រាជធានីភ្នំពេញ ៖ សំណុំរឿងនៃការស្លាប់របស់អ្នកស្រី ចេវ សុវឌ្ឍនា អ្នកមេម៉ាយកូន៣រូបស្រស់ ដែលម្តងថា ជារឿងអត្តឃាតដោយចង.ក ម្តងថាជាអំពើឃាតកម្ម ដោយស្នាដៃប្រុសស្នេហ៍អតីតអភិបាលខេត្តតាកែវ លោក ឡាយ វណ្ណៈ នាព្រឹកថ្ងៃទី២៣ មករា សាលាដំបូងរាជធានី បានលើកយកសំណុំរឿងនេះមកបើកសវនាការជំនុំជម្រះ ។
អង្គសវនាការនេះ ដឹកនាំដោយលោក ហម ម៉េងសែ អនុប្រធានសាលាដំបូងរាជធានី និងជាប្រធានក្រុមប្រឹក្សាជំនុំជម្រះ លោក ប្លង់ សុផល ព្រះរាជអាជ្ញារងតំណាងអយ្យការអមសាលាដំបូង និងជាដើមបណ្តឹងលើសំណុំរឿងព្រហ្មទណ្ឌមួយនេះ ។ ជនជាប់ចោទក្នុងសំណុំរឿងនេះ មាន៤នាក់ ត្រូវបាននាំមកឈរមុខក្រចកសេះ ដើម្បីឆ្លើយបំភ្លឺជំុវិញការសាកសួរដេញដោល លើសំណុំរឿងឃាតកម្មដែលលាន់ខ្ទ័រខ្ទារប៉ុន្មានខែកន្លងមកនេះ ។
ជនជាប់ចោទមាន១-លោក ឡាយ វណ្ណៈ អតីតអភិបាលខែត្តតាកែវ ២-លោក ឡាយ ណារិទ្ធ អតីតស្នងការរងនគរបាលខេត្តតាកែវ (ពីរនាក់បងប្អូន) ជាប់ចោទពីបទឃាតកម្ម តាមមាត្រា១៩៩ នៃក្រមព្រហ្មទណ្ឌ ។ ៣-ឈ្មោះ ម៉េន សាម៉ៃ អ្នកបើកបររថយន្តឲ្យលោក ឡាយ វណ្ណៈ និង៤-ឈ្មោះ ជឹម សាវុធ ជាអ្នកបម្រើផ្ទះអ្នកស្រី ចេវ សុវឌ្ឍនា ជាប់ចោទពីបទ លាក់បាំងតម្រុយតាមមាត្រា ៥៣២នៃក្រមព្រហ្មទណ្ឌ។
អង្គសវនាការបានធ្វើឡើងចំពោះមុខមេធាវី៥រូប ជាមេធាវីការពារក្តីតាមទម្រង់ច្បាប់ឲ្យជនត្រូវចោទទាំង៤រូប និងចំពោះមុខដើមបណ្តឹងរដ្ឋប្បវេណី គឺឪពុកម្តាយជនរងគ្រោះ រួមទាំងសាក្សី និងសាក្សីដោះបន្ទុកលើជនជាប់ចោទផងដែរ ។ សវនាការនេះ មានការចូលរួមពីសំណាក់កម្លាំងសមត្ថកិច្ច ជាមន្ត្រីនគរបាលយុត្តិធម៌ នគរបាលបច្ចេកទេស គ្រូពេទ្យពិនិត្យសាកសពក្រសួងមហាផ្ទៃ ខេត្តតាកែវជាច្រើននាក់ទៀត ។
សវនាការនេះបានធ្វើឡើងជាសាធារណៈ មានមហាជន និងអ្នកសារព័ត៌មាន បានចូលរួមស្តាប់យ៉ាងពេញលេញ ស្របតាមនីតិវិធីអង្គជំនុំជម្រះក្តី មិនដូចសំណុំរឿងខ្លះ សូម្បីតែចូលស្តាប់ក៏មិនបានផង ដែលនោះជាសវនាការអសាធារណៈ ។ ក្នុងពេលសវនាការប្រធានក្រុមប្រឹក្សាបានសាកសួរ លើជនត្រូវចោទឈ្មោះ ឡាយ វណ្ណៈ អតីតអភិបាលខេត្តតាកែវ ហើយលោកក៏បានសារភាពជាហូរហែតាមដំណើររឿង ដែលលោកបានស្គាល់ជនរងគ្រោះ (ចេវ សុវឌ្ឍនា) ។
