រាជធានីភ្នំពេញ ៖ ប្រជាជនអូស្ត្រាលីរស់នៅក្នុងប្រទេសអូស្ត្រាលី និងទូទាំងពិភពលោក ចូលរួមប្រារព្ធទិវាបុណ្យជាតិអូស្ត្រាលី នៅថ្ងៃទី២៦ ខែមករា ជារៀងរាល់ឆ្នាំ ។ ចំពោះស្ថានទូតអូស្ត្រាលីក្នុងរាជធានីភ្នំពេញ…
រាជធានីភ្នំពេញ ៖ ប្រជាជនអូស្ត្រាលីរស់នៅក្នុងប្រទេសអូស្ត្រាលី និងទូទាំងពិភពលោក ចូលរួមប្រារព្ធទិវាបុណ្យជាតិអូស្ត្រាលី នៅថ្ងៃទី២៦ ខែមករា ជារៀងរាល់ឆ្នាំ ។ ចំពោះស្ថានទូតអូស្ត្រាលីក្នុងរាជធានីភ្នំពេញ នេះជាពេលដែលយើងជួបជុំជាមួយមិត្តភក្តិ និងដៃគូពាក់ព័ន្ធ ដើម្បីអបអរសាទរសមិទ្ធផលនានាក្នុងរយៈពេល១២ខែកន្លងមកនេះ ហើយសម្លឹងមើលទៅអ្វីដែលនឹងកើតឡើងនាឆ្នាំបន្ទាប់ ។
សមិទ្ធផលជាច្រើនកាលពីឆ្នាំមុន គឺជាលទ្ធផលនៃកិច្ចសហការយូរអង្វែងរវាងប្រជាជនកម្ពុជា និងអូស្ត្រា
លី។ នៅក្នុងវិស័យសិក្សាធិការ សិល្បៈ ធុរកិច្ច កម្មវិធីជំនួយអភិវឌ្ឍន៍ និងកិច្ចសហប្រតិបត្តិការរបស់រដ្ឋាភិបាល ទំនាក់ទំនងរវាងកម្ពុជា និងអូស្ត្រាលី ត្រូវបានជំរុញដោយចំណងដ៏រឹងមាំរវាងប្រជាជន និងប្រជា
ជន ។
ខ្ញុំសូមអបអរសាទរដល់អ្នកគ្រប់គ្នា ចំពោះកិច្ចការកសាងចំណងភ្ជាប់នៅក្នុងវិស័យទាំងនេះ។ តាមរយៈការងារទាំងនេះ អ្នកកំពុងបន្តកេរដំណែល នៃមិត្តភាពកម្ពុជា-អូស្ត្រាលី និងធ្វើឱ្យជីវិតរស់នៅរបស់ប្រជាជនក្នុងប្រទេសទាំងពីរកាន់តែប្រសើរឡើង ។ ឆ្នាំ២០១៨ ជាឆ្នាំចាប់ផ្តើមកិច្ចសហការថ្មី។ ស្ថានទូតបានឧបត្ថម្ភសប្តាហ៍នៃថាមពលកកើតឡើងវិញ ជាលើកដំបូងក្នុងរាជធានីភ្នំពេញ រៀបចំឡើងដោយក្រុមហ៊ុនសហគ្រិនភាពអូស្ត្រាលី EnergyLab ។
យើងក៏បានគាំទ្រដល់សមាគមសិល្បៈកម្ពុជាក្នុងឱកាសមួយចំនួន ជាអាទិ៍ ការអញ្ជើញសិល្បករជនជាតិដើមអូស្ត្រាលីដ៏ល្បីល្បាញ អ្នកនាង Tracey Moffatt មកកាន់កម្ពុជា ដើម្បីធ្វើការជាមួយក្រុមសិល្បករវ័យក្មេងកម្ពុជា ។ ថ្វីបើការគាំទ្រទាំងនេះ ស្ថិតក្នុងវិស័យខុសគ្នាទាំងស្រុងយ៉ាងណាក្តី ក៏ក្រុមទាំងនេះ មានកម្លាំងថាមពលដូចគ្នា ដែលជានិមិត្តរូបនៃប្រទេសកម្ពុជា ក្នុងនាមជាប្រទេសមួយដែលត្រូវបានជំរុញដោយភាពក្លៀវក្លា និងថាមពលនៃយុវជន ។
ជារៀងរាល់ឆ្នាំ យុវជនកម្ពុជាវ័យក្មេងកាន់តែច្រើន ធ្វើដំណើរទៅប្រទេសអូស្ត្រាលី ដើម្បីទទួលយកការអប់រំលំដាប់ពិភពលោក។ តម្រូវការសេវាកម្មអប់រំអូស្ត្រាលី បន្តកើនឡើងក្នុងឆ្នាំ២០១៨ ហើយប្រទេសអូស្ត្រាលី នៅតែជាគោលដៅទី១ ក្នុងនាមជាប្រទេសប្រើប្រាស់ភាសាអង់គ្លេស សម្រាប់សិស្សនិស្សិត
