រាជធានីភ្នំពេញ ៖ អ្នកប្រដាល់ជើងថ្មីធន់ អៀងឡៃ ដែលកំពុងជ្រកកោនក្រោមដំបូលសមាគមកីឡាប្រដាល់ក្រសួងការពារជាតិ បាន បង្ហាញភាពខ្លាំងរបស់ខ្លួនស្ទើរតែគ្រប់សង្វៀនប្រដាល់ ធ្វើឱ្យអ្នកនិយមតាមដានការប្រកួតភាគច្រើនមានការភ្ញាក់ផ្អើលយ៉ាងខ្លាំង ។ ជាក់ស្ដែងត្រឹមតែរយៈពេលជាង១ឆ្នាំចុងក្រោយ គេបានផ្ដួលអ្នកប្រដាល់ទាំងខ្មែរនិងបរទេសឱ្យចាញ់នៅក្រោមកណ្ដាប់ដៃរបស់គេជាបន្តបន្ទាប់។
អ្វីដែលកាន់តែធ្វើឱ្យធន់ អៀងឡៃ លេចធ្លោខ្លាំងក្នុងពិភពប្រដាល់នាពេលបច្ចុប្បន្ននោះគឺលទ្ធផល៣២ប្រកួតចុងក្រោយរបស់គេមិនដែលស្គាល់ពាក្យថាស្មើឬចាញ់ទាល់តែសោះ សូម្បីប្រកួតជាមួយកីឡាករថៃ៥ដងឈ្នះទាំង៥ដង ក្នុងនោះថែមទាំងផ្ដួលឱ្យសន្លប់បានចំនួន២ដងទៀតផង។
ជួបអ្នកយកព័ត៌មានកោះសន្តិភាពនាពេលថ្មីៗនេះ ធន់ អៀងឡៃ បានឱ្យដឹងថា សព្វថ្ងៃលោកអាចប្រកួតបាន២ប្រភេទទម្ងន់គឺទម្ងន់៥៤គីឡូក្រាមនិង៥៧គីឡូក្រាម ។ រយៈពេលជាង១ឆ្នាំចុងក្រោយមកនេះ លោកបានយកឈ្នះកីឡាករជើងខ្លាំងជាច្រើននាក់ក្នុងនោះក្រៅពីកីឡាករបរទេសខាងលើក៏មានទាំងកីឡាករជើងខ្លាំងទម្ងន់ស្រាល ហ៊ុន ឈុនហេង របស់ក្លិបតាព្រហ្មមានជ័យម្នាក់ទៀតទៀតផង ។
កីឡាករ ហ៊ុន ឈុនហេង អ្នកណាមិនល្បីថាខ្លាំង ព្រោះថាក្នុងចំណោមអ្នកប្រដាល់ប្រភេទទម្ងន់៥៧គីឡូក្រាមគេវ៉ៃរាបទាំងអស់ ។ នៅមានសិស្សច្បងសៀវ ង៉ុយ, សយ សី ជើងខ្លាំងប្រចាំក្លិបវិបុលដារិទ្ធសែនសុខ និងសេក គឹមសាន្ត ជើងខ្លាំងប្រចាំក្លិបអង្គរមានជ័យខេត្តសៀមរាបម្នាក់ទៀតដែលសុទ្ធតែចាញ់នៅក្រោមកណ្ដាប់ដៃរបស់លោកទាំងអស់ ។ អ្វីដែលកាន់តែធ្វើឱ្យពិភពប្រដាល់ផ្ដោតការចាប់អារម្មណ៍ខ្លាំងមកលើរូបលោកគឺលទ្ធផលប្រកួត៣២លើកចុងក្រោយរបស់លោកមិនដែលចាញ់ទាល់តែសោះ ។
ធន់ អៀងឡៃ បានឱ្យដឹងបន្តថា កន្លងមកលោកធ្លាប់ចូលរួមប្រកួតដណ្ដើមពានរង្វាន់មួយដែលមានឈ្មោះថា Knock Out Serie By K-Cement ដោយបានឡើងដល់ពាក់កណ្ដាលផ្ដាច់ព្រ័ត្រដែរ ប៉ុន្តែគួរឱ្យស្ដាយដោយរូបគេត្រូវប៉ះកីឡាករ បឺត សង្ឃឹម ជើងខ្លាំងប្រចាំក្លិបរ៉ាហាប់ស្វាយ ប៉ាក ទើបលោកបានត្រឹមជាប់ចំណាត់ថ្នាក់លេខ៤។
