រាជធានីភ្នំពេញ ៖ សម្តេចក្រឡាហោម ស ខេង ឧបកនាយករដ្ឋមន្ត្រីរដ្ឋមន្ត្រីក្រសួងមហាផ្ទៃបានប្រកាសជាថ្មីថា បានទទួលដីកាតុលាការ ដើម្បីចាប់ខ្លួនលោក សម រង្ស៊ី…
រាជធានីភ្នំពេញ ៖ សម្តេចក្រឡាហោម ស ខេង ឧបកនាយករដ្ឋមន្ត្រីរដ្ឋមន្ត្រីក្រសួងមហាផ្ទៃបានប្រកាសជាថ្មីថា បានទទួលដីកាតុលាការ ដើម្បីចាប់ខ្លួនលោក សម រង្ស៊ី អតីតប្រធានគណបក្សសង្គ្រោះជាតិ ប្រសិនវិលចូលខ្មែរវិញ ។
ការប្រកាសនេះស្របពេលដែលលោក សម រង្ស៊ី បានប្រកាសចូលស្រុកវិញ នៅឆ្នាំ២០១៩នេះ ។ សម្តេច ស ខេង បានលើកឡើងលើបណ្តាញសង្គម កាលពីថ្ងៃទី២៤ មករា ឆ្នាំ២០១៩ ថា ថ្មីៗនេះក្នុងការផ្សាយរបស់វិទ្យុអាស៊ីសេរី លោក សម រង្ស៊ី បាននិយាយចោទប្រកាន់មួលបង្កាច់មកលើថ្នាក់ដឹកនាំគណបក្សប្រជាជនកម្ពុជា ជាពិសេសមកលើរូបខ្ញុំ អំពីដំណើរការដោះស្រាយបញ្ហានយោបាយកម្ពុជានាពេលកន្លងមក ។
សម្តេចបានបញ្ជាក់ថា« ការលើកឡើងរបស់លោក សម រង្ស៊ី ដែលនិយាយថា ខ្ញុំបានហាមឃាត់គាត់មិនឲ្យវិលត្រឡប់មកប្រទេសវិញនោះ គឺជាពាក្យសម្តីមួលបង្កាច់ ដើម្បីបិទបាំងភាពកំសាក រត់គេចចេញពីសំណាញ់ច្បាប់របស់ខ្លួនតែប៉ុណ្ណោះ ។ ក្នុងនាមជាអ្នកដែលចូលរួមក្នុងឆាកនយោបាយ ខ្ញុំដូចជា មិនដល់ថ្នាក់ឆោតល្ងង់ប្រាប់ សម រង្ស៊ី មិនឲ្យវិលចូលស្រុកនោះទេ ។
ប្រការនេះខុសទាំងស្រុងពីច្បាប់រដ្ឋធម្មនុញ្ញ និងអាចផ្តល់ឱកាសគ្រប់ពេលវេលាឲ្យសម រង្ស៊ី មានលេសវាយប្រហារមកលើរូបខ្ញុំវិញនៅពេលដែលសមត្ថកិច្ចបានទទួលដីកា ដើម្បីចាប់ខ្លួន សម រង្ស៊ី រួចហើយ» ។ សម្តេចបញ្ជាប់«ខ្ញុំសូមបញ្ជាក់ថា លោក សម រង្ស៊ី បានប្រព្រឹត្តបទល្មើសជាច្រើន និងត្រូវបានតុលាការផ្តន្ទាទោសរួចហើយ ។ ទណ្ឌិតរូបនេះសម្រេចរត់គេចខ្លួនមិនចូលប្រទេសដោយខ្លួនឯង ហើយការត្រឡប់ចូលប្រទេសវិញ ឬយ៉ាងណានោះវាស្ថិតនៅលើបុគ្គល សម រង្ស៊ី ខ្លួនឯងតែប៉ុណ្ណោះ គ្មានអ្នកណាហាមឃាត់ឡើយ ។
ការចេញដីកាចាប់ខ្លួនទណ្ឌិត សម រង្ស៊ី គឺត្រូវបានប្រកាសជាសាធារណៈ ហើយការបញ្ជាក់របស់ខ្ញុំ ចំពោះសារព័ត៌មាន និងសាធារណមតិជាតិ និងអន្តរជាតិ អំពីដីកាចាប់ខ្លួននេះ គឺធ្វើឡើងជាសាធារណៈដែលមិនមានអ្វីជាអាថ៌កំបាំងឡើយ» ។
