ថាមែនៗ អន្តរាគមន៍នៅគុកPJលែងទាំងយប់…ថៅកែនិងគ្រូពេទ្យ«ឌែម៉ូគ្លីនិក»
- ភ្នំពេញ
រាជធានីភ្នំពេញ ៖ សេចក្តីរាយការណ៍បានឲ្យដឹងថា ទីបំផុត បានដោះលែងចេញពីពន្ធនាគារហើយ កាលពីយប់ថ្ងៃទី២៤ មករា លើអ្នកស្រី ហូវ ដាណេ…
រាជធានីភ្នំពេញ ៖ សេចក្តីរាយការណ៍បានឲ្យដឹងថា ទីបំផុត បានដោះលែងចេញពីពន្ធនាគារហើយ កាលពីយប់ថ្ងៃទី២៤ មករា លើអ្នកស្រី ហូវ ដាណេ ជាថៅកែមជ្ឈមណ្ឌលកែសម្ផស្ស «ឌែម៉ូគ្លីនិក» រួមទាំងស្ត្រីឈ្មោះពៅ ស៊ីណាត ជាអ្នកគ្រូពេទ្យជំនាញខាងដេរប្រដាប់ភេទម្នាក់ទៀត ។
បើតាមប្រភពពីពន្ធនាគារបានឱ្យដឹងទៀតថា នៅយប់នោះ គេបានឃើញមេធាវីការពារក្តីឱ្យអ្នកស្រី ហូវ ដាណេ និងគ្រូពេទ្យជំនាញដេរប្រដាប់ភេទ បានដើរកាន់ដីកាចេញដោយចៅក្រមសាលាដំបូងរាជធានីភ្នំពេញ យកទៅជួបមន្ត្រីរដ្ឋបាលពន្ធនាគារប៉េហ្ស៊ី បន្ទាប់មកបានដោះលែងទាំងពីរខាងលើតែម្តង ។
ប្រភពបន្តថា បន្ទាប់ពីពន្ធនាគារទទួលបានដីកាដោះលែងភ្លាម ក៏ត្រូវអនុរក្សពន្ធនាគារយកដីកានោះទៅធ្វើការដោះលែងអ្នកស្រី ហូវ ដាណេ ជាបន្ទាន់ ដែលកំពុងសម្រាកនៅមន្ទីរពេទ្យរុស្សី និងបានធ្វើការដោះលែង ស្ត្រីជាគ្រូពេទ្យដេរប្រដាប់ភេទនៅពន្ធនាគារប៉េហ្ស៊ីទាំងយប់ផងដែរ ។
គួរបញ្ជាក់ថា កាលពីវេលាម៉ោង២ និង១៥នាទីរសៀល ថ្ងៃទី៥ មករា ២០១៩ លោក ម៉ុង មុនីសោភា ចៅក្រមស៊ើបសួរសាលាដំបូងរាជធានីភ្នំពេញ បានសម្រេចឃុំខ្លួនអ្នកស្រី ហូវ ដាណេ ថៅកែមជ្ឈមណ្ឌលកែសម្ផស្សឌែម៉ូគ្លីនិក និងស្ត្រីឈ្មោះ ពៅ ស៊ីណាត ជាអ្នកគ្រូពេទ្យជំនាញខាងដេរប្រដាប់ភេទអតិថិជន ដាក់ពន្ធនាគារ(ប៉េហ្ស៊ី)ជាបណ្តោះអាសន្ន។
ចៅក្រមស៊ើបសួរសម្រេចឃុំខ្លួនអ្នកស្រីទាំងពីរនាក់ខាងលើ យោងតាមការចោទប្រកាន់ពីសំណាក់ ស្ថាប័នអយ្យការ។ គួរបញ្ជាក់កាលពីវេលាម៉ោង១០ និង១០នាទីព្រឹក ថ្ងៃទី០៤ មករា ត្រូវបានកម្លាំង សមត្ថកិច្ចកងរាជអាវុធហត្ថលើផ្ទៃប្រទេស បញ្ជូនទៅកាន់សាលាដំបូងរាជធានីភ្នំពេញ ពាក់ព័ន្ធលើបណ្តឹងថា បានគំរាមបង្ហោះរូបភាពដេរប្រដាប់ភេទ អតិថិជនលើសង្គមហ្វេសប៊ុក ជាថ្នូរ នឹងការទាមទារប្រាក់រាប់ម៉ឺនដុល្លារអាមេរិក។ សំណុំរឿងនេះបានស្ថិតនៅដៃលោក សឿន មុនីរ័ត្ន ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ធ្វើការសាកសួរ។
