រាជធានីភ្នំពេញ ៖ គណៈកម្មការត្រួតពិនិត្យក្រុមហ៊ុននាំពលករទៅបំរើការងារនៅបរទេសដឹកនាំដោយលោកចេង មុនីរ៉ា អភិបាលរងខណ្ឌសែនសុខ និងមានការចូលរួមដោយលោកតាន់ គឹមវិន ចៅសង្កាត់ទឹកថ្លាផងនោះ កាលពីថ្ងៃទី១៧ មីនា ឆ្នាំ២០១១ កន្លងមកនេះ បានចុះត្រួតពិនិត្យទីតាំងក្រុមហ៊ុននាំពលករទៅបំរើការងារនៅបរទេសចំនួន៣កន្លែង នៅសង្កាត់ទឹកថ្លា។ ការចុះត្រួតពិនិត្យនេះ គឺអាជ្ញាធរមានការប្រយ័ត្នប្រយែងជាមុន បន្ទាប់ពីកើតបញ្ហានៅក្រុមហ៊ុន ធី ភី ដែលធ្វើឱ្យអាជ្ញាធរឈឺក្បាល ព្រោះតែក្រុមហ៊ុននេះបង្កបញ្ហាមិនឈប់ឈរដូចជាមានពលការិនីម្នាក់ធ្លាក់បាក់ជើងព្រោះតែលួចរត់ចុះតាមទុយោ ហើយបន្ទាប់មកពលការិនីម្នាក់ទៀតស្លាប់ ។
ក្រុមហ៊ុននាំពលករទាំងបីដែលគណៈកម្មការត្រួតពិនិត្យនោះមានក្រុមហ៊ុនមជ្ឈមណ្ឌល KH សាខាក្រុមហ៊ុននាំពលករទៅបំរើការងារនៅបរទេស CECH ដែលមានអាសយដ្ឋានផ្ទះលេខ ៣២៧ ផ្លូវរថភ្លើង ក្រុមទី៥ ភូមិចុងថ្នល់ខាងលិច, សាលាមជ្ឈមណ្ឌល C D M មែនផៅវឺ ផ្ទះលេខ១៨BM ផ្លូវK4A ក្រុមទី៧ ភូមិទឹកថ្លា និងក្រុមហ៊ុនយ៉ប អេស៊ា ខេមបូឌា លីមីធីត មជ្ឈមណ្ឌលទី៤អាន់នីវីតាបេសមេនផៅវឺ ជាមជ្ឈមណ្ឌលជ្រើសរើសពលករនាំទៅធ្វើការនៅប្រទេសថៃ ស្ថិតនៅអគារ A ផ្លូវ3K4 ភូមិទ្រុងមាន់ ។
មន្ត្រីក្នុងគណៈកម្មការត្រួតពិនិត្យនេះបានឱ្យដឹងថា យើងពិនិត្យលើ៤ចំណុច ១-បរិវេណទីតាំងក្រុមហ៊ុន (មជ្ឈមណ្ឌល) មានភាពទូលាយសម្រាប់ធ្វើជាមជ្ឈមណ្ឌលហាត់ការត្រឹមត្រូវ ឬអត់។ ២-បរិស្ថាននៃការស្នាក់នៅ និងបន្ទប់សម្រាប់ហាត់ការមានភាពសមស្របដែរឬទេ? ៣-ទីតាំងសម្រាប់ចម្អិនអាហារ មានអនាម័យសមស្រប ឬអត់ និង៤-ទីតាំងសម្រាប់បរិភោគអាហារសមស្របដែរទេ។ នៅចំពោះមុខអភិបាលរងខណ្ឌ ពលករជាច្រើននាក់បាននិយាយស្រដៀងគ្នាថា ការមកទីនេះគ្មានការបង្ខិតបង្ខំទេ គឺរង់ចាំក្រុមហ៊ុនបញ្ជូនទៅបរទេស។ ចំណែកឯតំណាងក្រុមហ៊ុនវិញបានអះអាងថា ពលការិនីចូលមកហាត់ការរយៈពេល៣ខែ ក្រុមហ៊ុននឹងបញ្ជូនទៅបម្រើការងារនៅបរទេស ។
គួរបញ្ជាក់ផងដែរថា ក្រោយពីបានពិនិត្យជាក់ស្ដែងមក គណៈកម្មការបានពិនិត្យឃើញចំណុចខ្វះខាតមួយចំនួនរបស់ក្រុមហ៊ុន (មជ្ឈមណ្ឌល KH) ហើយបានធ្វើការណែនាំដូចជាក្រុមហ៊ុនត្រូវសុំបើកសាខារបស់ខ្លួនពីក្រសួងពាណិជ្ជកម្ម និងស្នើសុំលិខិតអនុញ្ញាតស្តីពីទីតាំងពីសាលារាជធានីឱ្យបានក្នុងរយៈពេលពីរសប្ដាហ៍ជាកំហិត, ប្រធានមជ្ឈមណ្ឌលត្រូវរាយការណ៍ជាប្រចាំអំពីចំនួនពលការិនីដែលកំពុងហាត់ការ ពលការិនីចូលមកថ្មី និងពលការិនីត្រៀមចេញទៅបម្រើការងារនៅបរទេស។ ប្រធានមជ្ឈមណ្ឌលត្រូវរាយការណ៍ជាប្រចាំអំពីបាតុភាពផ្សេងៗដែលកើតមាន និងប្រធានមជ្ឈមណ្ឌលត្រូវរៀបចំឱ្យមានការពិនិត្យសុខភាពដល់ពលការិនីយ៉ាងហោចណាស់ប្រាំមួយសប្ដាហ៍ម្ដង ហើយត្រូវយកចិត្ដទុកដាក់បន្ថែមក្នុងការសំអាតបរិស្ថានស្នាក់នៅ ហូបចុកឱ្យបានគ្រប់គ្រាន់ដល់ពលការិនី។ ក្នុងករណីប្រធានមជ្ឈមណ្ឌលមិនអនុវត្ដតាមខ្លឹមសារណែនាំខាងលើទេ រដ្ឋបាលខណ្ឌនឹងចាត់វិធានការរដ្ឋបាលជាបណ្ដោះអាសន្ន ហើយរាយការណ៍ជូនសាលារាជធានីដើម្បីស្នើសុំវិធានការ ៕
ចែករំលែកព័តមាននេះ