ប្រទេសស្វ៊ីស ៖ ភ្នាក់ងារសារព័ត៌មាន Reuters បានរាយការណ៍ឲ្យដឹងកាលពីថ្ងៃទី២៤ មករា ថានាយកផ្នែកប្រតិបត្តិការក្រុមហ៊ុន Facebook អ្នកស្រី Sheryl Sandberg បាននិយាយកាលពីថ្ងៃពុធ ថាក្រុមហ៊ុនរបស់អ្នកស្រីត្រូវតែបង្កើនជំនឿចិត្តរបស់សាធារណៈជនបន្ទាប់ពីឆ្លងកាត់រឿងរំលោភសិទ្ធិឯកជនរបស់អ្នកប្រើប្រាស់ ។
អ្នកស្រីបាននិយាយក្នុងបទសម្ភាសន៍មួយថា ក្រុមហ៊ុននេះកំពុងតែវិនិយោគថវិការាប់ប៊ីលានដុល្លារក្នុងមួយឆ្នាំដើម្បីធ្វើឲ្យសន្តិសុខកាន់តែល្អប្រសើរជាងមុន ។
ក្រុមហ៊ុនបច្ចេកវិទ្យានេះស្ថិតក្នុងចំណោមក្រុមហ៊ុនធំៗនៅ Sillicon Valley របស់សហរដ្ឋអាមេរិក ប៉ុន្តែតម្លៃភាគហ៊ុនរបស់ពួកគេបានធ្លាក់ចុះដល់ទៅ ៣៣% មកហើយតាំងពីខែកក្កដា មកស្មើ១៤៤ដុល្លារប៉ុណ្ណោះព្រោះតែកង្វល់ទាក់ទិននឹងសិទ្ធិឯកជនរបស់អ្នកប្រើប្រាស់ ។
កាលពីឆ្នាំមុនក្រុមហ៊ុននេះទទួលបានការរិះគន់បន្ទាប់ពីបានប្រទះឃើញថាក្រុមហ៊ុនប្រឹក្សាយោបល់ Cambridge Analytica បានយកទិន្នន័យរបស់អ្នកប្រើប្រាស់ Facebook រាប់លាននាក់នៅសហរដ្ឋអាមេរិកដើម្បីធ្វើការផ្សព្វផ្សាយទាក់ទិននឹងការបោះឆ្នោត ។
ម្ចាស់ភាគហ៊ុនធំៗរបស់ Facebook មួយចំនួនថែមទាំងបានបង្ខំឲ្យលោក Mark Zuckerberg ឲ្យចុះចេញពីតំណែងជាអគ្គនាយកក្រុមហ៊ុនថែមទៀតផង ប៉ុន្តែអ្នកស្រី Sandberg បាននិយាយថា លោកគួរតែបន្តធ្វើជាទាំងអគ្គនាយក និងនាយកប្រតិបត្តិរបស់ក្រុមហ៊ុន ។
លើសពីនេះទៅទៀត អ្នកស្រីបានបន្ថែមទៀតថា ប្រសិនបើ Facebook ត្រូវផ្លាស់ប្តូរគំរូអាជីវកម្ម និងចាប់ផ្តើមយកថ្លៃសេវាប្រើប្រាស់ និងឈប់យកប្រាក់ចំណូលពីការផ្សាយពាណិជ្ជកម្មនោះអ្នកប្រើប្រាស់នឹងចាប់ផ្តើមឈប់ប្រើប្រាស់ Facebook ៕
ចែករំលែកព័តមាននេះ