នារសៀលថ្ងៃដដែលនេះ តំណាងអយ្យការបានសម្រេចធ្វើការចោទប្រកាន់ អ្នកស្រីទាំង២ជាផ្លូវការ និងបានរៀបចាត់បញ្ជូនទៅ ចៅក្រមស៊ើបសួរ ដើម្បីសម្រេចឃុំខ្លួនដាក់ពន្ធនាគារជាបណ្តោះអាន្ន។ តំណាងអយ្យការបានចោទប្រកាន់ អ្នកស្រី ហូវ ដាណេ ថៅកែមជ្ឈមណ្ឌលកែសម្ផស្សឌែម៉ូគ្លីនិក និងស្ត្រីឈ្មោះ ពៅ ស៊ីណាត ជាគ្រូពេទ្យជំនាញដេរប្រដាប់ភេទចំនួន៣បទល្មើស សុទ្ធតែជាបទល្មើសព្រហ្មទណ្ឌ។ បទល្មើសទី១.បទប៉ះពាល់ដល់សិទ្ធិខាងរូបភាព នៃបុគ្គល តាមមាត្រា៣០២ នៃក្រមព្រហ្មទណ្ឌ បទល្មើសទី២.បទកំហែងយក តាមមាត្រា៣៦៣ និងមាត្រា៣៦៤ នៃក្រមព្រហ្មទណ្ឌ និងបទល្មើសទី៣.បទការគំរាមកំហែងហែកកេរ្តិ៍ តាមមាត្រា២៧២ និងមាត្រា២៧៣ នៃក្រមព្រហ្មទណ្ឌ។
យោងលើមាត្រា៣០២ នៃក្រមព្រហ្មទណ្ឌបានចែងថា អំពើថតរូបភាព នៃបុគ្គលនៅទីកន្លែងឯកជន ដោយគ្មានការព្រមព្រៀងពីបុគ្គលនេះទេ ត្រូវផ្ដន្ទាទោសដាក់ពន្ធនាគារពី១ខែទៅ១ឆ្នាំ និងពិន័យជាប្រាក់ ពី១សែន ទៅ២លានរៀល លើកលែងតែករណីដែលច្បាប់អនុញ្ញាត។
មាត្រា៣៦៣ នៃក្រមព្រហ្មទណ្ឌ ចែងថា អំពើកំហែងយកគឺជាអំពើដែលប្រព្រឹត្តដោយការប្រើហិង្សា ការគំរាមកំហែងថានឹងប្រើហិង្សា ឬដោយការបង្ខិតបង្ខំ ដើម្បីទទួលបាននូវហត្ថលេខា ឬស្នាមមេដៃ ការសន្យា ឬការបោះបង់ចោលអ្វីមួយ ការបង្ហាញអាថ៌កំបាំងណាមួយការប្រគល់មូលនិធិតម្លៃ ឬទ្រព្យសម្បត្តិអ្វីមួយ។ មាត្រា៣៦៤ អំពើកំហែងយកត្រូវផ្ដន្ទាទោសដាក់ពន្ធនាគារពី២ឆ្នាំទៅ៥ឆ្នាំ និងពិន័យជាប្រាក់ពី៤លាន ទៅ១០លានរៀល។
មាត្រា៣៧២ នៃក្រមព្រហ្មទណ្ឌបានចែងថា អំពើគំរាមកំហែងហែកកេរ្តិ៍ គឺជាអំពើប្រព្រឹត្តដោយការគំរាមកំហែងបើកកកាយ ឬទម្លាក់កំហុសដែលនាំឲ្យប៉ះពាល់ដល់កិត្តិយស ការរាប់អាន ដើម្បីទទួលបាននូវហត្ថលេខា ឬស្នាមមេដៃ ការសន្យា ការបង្ហាញអាថ៌កំបាំងណាមួយ ការប្រគល់មូលនិធិតម្លៃ ឬទ្រព្យសម្បត្តិអ្វីមួយ។
មាត្រា៣៧៣ បានចែងឲ្យផ្ដន្ទាទោសដាក់ពន្ធនាគារ ពី២ឆ្នាំទៅ៥ឆ្នាំ និងពិន័យជាប្រាក់ពី៤លានទៅ១០លានរៀល។ ថៅកែមជ្ឈមណ្ឌលកែសម្ផស្សឌែម៉ូគ្លីនិក ត្រូវបានកម្លាំងសមត្ថកិច្ចកងរាជអាវុធហត្ថលើផ្ទៃប្រទេស ឃាត់ខ្លួនកាលពីថ្ងៃទី២ មករា ពាក់ព័ន្ធលើបណ្តឹង របស់អតិថិជនចោទថា គំរាមទារប្រាក់រាប់ម៉ឺនដុល្លារអាមេរិក ក្រោមរូបភាពបង្ហោះសកម្មភាព និងរូបភាពដេរប្រដាប់ភេទអតិថិជន ។
ចែករំលែកព័តមាននេះ