ខេត្តសៀមរាប ៖ នៅក្នុងឃុំកំពង់ឃ្លាំង និងតំបន់មួយចំនួនទៀតនៃភូមិសាស្ត្រស្រុកសូទ្រនិគម ត្រូវបានគេមើលឃើញថា បទល្មើសនេសាទគ្រប់ប្រភេទកំពុងកើតមានយ៉ាងពេញបន្ទុក ប៉ុន្តែគេមិនដែលឃើញមន្ត្រីជំនាញ មន្ត្រីសមត្ថកិច្ចជំនាញចុះទៅបង្ក្រាបសោះឡើយ។ គេបានដាក់ការសង្ស័យថា សមត្ថកិច្ចក្នុងមូលដ្ឋានខាងលើទំនងជាទទួលសំណែនពីក្រុមអ្នករកស៊ីបទល្មើសនេសាទទាំងនេះ។…
ខេត្តសៀមរាប ៖ នៅក្នុងឃុំកំពង់ឃ្លាំង និងតំបន់មួយចំនួនទៀតនៃភូមិសាស្ត្រស្រុកសូទ្រនិគម ត្រូវបានគេមើលឃើញថា បទល្មើសនេសាទគ្រប់ប្រភេទកំពុងកើតមានយ៉ាងពេញបន្ទុក ប៉ុន្តែគេមិនដែលឃើញមន្ត្រីជំនាញ មន្ត្រីសមត្ថកិច្ចជំនាញចុះទៅបង្ក្រាបសោះឡើយ។
គេបានដាក់ការសង្ស័យថា សមត្ថកិច្ចក្នុងមូលដ្ឋានខាងលើទំនងជាទទួលសំណែនពីក្រុមអ្នករកស៊ីបទល្មើសនេសាទទាំងនេះ។ បទល្មើសនេសាទទាំងនោះរួមមានរបាំងលបសាច់អួនក្រឡាញឹកប្រវែងរាប់រយម៉ែត្រ ដោយប្រើឧបករណ៍បរ និងលបរ៉ូយ៉ាល, របាំងសាច់អួនក្រឡាញឹកព័ទ្ធព្រៃផ្ជិតចាប់ត្រីប្រវែងរាប់រយម៉ែត្រ ជាច្រើនរបាំង និងមានសម្រាស់រាប់រយដុំទៀត ដែលពួកគេកំពុងចាប់ផ្តើមសម្រុកហ៊ុមចាប់ត្រីយ៉ាងគគ្រឹកគគ្រេង ទាំងកណ្តាលថ្ងៃ ដោយមិនខ្លាចញញើតសមត្ថកិច្ចនិងមន្ត្រីជំនាញឡើយ។
ជាងនេះទៅទៀត មានបទល្មើសធំៗមួយចំនួនដូចជារុញស៊ីប និងអូសយាំងកាវរបស់ជនជាតិវៀតណាម នៅតំបន់ចុងឃ្នៀស បានឆ្មក់មកអូសយ៉ាងរំភើយនៅតំបន់កំពង់ឃ្លាំង។ ប្រភពពីប្រជានេសាទលក្ខណៈគ្រួសារបានឲ្យដឹងថា ក្រុមល្មើសនេសាទប្រព្រឹត្ដទៅបានយ៉ាងរលូន មិនខ្លាចការចាប់ចងពីមន្ត្រីជំនាញ និងសមត្ថកិច្ចនេះដោយសារតែពួកគេបានត្រូវដង ត្រូវផ្លែគ្នាអស់ហើយ ដោយនៅក្នុងឃុំកំពង់ឃ្លាំង មានអ្នករត់ការម្រមូលលុយពីក្រុមល្មើសទៅឲ្យមន្ត្រីសមត្ថកិច្ចនិងមន្ត្រីពាក់ព័ន្ធគ្រប់លំដាប់ថ្នាក់។
ប្រភពបានឲ្យដឹងទៀតថា បទល្មើសនេសាទនៅតំបន់នេះមិនថារដូវប្រាំងឬរដូវវស្សា មិនថារដូវបិទ ឬរដូវបើកនោះទេ គឺមានជាប្រចាំ គ្រាន់តែតិចឬច្រើនតែប៉ុណ្ណោះ។ អ្នករកស៊ីបទល្មើមិនមែនចេះតែប្រថុយប្រថានបានទេ មុននឹងចាប់ផ្តើមចេញធ្វើសកម្មភាពត្រូវទៅជួបជាមួយអ្នករត់ការជាមុនសិន ពីព្រោះពួកគេពូកែរត់ការនិងចេះក្បាច់គុណអាចការពារមិនឲ្យសមត្ថកិច្ចឬមន្ត្រីជំនាញកាប់បំផ្លាញឬចាប់ចងបាន។ ប៉ុន្តែក៏ត្រូវជូនលុយយ៉ាងក្រាស់ក្រែលទៅឲ្យគាត់ផងដែរទើបគាត់ការពារឲ្យ។
លោកម៉ក់ ប្រុស អភិបាលស្រុកសូទ្រនិគម បានឲ្យដឹងនៅរសៀលថ្ងៃទី២៤ ខែមករា នេះថា បានទទួលស្គាល់ថានៅក្នុងស្រុក ពិតជាមានបទល្មើសនេសាទកើតឡើងច្រើននៅក្នុងមូលដ្ឋានរបស់លោកមែន ហើយភាគច្រើនមកពីតំបន់ចុងឃ្នៀស និងមកពីស្រុកជីក្រែង ។ លោកបន្តថា ចំណែកពលរដ្ឋក្នុងមូលដ្ឋាននេះមិនសូវមានអ្នករកស៊ីបទល្មើសនេសាទនោះទេ។
លោកបញ្ជាក់ថា នៅក្នុងអង្គប្រជុំគណៈអភិបាលម្តងៗ លោកតែងតែក្រើនរំលឹកដល់សមត្ថកិច្ចជំនាញដែលពាក់ព័ន្ធ ចាត់វិធានការបង្ក្រាបបទល្មើសឲ្យមានការថយចុះ ។ បន្ថែមពីនោះលោកក៏តែងតែឆ្មក់ចុះបង្ក្រាបជាមួយកងកម្លាំងផងដែរ។ ជុំវិញករណីខាងលើនេះដែរ កោះសន្តិភាពមិនអាចសុំការពន្យល់ពីលោកនាយសង្កាត់រដ្ឋបាលជលផលកំពង់ឃ្លាំងបានទេ នារសៀលថ្ងៃទី២៥ ខែមករានេះ ដោយសារទូរស័ព្ទរបស់លោកនៅក្រៅតំបន់សេវា។
រីឯ លោក ព្រិន្ទ សាវិន នាយខណ្ឌរដ្ឋបាលជលផល ខេត្តសៀមរាប ក៏មិនអាចទាក់ទងសុំការពន្យល់ពីលោកបានដែរនារសៀលថ្ងៃទី២៥ខែមករា នេះ។
មហាជននៅក្នុងខេត្តសៀមរាបសង្ឃឹមថា លោកទៀ សីហា អភិបាលខេត្តសៀមរាប ដែលទើបនិងឡើងកាន់តំណែងថ្មីថ្មោង ប្រាកដ ជា អាចមានវិធានការ បង្ក្រាបបទល្មើសនេសាទនៅតំបន់កំពង់ឃ្លាំងឲ្យមានការថយចុះផង ព្រោះសមត្ថកិច្ចជំនាញមួយចំនួនអាចមានការពាក់ព័ន្ធនឹងបទល្មើសនេសាទទាំងនេះ៕
ចែករំលែកព័តមាននេះ