ប្រទេសថៃ ៖ សារព័ត៌មាន Bangkok Post បានឲ្យដឹងកាលពីថ្ងៃចន្ទ កន្លងមកថា រចនាសម្ព័ន្ធពលកម្មក្នុងប្រទេសថៃនាឆ្នាំនេះនឹងមានការផ្លាស់ប្តូរក្នុងផ្នែកចំនួនពលករ ព្រោះអត្រាកំណើតក្នុងប្រទេសនេះនៅទាប ខណៈដែលចំនួនប្រជាជនជរាកំពុងតែកើនឡើង ។ ជាលទ្ធផលប្រទេសថៃមិនមានពលករក្នុងស្រុកថ្មីៗគ្រប់គ្រាន់សម្រាប់អាជីវកម្ម និងវិស័យឧស្សាហកម្មរបស់ប្រទេសនាពេលវែងទេ ។
លោក Tanit Sorat ដែលជាអនុប្រធានក្រុមប្រឹក្សាផ្តល់ទីប្រឹក្សាការអភិវឌ្ឍន៍ការងារជាតិក្រោមក្រសួងការងារ និងជាអនុប្រធានសហព័ន្ធពាណិជ្ជកម្ម និងឧស្សាហកម្មថៃបាននិយាយថា កង្វះពលករមិនមែនជាបញ្ហាតែមួយសម្រាប់ការអភិវឌ្ឍន៍របស់ប្រទេសថៃទេ តែពលករមានជំនាញជាច្រើនក៏មិនមានជំនាញត្រឹមត្រូវសម្រាប់តម្រូវការក្រុមហ៊ុនដែរ ។
យោងតាមទិន្នន័យដែលបានពីក្រសួងការងាររបស់ប្រទេសថៃបានឲ្យដឹងថា ក្នុងចំណោមពលករសរុប ៣៨លាននាក់ មាន ៤៩%ជាពលករដែលមានអាយុជាមធ្យម៤០ឆ្នាំ ។ លើសពីនេះទៅទៀតមាន ៤៥% ជាពលករមិនមានជំនាញ ។
លោក Tanit បាននិយាយថា ចំនួនបុគ្គលិកក្នុងស្ថានប័នហិរញ្ញវត្ថុនឹងមានការធ្លាក់ចុះក្នុងរយៈពេលខ្លី ព្រោះតែឥទ្ធិពលពីកម្មវិធីធនាគារកិច្ចលើទូរស័ព្ទ និងលើអ៊ីនធើណែតជាដើម ។ លើសពីនេះទៅទៀត វិស័យលក់ទំនិញទាំងតាមហាងទំនិញធំៗ និងតូចៗនឹងកាត់បន្ថយបុគ្គលិក ហើយចាប់ផ្តើមប្រើបច្ចេកវិទ្យាដើម្បីកាត់បន្ថយការចំណាយ ។ វិស័យផ្តល់សេវាកម្មសន្តិសុខដែលធ្លាប់តែត្រូវការពលករច្រើននឹងផ្លាស់ប្តូរមកប្រើបច្ចេកវិទ្យាឌីជីថល និងសេវាកម្មថ្មីៗវិញផងដែរ ។
ផ្ទុយមកវិញលោក Tanit បានបន្ថែមថា ពលករដែលអាចនិយាយបានពីរភាសានៅតែមានតម្រូវការខ្ពស់ក្នុងគ្រប់វិស័យ ជាពិសេសអ្នកដែលចេះភាសាអង់គ្លេស និងចិន ។ លោកបាននិយាយថា«ភាសាបរទេសគឺពិតជាសំខាន់ណាស់ ព្រោះរដ្ឋាភិបាលមានគោលនយោបាយជាច្រើនក្នុងការទាក់ទាញការវិនិយោគផ្ទាល់ពីបរទេស និងលើកតម្កើងវិស័យទេសចរណ៍» ៕
ចែករំលែកព័តមាននេះ