រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានអះអាងថា ទោះបីជាសម្តេចខិតខំធ្វើឲ្យប្រទេសមានភាពរីកចម្រើនយ៉ាងណាក៏មានព័ត៌មាននិយាយអាក្រក់ និងកុហកពីកម្ពុជាដែរ ។ សម្តេចតេជោបានលើកឡើងលើបណ្តាញសង្គមមុននេះបន្តិចយ៉ាងដូច្នេះថា«ដូចយើងបានឃើញស្រាប់នឹងភ្នែក…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានអះអាងថា ទោះបីជាសម្តេចខិតខំធ្វើឲ្យប្រទេសមានភាពរីកចម្រើនយ៉ាងណាក៏មានព័ត៌មាននិយាយអាក្រក់ និងកុហកពីកម្ពុជាដែរ ។
សម្តេចតេជោបានលើកឡើងលើបណ្តាញសង្គមមុននេះបន្តិចយ៉ាងដូច្នេះថា«ដូចយើងបានឃើញស្រាប់នឹងភ្នែក គឺកម្ពុជាយើងកំពុងតែបោះជំហានទៅរកភាពរីកចម្រើនកាន់តែល្អប្រសើរពីមួយថ្ងៃទៅមួយថ្ងៃ ។ ទេសចរបរទេសក៏កាន់តែកើនឡើងមកទស្សនាកម្ពុជា រីឯអ្នកវិនិយោគទុនវិញ ក៏កាន់តែមានជំនឿជឿជាក់លើស្ថិរភាពនយោបាយ និងសង្គមដែលកំពុងអំណោយផលយ៉ាងល្អប្រសើរ ដល់ការបណ្តាក់ទុនតូចធំនៅក្នុងប្រទេសយើង ។
សម្តេចបញ្ជាក់ថា «ទោះបីយើងខិតខំប្រឹងប្រែងយ៉ាងណាក្តីក៏គង់តែនៅមានព័ត៌មានភូតកុហកអំពីប្រទេសយើង ។ ប៉ុន្តែជាក់ស្តែងនៅពេលដែលទេសចរ និងវិនិយោគគិនបានមកដល់ គឺពួកគេមានការកោតសរសើរកម្ពុជាអំពីការរីកចម្រើនយ៉ាងឆាប់រហ័ស ក្រោយពីបានរួចផុតពីរបបកាប់សម្លាប់ប្រល័យពូជសាសន៍ប៉ុលពត (១៩៧៥ -១៩៧៩)» ។
ជាមួយគ្នានោះដែរសម្តេចក៏បានលើកឡើងថា ការរីកចម្រើនរបស់ប្រទេសជាតិសព្វថ្ងៃ គឺមិនអាចកាត់ផ្តាច់ពីការចូលរួមរបស់បងប្អូនប្រជាពលរដ្ឋ និងក្មួយៗយុវជនបានឡើយ ។ អរគុណបងប្អូនជនរួមជាតិ និងក្មួយៗយុវជនដែលបានចូលរួមបន្សាបព័ត៌មានមិនពិតទាំងនោះ និងបានចូលរួមថែរក្សាការពារសន្តិភាព ដើម្បីយើងទាំងអស់គ្នាកាន់តែមានឱកាសអភិវឌ្ឍប្រទេសជាតិអោយកាន់តែរុងរឿង៕
ចែករំលែកព័តមាននេះ