ខេត្តស្ទឹងត្រែង ៖ មន្ត្រីរដ្ឋបាលព្រៃឈើម្នាក់ បានរងការគំរាមកំហែង ក្នុងអពើបាញ់បោះ វាយកម្ទេចរថ
យន្ត និងប្រើប្រាស់រូបភាពបង្កគ្រោះថ្នាក់ចរាចរណ៍ ប្រសិនបើមិនព្រមដោះដូររថយន្តចំនួន២គ្រឿង ដែលជាមធ្យោបាយក្នុងបទល្មើស ហើយត្រូវកម្លាំងនគរបាលប្រឆាំងបទល្មើសសេដ្ឋកិច្ចស្នងការនគរបាលខេត្តបានចាប់កាលពីថ្ងៃទី១៨ មករា កន្លងមក ស្ថិតនៅចំណុចបេងធំ ភូមិអូរប្ញស្សីកណ្តាល ឃុំអូរប្ញស្សីកណ្តាល ស្រុកសៀមបូក។
គួររំលឹកថា កាលពីថ្ងៃទី១៨ មករា កម្លាំងនគរបាលការិយាល័យប្រឆាំងបទល្មើសសេដ្ឋកិច្ចស្នងការដ្ឋាននគរបាលខេត្តស្ទឹងត្រែង ក្រោមបញ្ជាពីអភិបាលខេត្ត ឱ្យធ្វើការបង្ក្រាបដោយរឹបអូសបានរថយន្តសាំយ៉ុងចំនួន២គ្រឿង មានផ្ទុកឈើកកោះប្រភេទលេខ១ ចំនួន៣៨សន្លឹក ស្មើជាង៥ម៉ែត្រគូបត្រីគុណ ។
ក្រោយការបង្ក្រាបរឹបអូសវត្ថុតាងបទល្មើសខាងលើ ក្រោមការសម្របសម្រួលពីព្រះរាជអាជ្ញាកម្លាំងនគរបាលប្រឆាំងបទល្មើសសេដ្ឋកិច្ច បានប្រគល់ជូនរដ្ឋបាលព្រៃឈើរក្សាទុកជាសម្បត្តិរដ្ឋនៅខណ្ឌរដ្ឋបាលព្រៃឈើ ។ ចំណែករថយន្តជាមធ្យោបាយបម្រើឱ្យបទល្មើសរដ្ឋបាលព្រៃឈើ ផ្តល់លទ្ធភាពឱ្យម្ចាស់ចូលខ្លួនបង់ផាកពិន័យតាមច្បាប់ពីរដ្ឋបាលព្រៃឈើ ។
ក្រោយការចាប់រឹបអូសវត្ថុតាងទាំងនោះ លុះកាលពីរំលងអធ្រាត្រឈានចូលថ្ងៃទី២៤ មករា ម្ចាស់ឈើនិងជាម្ចាស់រថយន្ត បានទូរស័ព្ទទៅគំរាមកំហែងមន្ត្រីរដ្ឋបាលព្រៃឈើ ដោយប្រើប្រាស់វិធីបាញ់បោះ វាយកម្ទេចរថយន្ត ម៉ាកហាយឡែនឌ័រ កម្មសិទ្ធផ្ទាល់ខ្លួន មន្ត្រីរដ្ឋបាលព្រៃឈើ និងប្រើប្រាស់វិធីបង្ករគ្រោះថ្នាក់ចរាចរណ៍ជាដើម ។
លោក សុខ សីុដា មន្ត្រីខណ្ឌរដ្ឋបាលព្រៃឈើខេត្តស្ទឹងត្រែង បានបញ្ជាក់ទៀតថា លោក គឹម វុទ្ធី ហៅធីកាប៉ូ ភេទប្រុស អាយុ៤៥ឆ្នាំ រស់នៅខេត្តក្រចេះ បានទូរស័ព្ទមកកាលពីវេលាម៉ោង៣ និង៦០នាទីថ្ងៃទី២៤ មករាបានគំរាមកំហែងសម្លាប់ និងមានបំណងបំផ្លាញនូវរថយន្តរបស់លោក ដោយបញ្ជាក់ថា «បើចង់សុខខ្លួន និងមិនចង់ប៉ះពាល់អីនោះ ត្រូវតែដោះដូរជាថ្នូរហ្នឹងរថយន្ត២គ្រឿង ដែលក្រុមការងារជំនាញ សហការជាមួយក្រុមចម្រុះចាប់ឃាត់នៅចំណុចបេងធំ ភូមិឃុំអូរឬស្សីកណ្តាល កន្លងទៅមកវិញ ។
លោកបន្តថា ពេលនេះលោកបានដាក់ពាក្យបណ្តឹងទៅតុលាការពីបទប៉ុនប៉ងមនុស្សឃាត ដោយគ្រោងទុក ជាមុនហើយដើម្បីរក្សាសុវត្ថិភាពផ្ទាល់ខ្លួន ប្រសិនជាកើតគ្រោះថ្នាក់ដោយប្រការណាមួយនោះ ។
ព័ត៌មានបន្ថែមនឹងមានផ្សាយជូនបន្ត ។
ចែករំលែកព័តមាននេះ