រាជធានីភ្នំពេញ ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានអះអាងថា គិលានុបដ្ឋាក គិលានុបដ្ឋាយិកាកម្ពុជានឹងទទួលបានទីផ្សារការងារក្នុងកម្រិតអន្តរជាតិ និងប្រាក់កម្រៃខ្ពស់នៅជប៉ុន ។
លោកអ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈថ្លែងក្នុងពិធីសម្ពោធជាផ្លូវការក្រុមហ៊ុន ជេ អិល អេស ខេមបូឌាន និងសិក្ខាសាលាស្តីពីការស្វែងយល់ និងឱកាសការងារផ្នែកគិលានុបដ្ឋាកនៅប្រទេសជប៉ុន កាលពីថ្ងៃទី២៤ ខែមករា ឆ្នាំ២០១៩ នៅសណ្ឋាគារសូហ្វីតែលភូកេត្រា រាជធានីភ្នំពេញថា នេះជាឱកាសថ្មីមួយទៀតដល់និស្សិតដែលកំពុងសិក្សាផ្នែកគិលានុបដ្ឋាកតាមគ្រឹះស្ថានសិក្សានានាទទួលបានទីផ្សារការងារក្នុងកម្រិតអន្តរជាតិទទួលបានប្រាក់កម្រៃខ្ពស់ ពិសេសរួមចំណែកជាមួយរាជរដ្ឋាភិបាលកម្ពុជាក្នុងការស្វែងរកការងារជូនប្រជាពលរដ្ឋតាមរយៈការពង្រីកទីផ្សារការងារ និងលើកស្ទួយមុខមាត់ប្រទេសកម្ពុជានៅក្នុងតំបន់ក៏ដូចជា សាកលលោក ។
លោកបានបន្តថា ការបណ្តុះបណ្តាលបន្ថែម ដើម្បីបំពេញតាមស្តង់ដាជប៉ុនដល់បេក្ខជន បេក្ខនារី និងការសិក្សាភាសា និងវប្បធម៌ប្រពៃណីជនជាតិជប៉ុននឹងជួយពង្រឹងគុណភាពលើការបណ្តុះបណ្តាលគិលានុបដ្ឋាកគិលានុបដ្ឋាយិកាកម្ពុជាក៏ដូចជា ទាក់ទាញចំណាប់អារម្មណ៍របស់ក្មេងជំនាន់ក្រោយៗ ឲ្យចាប់អារម្មណ៍លើជំនាញនេះកាន់តែខ្លាំងក្លា ដើម្បីបំពេញនូវតម្រូវការទីផ្សារការងារជាលក្ខណៈអន្តរជាតិ ។
បុគ្គលិកដែលចប់កិច្ចសន្យាការងារហើយ ត្រឡប់មកធ្វើការក្នុងស្រុកវិញនឹងក្លាយជាធនធានដ៏ល្អមួយដោយពួកគេនឹងយកចំណេះ និងបទពិសោធន៍ពីការងារនៅប្រទេសជប៉ុនមកជួយពង្រឹងវិស័យសុខាភិបាលក្នុងស្រុក ។ លោករដ្ឋមន្ត្រីក៏បានអំពាវនាវដល់សារធារណជនទាំងអស់ ពិសេសសិស្ស និស្សិត អតីតនិស្សិតដែលបានរៀនចប់ និងកំពុងស្វែងរកការងារ ឬកំពុងធ្វើការផ្នែកគិលានុបដ្ឋាក សូមសិក្សាស្វែងយល់ពីឱកាសការងារនៅប្រទេសជប៉ុនពាក់ព័ន្ធនឹងជំនាញគិលានុបដ្ឋាកនេះអោយបានច្រើន ។
បច្ចុប្បន្នក្រសួងបាននឹងកំពុងសហការជាមួយមន្ត្រីជំនាញនៃប្រទេសជប៉ុន ដើម្បីពិនិត្យ និងរៀបចំឱ្យមានកិច្ចព្រមព្រៀងសហប្រតិបត្តិការជាមួយគ្នាក្នុងគោលបំណង ដើម្បីបង្កើនទីផ្សារការងារ និងឱកាសការងារដល់ប្រជាជនកម្ពុជា ។ ដោយជប៉ុនបានចាប់ផ្តើមរៀបចំបង្កើតឱ្យមានគម្រោងថ្មីសម្រាប់បង្កើនលំហូរនៃកម្លាំងពលកម្មពីប្រទេសផ្សេងៗ និងសម្រាប់អនុវត្តនៅអំឡុងខែមេសា ឆ្នាំ២០១៩ខាងមុខនេះ ដើម្បីដោះស្រាយបញ្ហាកង្វះកម្លាំងពលកម្មជំនាញនៅជប៉ុន ។
