ខេត្តកំពង់ឆ្នាំង ៖ ប្រជាពលរដ្ឋរស់នៅស្រុកកំពង់លែងពិសេសអ្នកប្រកបមុខរបរ រត់រ៉ឺម៉កម៉ូតូ និងម៉ូតូឌុបនៅមាត់កំពង់ទឹក ឃុំកំពង់ហៅ មានសេចក្តីរីករាយក្រៃលែង និងថ្លែងអំណរគុណដល់អាជ្ញាធរស្រុក អាជ្ញាធរខេត្តដែលបានធ្វើផ្លូវបេតុងមួយខ្សែប្រវែងជាង៥០០ម៉ែត្រ ក្នុងឃុំកំពង់ហៅ…
ខេត្តកំពង់ឆ្នាំង ៖ ប្រជាពលរដ្ឋរស់នៅស្រុកកំពង់លែងពិសេសអ្នកប្រកបមុខរបរ រត់រ៉ឺម៉កម៉ូតូ និងម៉ូតូឌុបនៅមាត់កំពង់ទឹក ឃុំកំពង់ហៅ មានសេចក្តីរីករាយក្រៃលែង និងថ្លែងអំណរគុណដល់អាជ្ញាធរស្រុក អាជ្ញាធរខេត្តដែលបានធ្វើផ្លូវបេតុងមួយខ្សែប្រវែងជាង៥០០ម៉ែត្រ ក្នុងឃុំកំពង់ហៅ ស្រុកកំពង់លែង សម្រាប់សម្រួលដំណើរដល់ប្រជាពលរដ្ឋក៏ដូចជាអ្នកប្រកបមុខរបរដឹកទំនិញជាដើម ។
ប្រជាពលរដ្ឋអ្នករត់ម៉ូតូកង់បី និងរត់ម៉ូតូឌុបបានឲ្យដឹងថា កន្លងទៅផ្លូវមួយខ្សែចាប់ពីចំណុចមុខវត្តពោធិ៍អណ្ដែត ចុះមកមាត់កំពង់ដរ ក្នុងភូមិកំពង់ហៅ ឃុំកំពង់ហៅ គឺជួបការលំបាកខ្លាំងណាស់សូម្បីតែឡើងចំណោតក៏ពិបាកដែរ ។ ម្យ៉ាងវិញទៀតនៅពេលរដូវទឹកសម្រកម្ដងៗផ្លូវទីនេះមានភក់ល្បាប់ពិបាកធ្វើដំណើរ ។
ប៉ុន្តែក្រោយពីការសាងសង់ផ្លូវបេតុងមួយខ្សែដែលមានទំហំយ៉ាងធំរួចមកពួកគាត់រត់ម៉ូតូបានស្រួលទោះបីក្នុងរដូវទឹកស្រកឬក៏ទឹកឡើងមានកម្ពស់ត្រឹម១តឹក ២តឹកក្តី ក៏អាចធ្វើដំណើរក្នុងទឹកបានដែរ ហើយជាងនេះទៅទៀតចំណុចមុខវត្តពោធិ៍អណ្ដែតជាផ្លូវចោតខ្ពស់ដែលពិបាកក្នុងដឹកទំនិញឡើង ចុះនៅពេលធ្វើផ្លូវហើយពួកគាត់ជាអ្នករត់រ៉ឺម៉កម៉ូតូអាចដឹកទម្ងន់បានជាង១តោនកន្លះឯណោះ ។
ជុំវិញសមិទ្ធផលថ្មីមួយនេះដែរលោក សំ ចាន់ថន អភិបាលស្រុកកំពង់លែងបានផ្ដល់កិច្ចសម្ភាសន៍ជាមួយភ្នាក់ងារ កោះសន្តិភាព ថាផ្លូវបេតុងមួយខ្សែចាប់ពីចំណុចមុខវត្តពោធិ៍អណ្តែតចុះដល់មាត់កំពង់ដរកំពង់ហៅនេះគឺជាថវិការបស់រាជរដ្ឋាភិបាលដែលបានកសាងរួចរាល់ជាស្ថាពរហើយ ប៉ុន្តែមិនទាន់ដាក់សម្ភោធអោយប្រើប្រាស់នៅឡើយ ផ្លូវនេះមានប្រវែងជាង៥៥៣ម៉ែត្រ មានទទឹង៦ម៉ែត្រ ។
ប្រជាពលរដ្ឋដែលធ្វើដំណើរតាមផ្លូវនេះមិនមែនតែអ្នកស្រុកកំពង់លែងនោះទេ ដែលសប្បាយរីករាយអ្នកធ្វើដំណើរឆ្លងកាត់ស្រុកកំពង់លែងទៅខេត្តកំពង់ធំក៏សប្បាយរីករាយដែរ ព្រោះតែបានផ្លូវបេតុងមួយខ្សែនេះបានស្រួលមិនលំបាកឆ្លងកាត់ភក់ដូចមុនទៀតទេ ។
គួរបញ្ជាក់ផងដែរថា មាត់កំពង់ដរចម្លងនៅភូមិកំពង់ហៅ ឃុំកំពង់ហៅ គឺជាកន្លែងលិចទឹក៦ខែ និងគោក ៦ខែ ។ នៅពេលរដូវទឹកស្រកម្តងៗបានសល់ល្បាប់ភក់ពិបាកធ្វើដំណើរខ្លាំងណាស់ ។ ប៉ុន្តែក្រោយពេលធ្វើផ្លូវបេតុងហើយពួកគាត់អាចធ្វើដំណើរបានស្រួល ជាក់ស្តែងដូចកាលពីរដូវសម្រកកន្លងទៅពេលទឹកស្រកផុតលេចចេញផ្លូវបេតុងកម្លាំងនគរបាលនៃអធិការដ្ឋានគរបានស្រុកកំពង់លែងគ្រាន់តែប្រើរថយន្តពន្លត់អគ្គីភ័យរបស់អធិការដ្ឋានមកជួយបាញ់ទឹកលាងសំអាតលើផ្លូវបេតុងគឺបានផ្លូវស្អាតវិញហើយ ៕
ចែករំលែកព័តមាននេះ