រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប បានប្រកាសស្តីពីប្រតិទិននៃការបោះឆ្នោតជ្រើសរើសក្រុមប្រឹក្សារាជធានីក្រុមប្រឹក្សាខេត្តក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៣ ឆ្នាំ២០១៩ ។
ការប្រកាសនេះខណៈដែលរាជរដ្ឋាភិបាលបានកំណត់យកថ្ងៃទី២៦ ខែឧសភា ឆ្នាំ២០១៩ ជាថ្ងៃបោះឆ្នោតជ្រើសរើសក្រុមប្រឹក្សារាជធានីក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៣ ឆ្នាំ២០១៩ ។ គ.ជ.បបានកំណត់ថ្ងៃទីថ្ងៃទី១ ខែកុម្ភៈ ដល់ថ្ងៃទី១៥ ខែឧសភា ឆ្នាំ២០១៩ ការចុះឈ្មោះអ្នកសង្កេតការណ៍ជាតិ និងថ្ងៃ១កុម្ភៈ ដល់ថ្ងៃទី២២ ខែឧសភា សម្រាប់ការចុះឈ្មោះអ្នកសង្កេតការណ៍អន្តរជាតិ ។
ចំណែកភ្នាក់ងារគណបក្សនយោបាយសម្រាប់សង្កេតមើលនៅតាមការិយាល័យបោះឆ្នោតវិញ គ.ជ.ប បានកំណត់យកថ្ងៃទី២៦ ខែមេសា ដល់ថ្ងៃទី២ ខែឧសភា ឆ្នាំ២០១៩ ។ ការបិទផ្សាយបញ្ជីឈ្មោះទីតាំងការិយាល័យបោះឆ្នោតមុនពេលចុះឈ្មោះបោះឆ្នោតនៅថ្ងៃទី២៥ ខែកុម្ភៈ ឆ្នាំ២០១៩ ។ គ.ជ.បបានឲ្យដឹងទៀតថា គ.ជ.ប នឹងប្រកាសសុពលភាពលើបញ្ជីបោះឆ្នោត ថ្ងៃទី១១ ខែឧសភា ឆ្នាំ២០១៩ ។
ការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះនៅគណៈកម្មការរាជធានីខេត្តរៀបចំការបោះឆ្នោត (គធ.ខប) ថ្ងៃទី៧ -១១ ខែមីនា ឆ្នាំ២០១៩ ។ គ.ជ.បក៏បានឲ្យដឹងសម្រាប់ការឃោសនាបោះឆ្នោតជ្រើសរើសក្រុមប្រឹក្សារាជធានីខេត្ត ក្រុង ស្រុក ខណ្ឌ មានរយៈពេលមួយសប្តាហ៍តែប៉ុណ្ណោះ គឺចាប់ពីថ្ងៃទី១៧ – ២៤ ខែឧសភា ឆ្នាំ២០១៩ ។
ចំពោះការបោះឆ្នោតការរាប់សន្លឹកឆ្នោត និងការបិទផ្សាយលទ្ធផលបណ្តោះអាសន្ននៅការល័យបោះឆ្នោតនៅថ្ងៃទី២៦ ខែឧសភា ឆ្នាំ២០១៩ ។ ការប្តឹងរវ៉ាពីការសម្រេចរបស់ប្រធានការិយាល័យបោះឆ្នោតរាប់សន្លឹកឆ្នោត ឬពីលទ្ធផលបណ្តោះអាសន្ននៃការបោះឆ្នោតនៅការិតាល័យបោះឆ្នោតទៅគធ. ខប មានរយៈពេលយ៉ាងយូរ២ថ្ងៃ បន្ទាប់ពីថ្ងៃសម្រេច ឬថ្ងៃបិទផ្សាយ ។ សម្រាប់ការដោះស្រាយបណ្តឹងដោយ គ.ជ.ប វិញ មានរយៈពេលយ៉ាងយូរ៣ថ្ងៃ បន្ទាប់ពីថ្ងៃទទួលពាក្យបណ្តឹង គឺថ្ងៃទី៧ ខែមិថុនា ឆ្នាំ២០១៩ ថ្ងៃចុងក្រោយ ។
ការបោះឆ្នោតសាជាថ្មីក្នុងរយៈពេល៨ថ្ងៃក្រោយការសម្រេចរបស់ គ.ជ.ប (ប្រសិនបើមាន) ។ គ.ជ.ប ក៏បានឲ្យដឹងចំពោះការប្រកាសលទ្ធផលផ្លូវការនៃការបោះឆ្នោត(ករណីគ្មានការបោះឆ្នោតសាជាថ្មី) នៅថ្ងៃទី៨ ខែមិថុនា ឆ្នាំ២០១៩ ៕
ចែករំលែកព័តមាននេះ