នៅក្នុងវាលវដ្តសង្សារនេះ គ្មានអ្វីជាទីពឹងក្រៅពីព្រះធម៌ឡើយ មានតែព្រះធម៌ប៉ុណ្ណោះ ដែលធ្វើឱ្យកក់ក្តៅក្នុងជីវិត ព្រោះព្រះធម៌បានស្ថាបនាមនុស្ស ដែលធ្លាប់តែអន់ថយទន់ ទាប ដោយត្រកូល ឬដោយទ្រព្យជាដើម ឱ្យបានជាមនុស្ស ប្រសើរខ្ពង់ខ្ពស់ រហូតដល់ថ្នាក់ទេវតាប្រណម្យអញ្ជលីសំពះថ្វាយបង្គំទៀតផង ។
ព្រះធម៌តែងស្ថិតនៅក្នុងលោកនេះជានិច្ចមិនបានឃ្លាតទៅណាឡើយ មាន តែសត្វលោកទេ ដែលចេះតែលះបង់ព្រះធម៌ចោល ហើយលាចាកលោកនេះទៅ ។ ព្រះធម៌មានអានុភាពរកអ្វីប្រៀបពុំបានឡើយ សូមសត្វលោកទុកចិត្តលើព្រះធម៌ចុះ នឹងបានល្អជាងការទុកចិត្តក្នុងអ្វីៗទាំងអស់ ។
ព្រះដ៏មានព្រះភាគទ្រង់បានទេសនាអប់រំពុទ្ធបរិស័ទឱ្យតម្កល់ខ្លួនដោយប្រពៃក្នុងគុណធម៌ សព្វៗកាល ទោះបីជួបប្រទះនូវសេចក្តីទុក្ខលំបាកយ៉ាងណាក៏ដោយ ក៏កុំចោលព្រះធម៌ឱ្យសោះ ព្រោះការដែលយើងមាននូវព្រះធម៌ តាំងនៅក្នុងខ្លួនបានមាំមួនហើយនោះ យើងរឹងរឹតតែចេះសម្លឹងមើលបុគ្គល និងហេតុការណ៍ផ្សេងៗបានល្អឡើង ។
ចែករំលែកព័តមាននេះ