ខេត្តមណ្ឌលគិរី ៖ នេះជាឆ្នាំទី៣ហើយ ដែលមានការពិសោធន៍ដាំដុះដំឡូងបារាំងនៅទឹកដីខេត្តមណ្ឌលគិរី បើទោះជាពុំទទួលបានទិន្នផលខ្ពស់ដូចបណ្ដាប្រទេសនៅតំបន់អឺរ៉ុបក្ដី ប៉ុន្ដែក្នុង១ហិកតា ក៏ទទួលបានពី១៧ទៅ២០តោនដែរ ដោយលក់លើទីផ្សារក្នុងស្រុកតម្លៃ៤ពាន់រៀល ក្នុង១គីឡូក្រាម ។…
ខេត្តមណ្ឌលគិរី ៖ នេះជាឆ្នាំទី៣ហើយ ដែលមានការពិសោធន៍ដាំដុះដំឡូងបារាំងនៅទឹកដីខេត្តមណ្ឌលគិរី បើទោះជាពុំទទួលបានទិន្នផលខ្ពស់ដូចបណ្ដាប្រទេសនៅតំបន់អឺរ៉ុបក្ដី ប៉ុន្ដែក្នុង១ហិកតា ក៏ទទួលបានពី១៧ទៅ២០តោនដែរ ដោយលក់លើទីផ្សារក្នុងស្រុកតម្លៃ៤ពាន់រៀល ក្នុង១គីឡូក្រាម ។
តាមការបញ្ជាក់ពីលោកសាស្ត្រាចារ្យ ជាង ហុង ព្រឹទ្ធបុរសនៃមហាវិទ្យាល័យវិទ្យាសាស្ត្រកសិកម្ម បានឱ្យដឹងថា ដំឡូងបារាំងពិតជាអាចដាំដុះបាននៅប្រទេសកម្ពុជា ពិសេសនៅខេត្តមណ្ឌលគិរី ហើយទិន្នផលវិញខ្ពស់បង្គួរ ។ លោកសាស្ត្រាចារ្យ បានមានប្រសាសន៍ថា ៖« ក្នុងឆ្នាំនេះ យើងបានប្រមូលផលដំឡូងបារាំងមានពូជចំនួន៦ប្រភេទ ដែលបានរើសកាលពីឆ្នាំកន្លងមក ហើយឆ្នាំនេះជាការពិសោធន៍លើកទី៣ដែលបានទទួលទិន្នផលគួរសម តែមិនអាចប្រៀបធៀបនឹងបណ្តាប្រទេសមួយចំនួនដូចជានៅអឺរ៉ុបបានទេ »។
លោកបញ្ជាក់ថា ៖« សម្រាប់កម្ពុជា ការដាំដំឡូងបារាំង ក្នុង១ហិកតា ទទួលបានទិន្នផលពី១៧ទៅ២០តោន នឹងលក់បានក្នុង១គីឡូក្រាម ចំនួន៤ពាន់រៀល ។ ដូច្នេះបើក្នុង១ហិកតា បានទិន្នផល១៧តោនយ៉ាងតិច ក៏យើងបានជាង១ម៉ឺនដុល្លាដែរ » ។ លោកសាស្ត្រាចារ្យ បានសន្និដ្ឋានថា ដំឡូងបារាំងគឺពិតជាអាចដាំបាននៅខេត្តមណ្ឌលគិរី ដោយផ្អែកលើការពិសោធន៍ជាក់ស្ដែងរយៈពេលឆ្នាំទី៣មកនេះ ថែមទាំងមានបច្ចេកទេសគ្រប់គ្រាន់ មានពូជ ដែលសមស្របនឹងអាកាសធាតុនៅតំបន់នេះ ។
សាកលវិទ្យាធិការនៃវិទ្យាល័យភូមិន្ទកសិកម្ម លោក ង៉ោ ប៊ុនថាន បានមានប្រសាសន៍ផងដែរថា បន្ទាប់ពីធ្វើការស្រាវជ្រាវ និងពិសោធន៍ដំឡូងបារាំងដែលយកមកដាំនៅខេត្តមណ្ដលគិរីនេះ ជាលទ្ធផល យើងនឹងមានកញ្ចប់បច្ចេកទេសដំឡូងបារាំង អាចឈានដល់ដំណាក់កាលចុងក្រោយ និងអាចដាំបានហើយនៅខេត្តមណ្ឌលគិរី ។ ដូច្នេះ លោកបានណែនាំដល់មន្ទីរកសិកម្ម និងមហាវិទ្យាល័យកសិកម្មចំការដូង ត្រូវសហការគ្នាជួយដល់កសិករូបណាដែលមានចំណាប់អារម្មណ៍ក្នុងការដាំដំឡូងនេះ ។
ប្រធានមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី លោក សុង ឃាង បានឲ្យដឹងផងដែរថា នេះជាឆ្នាំទី៣ហើយ ដែលមន្ទីរកសិកម្ម សហការជាមួយសាកលវិទ្យាល័យភូមិន្ទកសិកម្មចំការដូង ក្នុងការសិក្សាអំពីដំណាំដំឡូងបារាំងនៅក្នុងខេត្តមណ្ឌលគិរី ។លោកមានប្រសាសន៍ថា ៖« ឆ្នាំទី៣នេះ លទ្ធផលការដាំដុះមានភាពល្អប្រសើរ ហើយអាចកំណត់បានពូជដែលត្រូវដាំ និងសមស្របតាមអាកាសធាតុ »។ លោកប្រធានមន្ទីរសង្ឃឹមថា ឆ្នាំក្រោយ ការដាំដំឡូងបារាំងនេះនឹងសាយភាយដល់កសិករ ដែលមានចំណាប់អារម្មណ៍ និងតម្លៃក៏ល្អដែរ ជាពិសេស នឹងធ្វើការផ្សព្វផ្សាយអំពីបច្ចេកទេស ពូជជូនដល់កសិករផងដែរ ។
គួរកត់រំឭកថា កាលពីថ្ងៃទី២០ មករា កន្លងមក លោក ង៉ោ ប៊ុនថាន សាកលវិទ្យាធិការនៃសាលកវិទ្យាល័យភូមិន្ទកសិកម្មចំការដូង បានដឹកនាំក្រុមនិស្សិតចំនួន៤៥នាក់ចុះទៅពិនិត្យលទ្ធផលនៃការដាំដុះដំឡូងបារាំងនៅក្រុងសែនមនោរម្យ។ ការចុះធ្វើកម្មសិក្សា ក៏ដូចជាចូលរួមប្រមូលផលនេះ ដើម្បីឲ្យពួកគេបានដឹងពីបច្ចេកទេសនៃការដាំដុះ និងប្រមូលផលដោយផ្ទាល់ ព្រមទាំងឈ្វេងយល់ពីប្រភេទពូជដែលអាចដាំដុះបាននៅប្រទេសកម្ពុជាផងដែរ ៕
ចែករំលែកព័តមាននេះ