តាមប្រភពពី Oddity Central បានឱ្យដឹងថា ក្មេងស្រីជំទង់ពីរនាក់សុខចិត្តកាត់សក់ខ្លី ធ្វើជាមនុស្សប្រុស ដើម្បីអាចឱ្យភ្ញៀវមកកាត់សក់នៅហាងឪពុករបស់នាង ដោយមានទំនុកចិត្ត និងអាចបន្តរកប្រាក់ចំណូលដល់គ្រួសារ បើទោះបីជាឪពុកធ្លាក់ខ្លួនឈឺក៏ដោយ ។ ការក្លែងខ្លួនធ្វើជាប្រុសនេះ គឺអស់រយៈពេល៤ឆ្នាំហើយ ។
Jyoti Kumari មានអាយុ១៨ឆ្នាំ និងប្អូនស្រីឈ្មោះ Neha អាយុ១៦ឆ្នាំ មកពី Banwari Tola នារដ្ឋ Uttar Pradesh ប្រទេសឥណ្ឌា បានធ្វើឱ្យមហាជនមានភាពភ្ញាក់ផ្អើល និងកោតសរសើរចំពោះការលះបង់របស់ពួកគេ។ កូនស្រីទាំងពីរនាក់ សុខចិត្តក្លែងខ្លួនធ្វើជាប្រុសអស់ពេលជាង៤ឆ្នាំ ដើម្បីអាចមកដំណើរហាងកាត់សក់របស់ឪពុក ខណៈដែលឪពុកធ្លាក់ខ្លួនឈឺដើរមិនរួច។
នៅឆ្នាំ២០១៤ ឪពុករបស់ពួកគេបានឈឺ ហើយបង្ខំចិត្តបិទហាងកាត់សក់។ ដោយសារតែបាត់បង់ប្រាក់ចំណូលសម្រាប់ផ្គត់ផ្គង់គ្រួសារ Jyoti និង Neha បានសម្រេចចិត្តមកបើកហាងកាត់សក់ឡើងវិញ។ ភ្ញៀវជាច្រើនមិនពេញចិត្តនឹងពួកគេទេ ដោយសារតែពួកគេគឺជាស្រី។ ព្រោះតែហេតុផលនេះ ពួកគេក៏កាត់សក់ខ្លី ពាក់ខោអាវប្រុស ដើម្បីឱ្យភ្ញៀវពេញចិត្ត។
អស់រយៈពេល៤ឆ្នាំមកនេះ ពួកគេរកបានប្រាក់ចំណូលជូនគ្រួសារបាន៤០០រូពី (ជិត៦ដុល្លារ) ជារៀងរាល់ថ្ងៃ ដែលអាចទិញម្ហូបអាហារនិងថ្នាំព្យាបាលឪពុកបាន។ ទើបតែមកដល់ពេលនេះ បងប្អូនទាំងពីរនាក់ សម្រេចចិត្តប្រាប់ពីភេទពិតរបស់ខ្លួនដល់អ្នកកាសែត។
គ្រាន់តែដឹងរឿងនេះភ្លាម មហាជនបានកោតសរសើរយ៉ាងខ្លាំង ចំពោះការលះបង់សម្រាប់គ្រួសារ ដែលតាំងពីឪពុកដើរមិនរួច រហូតដល់អាចដើរបានវិញធម្មតានៅពេលនេះ៕
ចែករំលែកព័តមាននេះ