រាជធានីភ្នំពេញ ៖ បុរសជាយោធាពាក់ផ្កាយ១ម្នាក់បានជិះម៉ូតូធ្វើដំណើរតាមផ្លូវស្រាប់តែជ្រុលទៅបុកនឹងរថយន្តបែនដឹកដីដែលបើកចូលក្រុមហ៊ុន ហើយរយ៉ែថយក្រោយ បណ្តាលឱ្យដួលបែកក្បាលបាក់កស្លាប់ភ្លាមៗនៅនឹងកន្លែង កាលពីនៅម៉ោង៨និង៣០នាទីយប់ ថ្ងៃទី២៤ ខែមករា ឆ្នាំ២០១៩ ទល់មុខក្រុម…
រាជធានីភ្នំពេញ ៖ បុរសជាយោធាពាក់ផ្កាយ១ម្នាក់បានជិះម៉ូតូធ្វើដំណើរតាមផ្លូវស្រាប់តែជ្រុលទៅបុកនឹងរថយន្តបែនដឹកដីដែលបើកចូលក្រុមហ៊ុន ហើយរយ៉ែថយក្រោយ បណ្តាលឱ្យដួលបែកក្បាលបាក់កស្លាប់ភ្លាមៗនៅនឹងកន្លែង កាលពីនៅម៉ោង៨និង៣០នាទីយប់ ថ្ងៃទី២៤ ខែមករា ឆ្នាំ២០១៩ ទល់មុខក្រុម ហ៊ុន CTM ផ្លូវ៥០ម៉ែត្រ ភូមិប្រការ សង្កាត់ព្រៃស ខណ្ឌដង្កោ ។
ជនរងគ្រោះខាងលើមានឈ្មោះ ម៉ន ឡុង ភេទប្រុស អាយុ៥២ឆ្នាំ មុខរបរយោធា ឋានន្តរសក្តិឧត្តមសេនីយ៍ត្រី (ផ្កាយ១) បំរើការនៅអង្គភាពសេនាធិការដ្ឋានកងអន្តរាគមន៍ អគ្គបញ្ជាការ ស្នាក់នៅផ្ទះលេខ២៤ ផ្លូវលំ ភូមិប្រការ សង្កាត់ព្រៃស ខណ្ឌដង្កោ ជិះម៉ូតូម៉ាកហុងដាឌ្រីម ស៊េរីឆ្នាំ២០១៨ ពណ៌ខ្មៅ ពាក់ស្លាកលេខ ភ្នំពេញ 1GS 7033 ។ ដោយឡែកខាងរថយន្តបង្កម៉ាកហ៊ីយ៉ាន់ដាយ ពណ៌ក្រហម ពាក់ស្លាកលេខ ព្រះស៊ីហនុ 3A 1851 បើកបរដោយបុរសមិនស្គាល់អត្តសញ្ញាណ បានរត់គេចខ្លួនបាត់ ។
តាមប្រភពពីសាច់ញាតិជនរងគ្រោះ បានឱ្យដឹងថា មុនកើតហេតុ ជនរងគ្រោះជិះម៉ូតូចេញពីផ្ទះមិត្តភក្តិគោលបំណងទៅផ្ទះវិញនៅភូមិប្រការសង្កាត់ព្រៃស ខណ្ឌដង្កោ ដោយធ្វើដំណើរតាមផ្លូវ៥០ម៉ែត្រពីត្បូងទៅជើង លុះមកដល់ចំណុចកើតហេតុស្រាប់តែមានរថយន្តបែនដឹកដីបានបើកចូលទៅក្នុងក្រុមហ៊ុន ហើយបានរ៉ឺយ៉ែថយក្រោយវិញ ទើបម៉ូតូជិះលឿនមកក៏ជ្រុលទៅបុកគូថពីក្រោយ បណ្តាលឱ្យខ្ទាតម៉ូតូអូសចេញពីរថយន្ត៣០ម៉ែត្រ ព្រមទាំងធ្វើជនរងគ្រោះដួលបែកក្បាលបាក់.កស្លាប់នៅនឹងកន្លែងតែម្តង ។
តាមប្រភពពីអ្នកឃើញហេតុការណ៍ឱ្យដឹងថា មុនកើតហេតុ គេបានឃើញរថយន្តខាងលើបានបើកបត់ចូលក្រុមហ៊ុន ហើយបានស៊ីប្លេឱ្យអ្នកខាងក្នុងបើកទ្វារ ស្របពេលនោះដែរស្រាប់តែបុរសរងគ្រោះខាងលើជិះម៉ូតូក្នុងល្បឿនលឿន ព្រមទាំងដៃម្ខាងជាប់និយាយទូរស័ព្ទផងនោះទើបបណ្តាលម៉ូតូជ្រុលទៅនឹងគូថក្រោយរថយន្តបែបនេះ ចំណែកអ្នកបើកបរក៏ចុះពីលើរថយន្តរត់គេចខ្លួនបាត់ ។
ក្រោយពេលកើតហេតុ ឃើញកម្លាំងសមត្ថកិច្ចមូលដ្ឋាន និងជំនាញចរាចរណ៍ខណ្ឌដង្កោ បានចុះទៅកន្លែងកើតហេតុ រួចហើយក៏ទំនាក់ទំនងហៅក្រុមគ្រួសារឱ្យមកកន្លែងកើតហេតុ ព្រមទាំងធ្វើលិខិតប្រគល់សពជនរងគ្រោះទៅក្រុមគ្រួសារយកធ្វើបុណ្យតាមប្រពៃណីនៅផ្ទះជនរងគ្រោះផ្ទាល់ ។ ចំណែករថយន្ត និងម៉ូតូត្រូវបានសមត្ថកិច្ចចុះទៅធ្វើការវាស់វែងយកទៅរក្សាទុកនៅការរិយាល័យចរាចរណ៍ជើងគោករាជធានីភ្នំពេញ ដើម្បីរង់ចាំធ្វើការដោះស្រាយនៅពេលក្រោយ ៕
ចែករំលែកព័តមាននេះ