កម្ពុជា ។
យុវជនវ័យក្មេងអូស្ត្រាលីជាច្រើន ក៏ជ្រើសរើសធ្វើដំណើរមកកម្ពុជា ដើម្បីចុះកម្មសិក្សា ឬទទួលឱកាសសិក្សា និងបណ្តុះបណ្តាលក្រោមកម្មវិធី New Colombo Plan របស់រដ្ឋាភិបាលអូស្ត្រាលី។ ចាប់តាំងពីឆ្នាំ ២០១៥ មក ជនជាតិអូស្ត្រាលីចំនួន១.៣៤០នាក់ បានសិក្សាឬបញ្ចប់កម្មសិក្សានៅកម្ពុជា ក្រោមកម្មវិធីនេះ។ នៅឆ្នាំ២០១៩ ប្រជាជនអូស្ត្រាលីវ័យក្មេងចំនួន ៤២៤នាក់ នឹងមកកាន់កម្ពុជា ដើម្បីស្វែងយល់អំពីវប្បធម៌ និងប្រវត្តិសាស្ត្រដ៏លេចធ្លោរបស់កម្ពុជា ស្របពេលដែលពួកគេទទួលបានជំនាញដ៏មានតម្លៃថ្មីៗ ។
កម្មវិធីជំនួយអភិវឌ្ឍន៍របស់រដ្ឋាភិបាលអូស្ដ្រាលី បន្តធ្វើឱ្យជីវភាពប្រចាំថ្ងៃរបស់ប្រជាជនកម្ពុជាកាន់តែប្រសើរឡើង។ មិនថាតាមរយៈគម្រោងតភ្ជាប់ប្រព័ន្ធទឹកស្អាតថ្មី ការពង្រឹងសារសំខាន់នៃសេវាសុខភាព ការបោសសម្អាតមីន ឬការផ្តល់សិទ្ធិអំណាចដល់ស្ត្រីក្នុងការឆ្លើយតបប្រឆាំងនឹងការបៀតបៀនផ្លូវភេទ
នៅក្នុងរោងចក្រ ជំនួយអូស្ត្រាលី (#AustralianAid) កំពុងតែធ្វើឱ្យមានភាពប្រសើរឡើងយ៉ាងពិតប្រាកដ។
និយាយអំពី hastags ឆ្នាំ២០១៨ ក៏ជាឆ្នាំនៃការគាំទ្រដ៏អស្ចារ្យចំពោះការងារយើង តាមរយៈប្រព័ន្ធផ្សព្វផ្សាយសង្គមផងដែរ ដូច្នេះខ្ញុំសូមអរគុណដល់អ្នកគាំទ្រយើងទាំងអស់ទាំងនៅក្នុង Facebook និងTwitter! សូមបន្តគាំទ្រ ដោយការចុចប៊ូតុងចូលចិត្ត និងចែករំលែកអំពីការងាររបស់យើង ។
ការគាំទ្ររបស់យើងចំពោះកម្ពុជា ក៏ផ្តោតសំខាន់ចំពោះការដោះស្រាយការគំរាមកំហែងក្នុងតំបន់នានាផងដែរ ដូចជាការប្រឆាំងនឹងអំពើភេរវកម្ម បទឧក្រិដ្ឋឆ្លងដែន សន្តិសុខដែនសមុទ្រ ការជួញដូរគ្រឿងញៀន និងមនុស្ស ព្រមទាំងការធ្វើចំណាកស្រុកមិនប្រក្រតី។
ស្របពេលដែលមានឱកាសថ្មីៗជាច្រើននៅឆ្នាំ២០១៨ យើងក៏មានបញ្ហាប្រឈមមួយចំនួនផងដែរ។ រដ្ឋាភិបាលអូស្ត្រាលី បានសម្តែងក្តីបារម្ភយ៉ាងខ្លាំង ចំពោះការធ្លាក់ចុះនៃបរិយាកាសប្រជាធិបតេយ្យ ។ ប្រទេសអូស្ត្រាលី ទន្ទឹងរង់ចាំបន្តកិច្ចសន្ទនាដ៏សំខាន់របស់យើង ជាមួយរាជរដ្ឋាភិបាលកម្ពុជា ស្តីពីសិទ្ធិមនុស្ស និងប្រជាធិបតេយ្យ ។
គោលនយោបាយការបរទេសអូស្ត្រាលី White Paper បានបញ្ជាក់ពីការប្តេជ្ញាចិត្តយ៉ាងរឹងមាំរបស់យើង ក្នុងការធ្វើការជាមួយដៃគូអាស៊ីអាគ្នេយ៍ ដើម្បីធានាថាតំបន់របស់យើងមានភាពរឹងមាំ សុវត្ថិភាព និងវិបុលភាព ។ ប្រទេសទាំងអស់នៅតំបន់ឥណ្ឌូប៉ាស៊ីហ្វិក អាចទទួលបានអត្ថប្រយោជន៍ពីប្រព័ន្ធអន្តរជាតិដែលផ្អែកលើមូលដ្ឋានច្បាប់ ។
