សម្តេចតេជោ ៖ រង់ចាំការវិលត្រឡប់ចូលស្រុកលោក សម រង្ស៊ី យ៉ាងអន្ទះសារ
- ភ្នំពេញ
ខេត្តកំពត ៖ ទំនងសំដៅទៅកាន់លោក សម រង្ស៊ី សម្តេចតេជោហ៊ុន សែន នាយករដ្ឋមន្ត្រី អះអាងថា រង់ចាំយ៉ាងអន្ទះសារចំពោះការវិលចូលស្រុករបស់លោក…
ខេត្តកំពត ៖ ទំនងសំដៅទៅកាន់លោក សម រង្ស៊ី សម្តេចតេជោហ៊ុន សែន នាយករដ្ឋមន្ត្រី អះអាងថា រង់ចាំយ៉ាងអន្ទះសារចំពោះការវិលចូលស្រុករបស់លោក សម រង្ស៊ី អតីតប្រធាន គណបក្សសង្គ្រោះជាតិ នៅពេលខាងមុខនេះ ។
ការលើកឡើងរបស់សម្តេចតេជោនេះខណៈដែលថ្នាក់ដឹកនាំអតីតគណបក្សសង្គ្រោះជាតិបានសម្រេចរៀបចំយុទ្ធសាស្ត្រឲ្យលោក សម រង្ស៊ី ចូលមកស្រុកវិញ នៅពេលខាងមុខនេះ ។ សម្តេចតេជោ ហ៊ុន សែន បានលើកក្នុងពិធីជួបសំណេះសំណាលជាមួយកម្មកម្មការិនីជាង១ម៉ឺននាក់ នៅខេត្តកំពត នាព្រឹកថ្ងៃទី២៥ ខែមករា ឆ្នាំ២០១៩ យ៉ាងដូច្នេះថា «ខ្ញុំរង់ចាំពេលមួយនឹងមកដល់ជំនួបនោះនឹងមកដល់ បើសិនអ្នកឯងចប់ជួបពិត បើសិនអ្នកឯងចង់ជួបពិតប្រកាសទៅអ្នកណារង់ចាំកន្លែងព្រលានយន្តហោះណា អង្គការសហប្រជាជាតិអមដំណើរពេលណា កន្លែងណាធ្វើទៅអញ្ជើញ!» ។
សម្តេចក៏បានលើកយ៉ាងដូច្នេះថា«តើហ៊ុនសែនចាត់ការរបៀបណា ខ្ញុំអត់ចង់តមាត់តកអីទេ! ព្រោះខ្ញុំឲ្យអ្នកមកទីកន្លែងដែលអ្នកត្រូវនៅតាមសាលក្រមរបស់តុលាការខ្ញុំរង់ចាំយ៉ាងអន្ទះសារ អ្នកត្រូវដឹងសាលក្រមតុលាការ»។ ជាមួយគ្នានោះដែរសម្តេចក៏បានឲ្យដឹងខាងក្រសួងមហាផ្ទៃបានទទួលសាលដីកាចាប់ខ្លួនអ្នកដឹងហើយ (សម រង្ស៊ី) ស្តាយណាស់ដែលឲ្យអ្នកឯងរតរួច ហើយបើអ្នកឯងមកវិញ គឺស្នើនឹង «ដើររកអុសប្រទះឈើងាប់»ផ្តាំទៅ។
សម្តេចគូសបញ្ជាក់ថា «ផ្តាំទៅ! ហើយអ្នកដែលមិនពាក់ព័ន្ធមិនចង់ចូលគុកកុំចង់ចូលប្រថុយជាមួយ ។ ប៉ុន្តែខ្ញុំហ៊ាន«!» អានេះព្រឹបឈ្លូសជាគ្នា» ។ ជាមួយគ្នានោះដែរ សម្តេចតេជោក៏បានអះអាងថា សម្តេចបានកាន់តំណែងជានាយករដ្ឋមន្ត្រីអស់រយៈពេល៣៤ឆ្នាំមកហើយ ។