ជនជាប់ចោទ ឡាយ វណ្ណៈ បានលើកឡើងថា នាអំឡុងឆ្នាំ២០១៦ តាមរយៈមេគយខេត្តតាកែវម្នាក់ ដែលជាប្រធានក្រុមការងារយុវជនក្រៅប្រទេស បានធ្វើឲ្យលោកស្គាល់នាង ចេវ សុវឌ្ឍនា និងមានការរាប់អានគ្នារហូតបង្កើតជាគូស្នេហ៍លួចលាក់តែម្តង ។ ប៉ុន្តែក្តីស្រឡាញ់រវាងលោក និងអ្នកស្រីមេម៉ាយកូនបី ចេវ សុវឌ្ឍនា អស់រយៈពេលជាង១ឆ្នាំ ចេះតែមានការរកាំរកូស ជាមួយគ្នាញឹកញាប់ ដោយសារនាង សុវឌ្ឍនា មានចិត្តឆេវឆាវ និងប្រចណ្ឌច្រើន រហូតមានពេលខ្លះនាងប៉ុនប៉ងលេបថ្នាំសម្លាប់ខ្លួន គំរាមលោកមិនឲ្យទៅប្រទេសម៉ារ៉ុកជាមួយនឹងភរិយា ។
ដោយសារតែក្តីប្រចណ្ឌហួសហេតុនេះមានថ្ងៃមួយនោះលោកបានជ្រុលដៃទះកំផ្លៀងនាង២ដៃ ដោយសារខឹងនាងទៅតាមរករឿងដល់ផ្ទះឪពុកក្មេក និងចោទថាលោកមានស្រីលាក់នៅក្នុងផ្ទះ ។ លុះដល់ថ្ងៃទី២៥ និងថ្ងៃទី២៦ ខែមីនា ឆ្នាំ២០១៨ លោកមានទំនាស់ជាពាក្យសម្ដីតិចតួចជាមួយនាងរឿងបង្ខំឲ្យលោកទៅរស់នៅក្នុងផ្ទះជាមួយគ្នាដូចប្តីប្រពន្ធតែម្ដង ហើយនាងក៏បានស្នើសុំលោក(ពីរចំណុច) ទី១-សុំឲ្យស្រឡាញ់នាងដូចមុន និងទី២-សុំធ្វើជាប្រពន្ធទី២ ស្របច្បាប់ ។
សវនាការបានទុកពេលឲ្យជនជាប់ចោទ ឡាយ វណ្ណៈ បរិយាយហូរហែដំណើររឿងពីដើមរហូតដល់ចប់ ដោយពុំមានការសាកសួរធ្វើឱ្យអាក់ខាន ក្នុងការរៀបរាប់របស់លោក ឡាយ វណ្ណៈ ទេ ដែលលោកបន្តថា ការស្នើសុំ និងការចង់បានពីរចំណុចខាងលើនេះបានធ្វើឲ្យលោក និងនាងមានការខ្វែងគំនិតគ្នា ។ ចំណុចទី១-លោកទទួលយកបាន និងកំពុងអនុវត្តពោលគឺក្តីស្រឡាញ់មិនប្រែប្រួល និងកាន់តែស្រឡាញ់ហើយអាណិតនាងទៀត នៅពេលដឹងថា នាងជាស្ត្រីមេម៉ាយរស់នៅរកសុីចិញ្ចឹមកូន៣នាក់ ។ ចំណុចទី២-លោកថា មិនទាន់អាចទទួលយកបានទេ រង់ចាំពេលវេលា ដោយខ្លាចប្រពន្ធដើមមិនព្រម ។ ចំណុចទី២-នេះ នាងមិនត្រូវចាប់បង្ខំលោកឲ្យធ្វើតាមភ្លាមនោះទេ ។
លុះដល់ថ្ងៃទី២៦ ខែមីនា ពេលចេញពីប្រជុំលោកក៏បានឲ្យអ្នកបើកបរជូនលោកទៅផ្ទះនាង សុវឌ្ឍនា ដើម្បីហូបបាយជុំគ្នា ប៉ុន្តែពេលទូរស័ព្ទទៅស្រាប់តែវឌ្ឍនាបានទៅភ្នំពេញទៅហើយ ដោយសារនាងយល់ច្រឡំថាមកហូបបាយនៅផ្ទះនាងបឹងស្នោ សង្កាត់និរោធ ខណ្ឌច្បារអំពៅ តែនាងក៏បានមកវិញជាមួយឈ្មោះ ចាន់ រី និងប្ដីអ្នកបម្រើក្នុងផ្ទះ ។
ពេលមកដល់ជួបគ្នាព្រលប់ថ្ងៃដដែលនោះ លោកនិងនាងបាននិយាយគ្នាម្ដងទៀត ប៉ុន្តែនិយាយគ្នាមិនត្រូវសោះលោកក៏ត្រឡប់ទៅវិញ ពេលនោះនាង សុវឌ្ឍនា បាននិយាយពីលើជណ្ដើរមកថា បើថ្ងៃនេះបងចេញផុតពីមាត់ទ្វារផ្ទះ បងនឹងលែងបានជួបមុខអូនរហូត ។ ទោះជាបែបណា លោកនៅតែដើរចេញទៅឡើងរថយន្តជិះទៅធម្មតា ។ លុះពេលមកដល់សួនច្បារជិតវិមានឯករាជ្យ ស្រាប់តែឈ្មោះ ចាន់ រី ទូរស័ព្ទមកប្រាប់ថា នាង សុវឌ្ឍនា បានយកកាំបិតអារដៃមានឈាមហូរក្រហមច្រាល ប៉ុន្តែគាត់ និងប្ដីបានដណ្ដើមយកកាំបិតពីនាងហើយ ។