ទន្ទឹមនឹងនេះរាជរដ្ឋាភិបាលក៏បានផ្តោតការយកចិត្តទុកដាក់ខ្ពស់បំផុត ក្នុងការគាំពារ ការការពារសិទ្ធ និងផលប្រយោជន៍ពលករខ្មែរយើងនៅបរទេស តាមរយៈកិច្ចសហប្រតិបត្តិការជាមួយរដ្ឋាភិបាលនៃប្រទេសទទួល និងការពង្រឹងការអនុវត្តច្បាប់ និងបទដ្ឋាននានា ដោយប្រើប្រាស់គោលការណ៍យន្តការ និងនីតិវិធីស្របតាមបទដ្ឋានអន្តរជាតិ ។
លោករដ្ឋមន្ត្រីក៏បានឲ្យដឹងថា ក្រសួងការងារ និងបណ្តុះបណ្តាលវិជ្ជាជីវៈកំពុងបន្តខិតខំពង្រឹងការអនុវត្តឱ្យស្របទៅតាមកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ ដែលក្នុងនោះមានចែងអំពីការបន្តពង្រឹងអភិបាលកិច្ចទេសន្តរប្រវេសន៍ការងារ និងពង្រីកកិច្ចសហប្រតិបត្តិការពហុភាគី និងទ្វេភាគី ដើម្បីបើកទូលាយទីផ្សារការងារស្របច្បាប់នៅក្រៅប្រទេស, ទប់ស្កាត់ទេសសន្តរប្រវេសន៍ការងារដោយខុសច្បាប់, លើកកម្ពស់ការគាំពារសិទ្ធិ និងផលប្រយោជន៍ សុខភាព និងសុវត្ថិភាពការងារ, កិត្តិយស និងសេចក្តីថ្លៃថ្នូររបស់ពលករ ការផ្តល់ការសម្របសម្រួលទំនាក់ទំនងជាមួយគ្រួសារ និងការធ្វើសមាហរណកម្មពលករទេសន្តរប្រវេសន៍ ដែលធ្វើមាតុភូមិនិវត្ត តាមរយៈការទទួលស្គាល់ជំនាញ, ការផ្ទេររបបសន្តិសុខសង្គមមកក្នុងប្រទេស, ការផ្តល់ប្រឹក្សាការងារធ្វើ និងការបង្កើតមុខរបរដោយខ្លួនឯង ។
គូសបញ្ជាក់ថា បច្ចុប្បន្នទីភ្នាក់ងារជ្រើសរើសឯកជនមានចំនួន១០៥ ដែលក្នុងនោះទីភ្នាក់ងារជ្រើសរើសឯកជនដែលទទួលអាជ្ញាបណ្ណអនុញ្ញាតអោយធ្វើការជ្រើសរើសបណ្តុះបណ្តាល បញ្ជូន និងគ្រប់គ្រងពលករទៅធ្វើការនៅក្រៅប្រទេស ដែលក្នុងនោះមានទីភ្នាក់ងារជ្រើសរើសចំនួន៩៣ ដែលទទួលបានអាជ្ញាបណ្ណអនុញ្ញាតពីក្រសួងអោយធ្វើការជ្រើសរើសបណ្តុះបណ្តាល បញ្ជូន និងគ្រប់គ្រងកម្មសិក្សាការីទៅធ្វើការនៅប្រទេសជប៉ុន ។ គិតត្រឹមខែធ្នូ ឆ្នាំ២០១៨ កម្ពុជាបានបញ្ជូនកម្មសិក្សាការី សរុបចំនួន ៩,១៩៥នាក់ ទៅធ្វើកម្មសិក្សា និងធ្វើការនៅប្រទេសជប៉ុន ដោយពលករម្នាក់ៗទទួលបានប្រាក់ឈ្នួលជាមធ្យមប្រមាណ ១,៥០០ដុល្លារ សហរដ្ឋអាមេរិកក្នុងមួយខែ៕
ចែករំលែកព័តមាននេះ