ចំពោះអ្នកដែលស្រែកថា កាន់អំណាចនេះបានអស់នេះអស់នោះ សុំសាកគិតមើលឡើងវិញ ។ សម្តេចបញ្ជាក់ថា «របបលន់ ណុលកាន់អំណាចបានជាង៥ឆ្នាំប៉ុលពតកាន់អំណាចសាហាវឃោរឃៅប្រើអាវុធបានកាន់អំណាចបាន៣ឆ្នាំ៨ខែ និង២០ ថ្ងៃ ហ៊ុន សែន កាន់តំណែងសរុប៤០ឆ្នាំ ប៉ុន្តែតំណែងស្នួលអំណាចខ្ពស់៣៤ឆ្នាំ ហើយបូក និង៥ឆ្នាំហើយបន្ត៥ទៀតអ្នកឯងចាំមើលទៅ» ។
សម្តេចតេជោក៏បានលើកឡើងថា បើ ហ៊ុន សែន គ្មានប្រជាជនគាំទ្រនោះទេ ហ៊ុន សែន មិនអាចមកឈរនៅទីនេះបានទេ ។ អ្នកខ្លះថា ហ្វេសប៊ុក ហ៊ុនសែន នៅពេលបង្ហោះទៅមាន មនុស្សមើលពីរនាក់ ។
សូមជម្រាបថា លោក សម រង្ស៊ី បានប្រកាសជាច្រើនលើកច្រើនសារលោកនឹងចូលមកស្រុកខ្មែរវិញ នៅក្នុងឆ្នាំ២០១៩នេះ ប៉ុន្តែមិនដឹងថ្ងៃណាច្បាស់លាស់នោះទេ ។ គណៈកម្មាធិការអចិន្ត្រៃយ៍គណបក្សសង្គ្រោះជាតិកាលពីថ្មីៗកន្លងមកនេះបានរៀបចំឲ្យមានដំណើរវិលចូលស្រុករបស់លោកប្រធាន សម រង្ស៊ី ដោយធ្វើនយោបាយកៀគរចំនួន៥ចំណុចរួមមានទី១-រៀបចំកម្លាំង ដើម្បីត្រៀមទទួលលោកសម រង្ស៊ី ចូលស្រុកវិញ ។ ទី២- ពង្រីកសកម្មភាពការទូតច ។ ទី៣- ពង្រឹង និងពង្រីកការផ្សព្វផ្សាយព័ត៌មានក្រោមការគ្រប់របបហ៊ុន សែន ។ ទី៤-ធ្វើទំនាក់ទំនងជាមួយអ្នកប្រជាធិបតេយ្យជាមួយគណបក្សសង្គ្រោះជាតិ ដើម្បីធ្វើផ្លាស់ប្តូរជាវិជ្ជាមាន នៅឆ្នាំ២០១៩នេះ ។ ទី៥- រៀបចំថវិកាសម្រាប់ការវិលចូលរបស់លោក សម រង្ស៊ី» ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាបានលើកឡើងនៅថ្ងៃទី២៥ មករានេះថា ទន្ទឹមនឹងការទទួលបរាជ័យផ្ទួនៗជាបន្តបន្ទាប់ឥតឈប់ឈរទណ្ឌិត សម រង្សី មានការប្រែប្រួលស្ទើរទាំងស្រុង ។ លោកទឹកមុខស្លេកស្លាំងលែងមានឈាមលែងមានសំណើច និងញញឹមស្រស់ដូចពី២០ឆ្នាំមុនបានសេចក្តីថា សើច និងញញឹមសិប្បនិម្មិតយ៉ាងសោះកក្រោះហាក់ដីខែប្រាំងគ្មានសំណើម ។
លោកបន្តថា លោកសម រង្ស៊ី មានអាកប្បកិរិយាមានលក្ខណៈសោះកក្រោះល្មើយហាក់អស់កម្លាំងផ្លូវចិត្ត និងកម្លាំងកាយ ជាពិសេស គឺអស់សង្ឃឹមតែម្តង លើការងារនយោបាយដែលខិតខំអស់រយៈពលជាង២០ឆ្នាំហើយ អត់បានលទ្ធផលអីសោះ ។ នេះជាលទ្ធផលនៃ នយោបាយខ្វះឧត្តមគតិ និងប្រជាជនព្រមទាំងអាស្មិមានៈដែលទណ្ឌិត សម រង្ស៊ី បានប្រព្រឹត្ត ៕
ចែករំលែកព័តមាននេះ