ដើម្បីកត់សម្គាល់ពីការចូលរួមរបស់អូស្ត្រាលីជាមួយបណ្តាប្រទេសអាស៊ាន អូស្ត្រាលីបានធ្វើជាម្ចាស់ផ្ទះនៃកិច្ចពិភាក្សាថ្នាក់ដឹកនាំអាស៊ាន ជាលើកដំបូង ក្នុងទីក្រុងស៊ីដនី កាលពីខែមីនា ឆ្នាំ២០១៨ ដែលជាផ្នែកមួយនៃកិច្ចប្រជុំកំពូលពិសេសអាស៊ាន-អូស្ត្រាលី។ កិច្ចប្រជុំកំពូលនេះ បានបង្ហាញអំពីជម្រៅនៃទំនាក់ទំនង ដែលមានរវាងប្រទេសអូស្ត្រាលី និងបណ្តាប្រទេសនៅអាស៊ីអាគ្នេយ៍ រួមទាំងប្រទេសកម្ពុជាផងនោះ ដោយគ្របដណ្តប់លើវិស័យពាណិជ្ជកម្ម ការវិនិយោគ សន្តិសុខតំបន់ កិច្ចសហប្រតិបត្តិការប្រឆាំងភេរវកម្មកិច្ចសហប្រតិបត្តិការអភិវឌ្ឍន៍ និងចំណងវប្បធម៌ ។
បន្ទាប់ពីកិច្ចប្រជុំកំពូលនេះ កាលពីខែវិច្ឆិកា ឆ្នាំ២០១៨ នាយករដ្ឋមន្ត្រីអូស្ត្រាលី លោក Scott Morrison បានចេញសេចក្តីប្រកាសថ្មីមួយ ស្តីពីការប្តេជ្ញាចិត្តរបស់អូស្ត្រាលីក្នុងការរឹតបណ្តឹងចំណងកិច្ចសហប្រតិបត្តិការជាមួយអាស៊ាន ។ ក្នុងនោះ រួមមានការបង្កើនជំនួយរដ្ឋាភិបាលអូស្ត្រាលី ក្នុងការគាំទ្រដល់តម្រូវការហេដ្ឋារចនាសម្ព័ន្ធក្នុងតំបន់ ក៏ដូចជាការបង្កើនកិច្ចសហប្រតិបត្តិការលើបញ្ហាដែនសមុទ្រ និងធនធានទឹកទន្លេមេគង្គ ។
ឆ្នាំ២០១៩ គឺជាខួបលើកទី៤៥នៃទំនាក់ទំនងរវាងប្រទេសអូស្ត្រាលី និងអាស៊ាន។ ដើម្បីអបអរសាទរទំនាក់ទំនងនេះ យើងមានសេចក្តីសោមនស្សរីករាយ សូមប្រកាសថានឹងមានព្រឹតិ្តការណ៍ពិសេសៗជាបន្តបន្ទាប់ទៀត ហៅថា «អូស្ត្រាលី ឥឡូវនេះ» ។ ព្រឹត្តិការណ៍នេះ នឹងប្រព្រឹត្តទៅនៅទូទាំងតំបន់អាស៊ីអាគ្នេយ៍ រួមទាំងនៅកម្ពុជាផងដែរ ។ ព្រឹត្តិការណ៍នេះ នឹងបង្កើតការយល់ដឹងអំពីប្រទេសអូស្ត្រាលី និងបង្កើតទំនាក់ទំនងរវាងយុវជនក្នុងតំបន់។ សូមរង់ចាំមើលសកម្មភាពនានាទាក់ទងនឹង «អូស្ត្រាលី ឥឡូវនេះ» ដ៏រំភើបនៅកម្ពុជាក្នុងរយៈពេលពេញមួយឆ្នាំខាងមុខ !
នាឱកាសទិវាបុណ្យជាតិអូស្ត្រាលីនេះ ខ្ញុំសូមជូនពរដល់ប្រជាជនអូស្ត្រាលីទាំងអស់នៅកម្ពុជា និងប្រជាជនកម្ពុជាដែលចាត់ទុកអូស្ត្រាលីជាមិត្តជិតស្និទ្ធ ក្នុងឆ្នាំ២០១៩នេះប្រកបដោយភាពរីករាយ និងសុវត្ថិភាព ។
លោកជំទាវ អេនជេលឡា ខកខឺរ៉េន (Angela Corcoran) ឯកអគ្គរាជទូតអូស្ត្រាលីប្រចាំនៅកម្ពុជា៕
ចែករំលែកព័តមាននេះ