ខេត្តព្រះវិហារ ៖ ទំនប់បង្ហៀរទឹក៩៥ចាប់ផ្តើមកែសម្រួលឡើងវិញអាចឲ្យអ្នកទេសចរងូតទឹកលេងកម្សាន្តបានដូចមុននៅពេលរដូវវស្សាខាងមុខបន្ទាប់ពីទំនប់នេះត្រូវបានដុះកកពេញដោយរុក្ខជាតិកំប្លោកកាលពីឆ្នាំមុនធ្វើឲ្យតំបន់រមណីយ៍ដ្ឋានមួយនេះបាត់បង់ភ្ញៀវទេសចរទៅលេងកម្សាន្ត ។ លោក ចាប កុយ ប្រធានមន្ទីរធនធានទឹក និងឧតុនិយម ខេត្តព្រះវិហារបានឲ្យដឹងនៅព្រឹកថ្ងៃទី២៤…
ខេត្តព្រះវិហារ ៖ ទំនប់បង្ហៀរទឹក៩៥ចាប់ផ្តើមកែសម្រួលឡើងវិញអាចឲ្យអ្នកទេសចរងូតទឹកលេងកម្សាន្តបានដូចមុននៅពេលរដូវវស្សាខាងមុខបន្ទាប់ពីទំនប់នេះត្រូវបានដុះកកពេញដោយរុក្ខជាតិកំប្លោកកាលពីឆ្នាំមុនធ្វើឲ្យតំបន់រមណីយ៍ដ្ឋានមួយនេះបាត់បង់ភ្ញៀវទេសចរទៅលេងកម្សាន្ត ។
លោក ចាប កុយ ប្រធានមន្ទីរធនធានទឹក និងឧតុនិយម ខេត្តព្រះវិហារបានឲ្យដឹងនៅព្រឹកថ្ងៃទី២៤ ខែមករា ឆ្នាំ២០១៩ ថាមន្ទីរជំនាញបានចាប់ផ្តើមកែសម្រួលឡើងវិញនូវទំនប់បង្ហៀរទឹក៩៥នេះចាប់ពីពាក់កណ្តាលខែធ្នូ ឆ្នាំ២០១៨ កន្លងទៅដោយប្រើប្រាស់គ្រឿងចក្រកាយយករុក្ខជាតិកំប្លោកដែលដុះពេញលើផ្ទៃទំនប់បង្ហៀរទឹកនេះដើម្បីចាក់ដីលុបបំពេញ និងជួសជុលធ្វើឲ្យទំនប់បង្ហៀរទឹកនេះលែងកកស្ទះ និងលែងឲ្យមានរុក្ខជាតិកំប្លោកនេះដុះឡើងវិញនោះទេ ។
ម្យ៉ាងវិញទៀតមន្ទីរជំនាញបានជួលជុស និងរៀបចំកន្លែងបង្ហៀរទឹកនេះអាចឲ្យមានកន្លែងសម្រាប់ភ្ញៀវទេសចរដែលចូលមកលេងកម្សាន្តនៅក្នុងតំបន់រមណីយ៍ដ្ឋានទំនប់៩៥នេះបានងូតទឹកលេងកម្សាន្តដូចពេលមុនដែរ ។ លោករំពឹងថា នៅក្នុងរយៈពេល១៥ថ្ងៃខាងមុខទៀត ការជួសជុលកែលម្អប្រព័ន្ធបង្ហៀរទឹកទំនប់៩៥នេះនឹងធ្វើឲ្យរួចរាល់តែម្តង ។
អ្នកស្រី ទេព រុន ជាអាជីវករលក់ដូរនៅរមណីយ៍ដ្ឋានទំបន់៩៥នេះបានសម្តែងនូវការសប្បាយរីករាយបន្ទាប់ពីអាជ្ញាធរបានរៀបចំកែលម្អតំបន់នេះឡើងវិញ ជាពិសេសបានរៀបចំឲ្យមានកន្លែងលេងទឹកវិញសម្រាប់ភ្ញៀវទេសចរដែលមកកម្សាន្តនៅតំបន់នេះ ។
អ្នកស្រីសង្ឃឹមថា នៅពេលដែលទំនប់នេះមានកន្លែងងូតទឹកលេងកម្សាន្តដូចមុនវិញនោះភ្ញៀវទេសចរនឹងមានការកើនឡើងវិញជាមិនខានឡើយ ម្យ៉ាងវិញទៀតអាចឲ្យពួកគាត់រកចំណូលសម្រាប់ផ្គត់ផ្គង់ជីវភាពគ្រួសារបានធូរស្រាលមួយកម្រិតទៀត ។
អ្នកស្រីលើកឡើងទៀតថា កាលពីពេលដែលទំនប់នេះមិនទាន់មានការដុះកកដោយរុក្ខជាតិកំប្លោកនោះឃើញថាភ្ញៀវទេសចរណ៍តែងតែមកលេងកម្សាន្តក្នុងមួយថ្ងៃៗរាប់រយអ្នកអាចឲ្យពួកគាត់រកចំណូលបានក្នុង១ថ្ងៃជាមធ្យម៦០ម៉ឺនរៀល ដោយឡែកនៅពេលមានបុណ្យទានម្តងៗភ្ញៀវកើនឡើងរាប់ពាន់នាក់ឯណោះ ។
សូមបញ្ជាក់ថា ការជួសជុលកែសម្រួលឡើងវិញនូវទំនប់បង្ហៀទឹក៩៥ ក្រុងព្រះវិហារបានចាប់ផ្តើមពីពាក់កណ្តាលខែធ្នូ ឆ្នាំ២០១៨ រហូតមកដល់បច្ចុប្បនេះសម្រេចបាន៦០%ហើយ និងសម្រេចឲ្យរួចរាល់នៅពាក់កណ្តាលខែកុម្ភៈខាងមុខនេះដោយចំណាយថវិការបស់អាជ្ញាធរខេត្តព្រះវិហារ ៕
ចែករំលែកព័តមាននេះ