ប្រទេសស្វ៊ីស ៖ កាលពីថ្ងៃទី២១ មករា កន្លងមកនេះសារព័ត៌មាន Reuters បានឲ្យដឹងថា មូលនិធិរូបិយវត្ថុអន្តរជាតិ (IMF) បានបន្ទាបការព្យាករណ៍លើការលូតលាស់សេដ្ឋកិច្ចពិភពលោកសម្រាប់ឆ្នាំ២០១៩ និង ២០២០ ព្រោះតែការអន់ថយផ្នែកសេដ្ឋកិច្ចនៅអឺរ៉ុប និងទីផ្សារកំពុងលូតលាស់មួយចំនួន និងបាននិយាយថាការបរាជ័យលើដំណោះស្រាយជម្លោះពាណិជ្ជកម្មកាន់តែប៉ះពាល់ដល់សេដ្ឋកិច្ចពិភពលោកកាន់តែខ្លាំងឡើងៗ ។
ជាមួយគ្នានេះផងដែរ IMF ក៏បានលើកឡើងថា ការអន់ថយនៃសេដ្ឋកិច្ចចិន និងការមិនអាចសម្រេចបានកិច្ចព្រមព្រៀងពេលដែលប្រទេសអង់គ្លេសចាកចេញពីសហភាពអឺរ៉ុបក៏អាចប៉ះពាល់ដល់ទីផ្សារហិរញ្ញវត្ថុដែរ ។ មូលនិធិនេះព្យាករណ៍មកថា សេដ្ឋកិច្ចពិភពលោកនឹងលូតលាស់បាន ៣.៥% នៅឆ្នាំ២០១៩ និង៣.៦% នៅឆ្នាំ២០២០ខាងមុខ ។
អ្នកស្រី Christine Lagarde ដែលជាប្រធានគ្រប់គ្រងរបស់ IMF បាននិយាយថា «បន្ទាប់ពីការលូតលាស់យ៉ាងរឹងមាំអស់២ឆ្នាំ សេដ្ឋកិច្ចពិភពលោកកំពុងតែលូតលាស់កាន់តែយឺតជាងមុន ហើយហានិភ័យក៏កំពុងតែកើនឡើងដែរ» ។
អ្នកស្រីបានបន្តថា «តើវាមានន័យថា វិបត្តិសេដ្ឋកិច្ចពិភពលោកនឹងកើតមានឡើងក្នុងពេលឆាប់ៗមែនទេ? មិនមែនទេ ប៉ុន្តែហានិភ័យនៃការធ្លាក់ចុះបន្ថែមពិតជាបានកើនឡើងពិតមែន» ។
ការបន្ទាបការព្យាករណ៍នេះបង្ហាញពីមុខសញ្ញានៃការអន់ថយនៅអឺរ៉ុបដែលមានប្រទេសអាល្លឺម៉ង់ដែលនាំចេញបានទាបជាងមុន ព្រោះតែស្តង់ដារបញ្ចេញជាតិពុលថ្មីសម្រាប់រថយន្ត និងមានអ៊ីតាលីដែលស្ថិតក្រោមសម្ពាធ ព្រោះតែមានការខ្វែងគំនិតជាមួយនឹងសហភាពអឺរ៉ុបជាដើម ។
លើសពីនេះទៅទៀត IMF បានបន្ទាបការព្យាករណ៍សម្រាប់ការលូតលាស់របស់ប្រទេសកំពុងអភិវឌ្ឍន៍ពី ៤.៧% មកស្មើ ៤.៥% ផងដែរសម្រាប់ឆ្នាំ ២០១៩នេះ ។
IMF បាននិយាយថា «ទីផ្សារកំពុងលូតលាស់ និងសេដ្ឋកិច្ចកំពុងអភិវឌ្ឍន៍ត្រូវបានសាកល្បងដោយស្ថានការនៅក្រៅប្រទេសក្នុងរយៈពេលប៉ុន្មានខែមកនេះ ខណៈដែលមានភាពតានតឹងពាណិជ្ជកម្ម កំណើនអត្រាការប្រាក់នៅសហរដ្ឋអាមេរិក កំណើនតម្លៃប្រាក់ដុល្លារ លំហូរមូលធនចេញក្រៅប្រទេស និងការឡើងចុះនៃតម្លៃប្រេង» ៕
ចែករំលែកព័តមាននេះ