ADផ្ទាំងផ្សព្វផ្សាយពាណិជ្ជកម្ម

ឆេះក្បែររបងពន្ធនាគារព្រៃស…ផ្អើលទាំងពលរដ្ឋ និងអ្នកទោស (មានវីដេអូ)

5 ឆ្នាំ មុន

ភ្នំពេញ
២៥ ខែ មករា ឆ្នាំ ២០១៩ ម៉ោង ១៥:២០

រាជធានីភ្នំពេញ ៖ ជនមិនស្គាល់មុខបានដុតស្មៅនៅលើដីវាល បណ្ដាលឲ្យមានការឆាបឆេះយ៉ាងសន្ធោសន្ធៅ និងឆេះរាលដាលដល់ឃ្លាំងស្តុកអេតចាយមួយកន្លែងដែលនៅជាប់របងពន្ធនាគារព្រៃស ។ ហេតុការណ៍នេះបង្កឲ្យមានការភ្ញាក់ផ្អើលដល់អ្នកភូមិព្រមទាំងអ្នកទោសផងដែរ ហើយភ្លាមៗនោះ នគរបាលបាននាំយករថយន្តពន្លត់អគ្គីភ័យចំនួន៣គ្រឿងទៅបាញ់ពន្លត់ទើបរលត់ទៅវិញទាំងស្រុង។ ហេតុការណ៍នោះបានកើតឡើងកាលពីវេលាម៉ោង១១ព្រឹកថ្ងៃទី២៥…

ហេតុការណ៍នេះបង្កឲ្យមានការភ្ញាក់ផ្អើលដល់អ្នកភូមិព្រមទាំងអ្នកទោសផងដែរ ហើយភ្លាមៗនោះ នគរបាលបាននាំយករថយន្តពន្លត់អគ្គីភ័យចំនួន៣គ្រឿងទៅបាញ់ពន្លត់ទើបរលត់ទៅវិញទាំងស្រុង។

ហេតុការណ៍នោះបានកើតឡើងកាលពីវេលាម៉ោង១១ព្រឹកថ្ងៃទី២៥ ខែមករា ឆ្នាំ២០១៩ នៅជិតពន្ធនាគារព្រៃស ស្ថិតនៅតាមផ្លូវលំ ក្នុងភូមិកំរៀងសង្កាត់ព្រៃស ខណ្ឌដង្កោ រាជធានីភ្នំពេញ។

តាមប្រភពព័ត៌មានបានឲ្យដឹងថា នៅមុនពេលកើតហេតុ មានជនមិនស្គាល់មុខលួចធ្វើសកម្មភាពដុតស្មៅនៅដីវាល ត្រង់ចំណុចកើតហេតុខាងលើ ដែលជាហេតុបណ្ដាលឲ្យមានភ្លើងឆាបឆេះយ៉ាងសន្ធោសន្ធៅ ហើយបានឆេះរាលដាលដល់ឃ្លាំងស្តុកអេតចាយយ៉ាងឆាប់រហ័ស។

ពេលនោះបានបង្កឲ្យមានការភ្ញាក់ផ្អើលយ៉ាងខ្លាំងដល់អ្នកភូមិ និងអ្នកទោសនៅក្នុងពន្ធនាគារព្រៃស ហើយភ្លាមៗនោះនគរបាលខណ្ឌដង្កោបានចេញអន្តរាគមន៍ ហើយក៏មានរថយន្តពន្លត់អគ្គីភ័យចំនួន៣គ្រឿងទៅពន្លត់ទើបរលត់ទៅវិញ ក្រោយពេលកើតហេតុរយៈពេលកន្លះម៉ោងប៉ុណ្ណោះ។

អ្នកភូមិនិយាយថា រដូវនេះគឺជារដូវប្រាំងដែលបណ្ដាលឲ្យស្មៅងាប់ ហើយកន្លងមកតែងមានជនមិនស្គាល់មុខដុតស្មៅងាប់ៗតាមវាលស្រែលេង ប៉ុន្តែមិនដែលបង្កឲ្យឆាបឆេះដល់ផ្ទះអ្នកភូមិណាមួយឡើយ ទើបតែពេលនេះជនមិនស្គាល់មុខបានលួចដុតស្មៅជិតឃ្លាំងស្តុកអេតចាយខាងលើ ក៏បណ្ដាលឲ្យមានការឆាបឆេះរាលដល់ឃ្លាំងស្តុកអេតចាយបង្កការភ្ញាក់ផ្អើលបែបនេះតែម្ដង ប៉ុន្តែមិនទាន់ដឹងថាទំហំនៃការខូចខាតប៉ុណ្ណានៅឡើយទេ៕