មួយសន្ទុះក្រោយមកស្រាប់តែឈ្មោះ ចាន់ រី ទូរស័ព្ទមកម្ដងទៀតថា នាង ចេវ សុវឌ្ឍនាចងកសម្លាប់ខ្លួន ពេលនោះលោកមិនជឿទេ ហើយបានឲ្យឈ្មោះ សាម៉ៃ តៃកុងឡាន ជិះម៉ូតូទៅមើល ។ ពេលទៅដល់សាម៉ៃបានទូរស័ព្ទប្រាប់ថាបងស្រីចងកសម្លាប់ខ្លួនមែន ។ ពេលដឹងថានាងចងកសម្លាប់ខ្លួនលោកក៏មានភាពតក់ស្លុត ហើយបានប្រាប់ សាម៉ៃ ឲ្យយកទូរស័ព្ទរបស់នាងសុវឌ្ឍនា មកទុក ដោយសារក្នុងទូរស័ព្ទមានថតរូបលោកជាមួយនាងជាច្រើន ខ្លាចធ្លាក់ដល់ដៃអ្នកកាសែត ។
បន្ទាប់មកលោកក៏បានឲ្យអ្នកបើកបរម្នាក់ទៀត ជូនលោកទៅភ្នំពេញមើលកូនឈឺ និងប្រាប់រឿង សុវឌ្ឍនា ចងកសម្លាប់ខ្លួនឱ្យប្រពន្ធលោកដឹង ។ ក្នុងនោះដែរស្រាប់តែម្ដាយនាង សុវឌ្ឍនា និងកូនទី២ បានទូរស័ព្ទមកលោកប្រាប់ពីរឿង សុវឌ្ឍនា ចងកសម្លាប់ខ្លួន លោកក៏សុំប្រពន្ធត្រឡប់ទៅខេត្តតាកែវ ដើម្បីចាត់ចែងសុំយកសាកសពទៅធ្វើបុណ្យនៅភ្នំពេញ ។ រៀបរាប់ដល់ចំណុចនេះ ដល់ពេលវេលាត្រូវសម្រាកបាយថ្ងៃត្រង់ ដូច្នោះប្រធានក្រុមប្រឹក្សាជំនុំជម្រះសម្រេចផ្អាកសវនាការ ដោយលើកពេលទៅថ្ងៃក្រោយមិនកំណត់ ។ តាមការរៀបរាប់ពីសំណាក់ជនត្រូវចោទឈ្មោះ ឡាយ វណ្ណៈ គឺបានបដិសេធចំពោះការចោទប្រកាន់ ដែលថាសម្លាប់នាង គឺជាសំណុំរឿងឃាតកម្ម ប៉ុន្តែទោះជាយ៉ាងណាអាស្រ័យលើការវិនិច្ឆ័យរបស់ក្រុមប្រឹក្សាជំនុំជម្រះ ។
បានកត់សម្គល់ឃើញថា មុនពេលសាកសួរជនជាប់ចោទ ឡាយ វណ្ណៈ ក្រុមប្រឹក្សាជំនុំជម្រះ បានយកភស្តុតាងថ្មីទៀត ដែលជាការអះអាង របស់សមត្ថកិច្ចទើបដាក់ចូលមុនមួយថ្ងៃ ដែលភស្តុតាងនោះគឺទូរស័ព្ទដៃរបស់លោក ឡាយ វណ្ណៈ ១គ្រឿង និងទូរស័ព្ទរបស់អ្នកស្រី ចេវ សុវឌ្ឍនា១គ្រឿង ដែលនោះជាសារសំឡេងអ្នកទាំងពីរទាក់ទងគ្នា ។ ភស្តុងនោះត្រូវបានបង្ហាញឲ្យសាមុីខ្លួនបានឃើញ និងក៏មានការទទួលស្គាល់ផងដែរ ចំពោះមុខអង្គសវនាការ ។
មានការកត់សម្គាល់ដែរថា នៅពេលសាលាដំបូងរាជធានីភ្នំពេញ បើកសវនាការនេះ ភរិយា និងម្តាយលោក ឡាយ វណ្ណៈ ក៏បានមកតាមស្តាប់សវនាការនោះដែរ ។ ចំណែកជនជាប់ចោទឈ្មោះ ម៉េន សាម៉ៃ ពេលចុះពីរថយន្តដឹកអ្នកទោសមកពីពន្ធនាគារព្រៃសភ្លាម គេបានបង្ហូរទឹកភ្នែក និងលុតជង្គង់ថ្វាយបង្គំ ទាមទារសុំរកយុត្តិធម៌ ដោយបាននិយាយថា ពួកគាត់មិនបានដឹងអ្វីទាល់តែសោះក្នុងសំណុំរឿងនេះ ៕
ចែករំលែកព័តមាននេះ