ខេត្តកំពង់ស្ពឺ ៖ គ្រោះថ្នាក់ចរាចរណ៍មួយបានកើតឡើងរវាងរថយន្តមួយគ្រឿងបុកជាមួយម៉ូតូមួយគ្រឿង បណ្តាលអោយមានអ្នករបួសនិងស្លាប់ តែគ្មាននរណាម្នាក់ដឹងនោះទេថាមានមនុស្សស្លាប់ឡើយ គឺបានត្រឹមដឹលបញ្ជូនអ្នករបួសទៅកាន់មន្ទីពេទ្យ រហូតដល់អ្នករបួសដឹងខ្លួនសួររក ទើបនាំគ្នាទៅរកមើលឃើញសពជនរងគ្រោះម្នាក់ទៀតនៅកន្លែងកើតហេតុ។
គ្រោះថ្នាក់ចរាចរណ៍នេះកើតឡើងកាលពីវេលាម៉ោង៣និង១០នាទីទៀបភ្លឺថ្ងៃទី២៤ ខែមករា ឆ្នាំ២០១៩ លើផ្លូវជាតិលេខ៤ ចន្លោះគីឡូម៉ែត្រលេខ៧២ និងលេខ៧៣ ត្រង់ចំណុច ភូមិ តាឡាត់ចាស់ ឃុំអូរ ស្រុកភ្នំស្រួច ខេត្តកំពង់ស្ពឺ ។
ប្រភពពីសមត្ថកិច្ចបានអោយដឹងថា មានករណីគ្រោះថ្នាក់ចរាចរណ៍មួយបានកើតឡើងនៅចំណុចកើតហេតុខាងលើបង្កដោយរថយន្តមួយគ្រឿងមិនស្គាល់ម៉ាក បើកបរពីទិសខាងលិច ទៅទិសខាងកើត លុះមកដល់ចំណុចខាងលើបានបុកម៉ូតូមួយគ្រឿងម៉ាកហុងដា ធុនសេ១២៥ ពណ៌ខ្មៅ ស៊េរីឆ្នាំ២០១៤ ពាក់
ផ្លាកលេខ ភ្នំពេញ ១CG-២៩៩៤ បណ្តាលអោយអ្នករួមដំណើរម្នាក់ដែលជិះលើម៉ូតូម៉ាកហុងដា រងរបួសធ្ងន់។
បន្ទាប់ពីកើតហេតុ អ្នកបើកបររថយន្តបានបើករថយន្តគេចខ្លួនបាត់ស្រមោល បន្សល់តែជនរងគ្រោះនៅកន្លែងកើតហេតុ ហើយពេលសមត្ថកិច្ចចុះទៅដល់កន្លែងកើតហេតុ បានបញ្ជូនជនរងគ្រោះម្នាក់ទៅកាន់មន្ទីរពេទ្យដើម្បីជួយសង្គ្រោះ។
នៅព្រឹកថ្ងៃដដែល ក្រោយពីជនរងគ្រោះឈ្មោះ សាន់ សៀម ដឹងខ្លួនបានសួររកអ្នកបើកបរម៉ូតូ ទើបដឹងថា នៅមានជនរងគ្រោះម្នាក់ទៀតជាអ្នកបើកបរម៉ូតូម៉ាកហុងដាខាងលើឈ្មោះ វ៉ាន់ ដុក ភេទប្រុស អាយុ២៦ឆ្នាំ រស់នៅភូមិក្រាំងប្រស្រុក ឃុំគីរីវន្ត ស្រុកភ្នំស្រួច ខេត្តកំពង់ស្ពឺ ។
នៅវេលាម៉ោង៧និង៣០នាទីព្រឹកថ្ងៃទី២៤ មករា សមត្ថកិច្ចបានចុះស្រាវជ្រាវនៅកន្លែងកើតហេតុម្តងទៀត ទើបប្រទះឃើញសពអ្នកបើកបរម៉ូតូដែលត្រូវគេស្គាល់ឈ្មោះ វ៉ាន់ ដុក បានស្លាប់នៅចន្លោះគីឡូម៉ែត្រលេខ៧១-៧២ រីឯម៉ូតូម៉ាកហុងដាបានរងការខូចខាតធ្ងន់។
ក្រោយពេលកើតហេតុ ម៉ូតូត្រូវបានសមត្ថកិច្ចប្រគល់ជូនក្រុមគ្រួសារវិញ ចំណែកសពជនរងគ្រោះត្រូវបានក្រុមគ្រួសារដឹកយកទៅធ្វើបុណ្យតាមប្រពៃណី ។ ករណីខាងលើនេះ សមត្ថកិច្ចជំនាញកំពុងស្រាវជ្រាវរកអ្នកបើកបររថយន្តបង្ក ដើម្បីចាប់ខ្លួនយកមកចាត់ការតាមនីតិវិធី ៕
ចែករំលែកព័តមាននេះ