹង សង្កាត់ព្រែកកំពិស រាជធានីភ្នំពេញនេះ រន្ថើនយ៉ាងខ្លាំងនៅលើសង្វៀន។
កីឡាករ គួន ប៊ុនហ៊ីម មកពីក្លិបពន្លឺសាមគ្គីខេត្តបាត់ដំបង ដែលមានប្រវត្តិប្រកួតបាន ៦៣ ឈ្នះ ៤២ស្មើ៦ ចាញ់១៦ គឺជាបេក្ខភាពឡលងប្រកួតជាមួយ កីឡាករយ៉ន ពិសី ដែលទើបតែឈ្មោះបោះសំឡេងនៅលើសង្វៀន។ គួន ប៊ុនហ៊ីម បានអះអាងថា លោកចូលរួមប្រកួតពានរង្វាន់នៅប៉ុស្តិ៍លេខ៥មួយនេះ ចំនួន២លើកហើយ ដោយក្នុងរដូលកាលទី២ លោកប្រឹងប្រែងយ៉ាងណាក៏បានត្រឹមតែជុំទី៣ គឺវគ្គ៨នាក់ហើយក៏ចាញ់ហាលអាវ។ អីុចឹងហើយ ទើបលោកសប្បាយចិត្តដែលអាចយកឈ្នះលើ យ៉ន ពិសី ហើយដណ្ដើមបានកៅអៅ៤នាក់ ដែលមិននឹកស្មាននេះ។
ងាកទៅកាន់ការប្រកួតនៅក្នុងថ្ងៃនោះ គេកត់សម្គាល់ថា ក្នុងទឹកទី១ មិនសូវឡើងកំដៅអ្វីទេ គឺប្រកួតបែបសាមញ្ញធ្វើឲ្យការប្រកួតមិនសូវកន្ត្រាក់។ លុះចូលដល់ទឹកទី២ ម្នាក់ៗរកវិធីរកគន្លឹះវាយចូលដាក់គ្នា ដោយធ្វើឱ្យការប្រកួតទាំងមូលមានការឈានឡើងគួរឱ្យសរសើរ។ ឆ្លងដល់ទឹកទី៣ ជាទឹកចុងក្រោយ បើទោះជាម្ខាងទៀតប្រឹងវាយសន្ធាប់ទៅវិញទៅមក ប៉ុន្តែកីឡាករ គួន ប៊ុនហ៊ីម មានប្រៀបនាំមុខចេញខ្លាំង ទើបធ្វើឱ្យគេក្លាយជាអ្នកឈ្នះ។
លោក សេង កដិកា អ្នករៀបចំកម្មវិធីបានអះអាង ការប្រកួតនៅក្នុងវគ្គនោះ កាន់តែរន្ថើនគួរឱ្យចាប់អារម្មណ៍ ដោយសារតែកីឡារទាំងពីរសុទ្ធតែចង់ទៅកាន់វគ្គ៤នាក់។ លោកកោតសរសើរចំពោះកីឡាករគ្រប់រូបដែលប្រឹងប្រកួតបានល្អ ជាពិសេសចំពោះអ្នកឈ្នះ ដោយលោកបានចាត់ទុកថា ទម្រាំបានឈ្នះ គឺប្រឈមនឹងការប្រឹងប្រែងខ្លាំងណាស់ ដោយលទ្ធផលដែលបានឈ្នះក៏វេទនាខ្លួនណាស់ដែរ។
យ៉ាងណាមិញលោកថា កីឡាករគួន ប៊ុនហ៊ីម ត្រូវប្រឹងឱ្យខ្លាំងបន្ថែមទៀត ទើបមានសង្ឃឹមកាន់ពាន ឬដណ្ដើមបានតំណែងមួយល្អដោយសារតែសមាសភាពអ្នកមានឈ្មោះប្រកួតទាំង៤នាក់ សុទ្ធតែមានការត្រៀមខ្លួនម៉ត់ចត់ ហើយជាជើងខ្លាំងមិនធម្មតា៕
ចែករំលែកព័តមាននេះ