ទោះបីជាយ៉ាងណា កូនសិស្សសំណព្វរបស់លោកគ្រូធន់ សុភា រូបនេះបានប្រាប់ថា រាល់ពេលលោកឡើងសង្វៀនប្រកួតគឺមិនដែលខ្លាចឬញញើតអ្នកណាម្នាក់ឡើយ ។ និយាយរួមចង់អ្នកនោះខ្លាំងប៉ុនណាក៏ដោយក៏លោកត្រូវតែវ៉ៃឱ្យអស់ពីសមត្ថភាពដែរទើបលោកតែងតែទទួលជោគជ័យស្ទើរតែគ្រប់ការប្រកួតតាំងពីលោកឈានជើងចូលប្រឡូកក្នុងពិភពប្រដាល់ ។
ឆ្លើយតបនឹងអ្នកយកព័ត៌មានដែលបានសាកសួរពីជីវប្រវត្តិមុនក្លាយខ្លួនជាអ្នកប្រដាល់ល្បីកីឡាករ ធន់ អៀងឡៃ បានប្រាប់ដោយគ្មានលាក់លៀមថា មកដល់ឆ្នាំនេះលោកមានអាយុ២២ឆ្នាំហើយ និងមានស្រុកកំណើតនៅភូមិក្បាលកោះ ឃុំអំពិលទឹក ស្រុកកំពង់ត្រឡាចខេត្តកំពង់ឆ្នាំង ។ លោកជាកូនទី៤ក្នុងចំណោមបងប្អូន១០នាក់(ប្រុស៦នាក់ស្រី៤នាក់)ដែលមានឳពុកម្ដាយជាកសិករ។ ដោយសារតែជីវភាពគ្រួសារមានការខ្វះខាត លោកសុខចិត្តលះបង់ចោលការសិក្សាត្រឹមថ្នាក់ទី១១មកបម្រើការជាសន្តិសុខឯកជនក្នុងក្រុមហ៊ុនមួយនៅរាជធានីភ្នំពេញតាំងពីឆ្នាំ២០១៥ ។
មូលហេតុដែលនាំឱ្យលោកចូលហ្វឹកហាត់ប្រដាល់រហូតមកទល់សព្វថ្ងៃនេះ ដោយសារលោកឃើញកូនសិស្សរបស់លោកធន់ សុភា ហាត់រត់កាត់ពីមុខកន្លែងលោកយាមជាញឹកញាប់ ធ្វើឱ្យលោកចាប់អារម្មណ៍ចង់ហាត់នឹងគេដែរ ។ ក្រោយមកលោកក៏សួរនាំរៀមច្បងទាំងនោះធ្វើមេ៉ចបានចូលហ្វឹកហាត់ប្រដាល់ ហើយទីបំផុតលោកក៏បានសម្រេចចិត្តទៅសុំលោកគ្រូធន់ សុភា ដោយផ្ទាល់ ។
ធន់ អៀងឡៃ បន្តថា ដំបូងលោកមានបំណងហ្វឹកហាត់ដើម្បីសុខភាពប៉ុណ្ណោះ ដឹងអីយូរៗទៅបែរជាចង់ក្លាយជាកីឡាករប្រដាល់ ។ ដោយមានដុងខាងវាយតប់ស្រាប់ផងនោះ ទីបំផុតលោកឈប់ធ្វើសន្តិសុខមកហាត់ប្រដាល់ជាមួយលោកគ្រូធន់ សុភា រហូតទល់សព្វថ្ងៃប៉ុន្តែដំបូងឡើយឪពុកម្ដាយរបស់លោកមិនគាំទ្រទេព្រោះខ្លាចកូនឈឺសាច់ តែក្រោយមកពួកគាត់ ក៏លែងជំទាស់វិញ។
គួរបញ្ជាក់ថា កីឡាករដែលមានដើមកំណើតមកពីខេត្តកំពង់ឆ្នាំងរូបនេះ ត្រូវបានលោកគ្រូធន់ សុភា ស្រឡាញ់ពេញចិត្តយ៉ាងខ្លាំង ដោយសារតែគេមិនដូចសិស្សដទៃទៀតឡើយ គឺឧស្សាហ៍ព្យាយាមហ្វឹកហាត់មិនត្អូញត្អែរទេ ។ ចំណែករូបគេក៏បានតាំងចិត្តយ៉ាងមុតមាំថា ត្រូវតែតស៊ូរហូតដល់ទីបញ្ចប់ទើបអាចឈរជើងបានយូរនៅក្នុងពិភពប្រដាល់ ខណៈសង្វៀនក្នុងស្រុកកំពុងត្រូវការកីឡាករដែលមានសមត្ថភាពក្នុងការផ្តល់ឱកាសឱ្យឡើងប្រកួតអន្តរជាតិដូចជាសង្វៀន CBS ជាដើម ៕
ចែករំលែកព័តមាននេះ