សម្តេចក៏បានលើកឡើងថា ការដែលសម រង្ស៊ី និយាយថា ខ្ញុំមានការលំបាកធ្វើការជាមួយ និងសម្តេចអគ្គមហាសេនាបតីតេជោ ហ៊ុន សែន នោះ គឺជារឿងភូតកុហកបោកប្រាស់សុទ្ធសាធ ប្រការនេះ សម រង្ស៊ី ចង់ឲ្យសាធារណមតិមានការភ័ន្តច្រលំមកលើរូបខ្ញុំ និងជាល្បិចកលនយោបាយរបស់លោក សម រង្ស៊ី ខ្លួនឯងតែប៉ុណ្ណោះ ។ សម្តេចបានបន្ថែមថា ធាតុពិត គឺ សម រង្ស៊ី ទេដែលខ្ញុំពិបាកធ្វើការជាមួយ ។
ជាក់ស្តែងនៅល្ងាចថ្ងៃទី១៦ ខែកញ្ញា ឆ្នាំ២០១៣ ខ្ញុំដែលតំណាងឲ្យគណបក្សប្រជាជនកម្ពុជា រីឯលោក សម រង្សី តំណាងឲ្យគណបក្សសង្គ្រោះជាតិ ។ ខ្ញុំនិង សម រង្ស៊ី បានជជែកគ្នាតាមទូរស័ព្ទ អំពីសេចក្តីព្រាងកិច្ចព្រមព្រៀងមួយរវាងគណបក្សទាំងពីរ ។ ខ្ញុំបានសុំយោបល់ថ្នាក់ដឹកនាំគណបក្សប្រជាជនកម្ពុជា ពិសេសសម្តេចតេជោ ហ៊ុន សែន ។ ខ្ញុំនិងសម រង្ស៊ី បានឯកភាពទាំងស្រុង ហើយសង្ឃឹមថា នៅព្រឹកថ្ងែទី១៧ ខែកញ្ញា ឆ្នាំ២០១៣ នឹងបានចុះហត្ថលេខា ទៅលើកិច្ចព្រមព្រាងនោះនៅក្នុងកិច្ចប្រជុំនៅមន្ទីររដ្ឋសភា ។ ប៉ុន្តែផ្ទុយពីការរំពឹងទុកពេលចាប់ផ្តើមភ្លាម កឹម សុខា បានជំទាស់នឹងសេចក្តីព្រាងនោះទាំងស្រុងដែលនាំឲ្យកិច្ចចចារត្រូវបរាជ័យ ហើយពួកគេងាកទៅរកប្រមូលកម្លាំងប្រជាជនធ្វើបាតុកម្មប្រឆាំងលទ្ធផលបោះឆ្នោត និងធ្វើបដិវត្តន៍ពណ៌ជាបន្តទៀត ។ បញ្ហានេះទេ ដែលបញ្ជាក់ថា សម រង្សី ជាមនុស្សពិបាកធ្វើការនិយាយបាតដៃជាខ្នងដៃមិនទៀងត្រង់ក្រឡិចក្រឡុចមិនទទួលខុសត្រូវ និងអាចនិយាយបានថា គឺ សម រង្ស៊ី ទេ ជាអ្នកបោកខ្ញុំ ។
សម្តេចបានគូសបញ្ជាក់ថា« ខ្ញុំសូមបញ្ជាក់ថា ខ្លួនខ្ញុំផ្ទាល់បានរួមការងារជាមួយសម្តេចអគ្គមហាសេនាបតីតេជោ ហ៊ុន សែន គ្រប់កាលទេស ដើម្បីដោះស្រាយបញ្ហាជាតិជាង៤០ឆ្នាំកន្លងមកហើយ ។ ជោគជ័យនៃការបោះឆ្នោតអាណ្តិតទី៦ កន្លងទៅនេះបានបញ្ជាក់យ៉ាងច្បាស់តាមរយៈនូវការឯកភាពខ្ពស់ និងភាពកាន់តែរឹងមាំនៃគណបក្សប្រជាជនកម្ពុជា»៕
ចែករំលែកព័តមាននេះ