បើយើងជាមេគ្រួសារត្រូវបម្រើគ្រួសារដោយចិត្តស្មោះ ធ្វើការងារដោយសេចក្ដីអត់ធន់ ព្យាយមតាំងចិត្តក្នុងការងារជានិច្ច កាលបើការងាររីកចម្រើនទៅមុខ ក្រុមគ្រួសារក៏ចម្រើន។ ពេលសម្រាកអំពីការងាររបស់អង្គភាពហើយ ត្រូវតម្រង់មុខឆ្ពោះមកផ្ទះដោយមិនវៀចវេរ មិនងាកទៅសេពកាមគុណស្រី ស្រា ពួកម៉ាកធឿនបនខិលខូច ដែលជារឿងអប្រិយនាំទុក្ខ នាំសត្រូវចូលផ្ទះសម្លាប់ប្រពន្ធកូននោះទេ ។
នៅពេលធ្វើការងារហើយ ត្រូវប្រញាប់រូតរះមកផ្ទះ ព្រោះយើងមានចំណងក្រុមគ្រួសារ មានអ្នករង់ចាំយើងនៅផ្ទះ ដូច្នេះត្រូវតែមករកអ្នករង់ចាំឱ្យលឿន ដើម្បីជួបជុំប្រពន្ធកូន និងអាចជួយធ្វើការងារផ្ទះជាមួយគ្នាដោយចិត្តភក្ដី បរិភោគបាយជាមួយគ្នាមិនមុនមិនក្រោយ។ ជាពិសេសភរិយានិងស្វាមី ដាច់ខាតប្រពន្ធមិនត្រូវបរិភោគបាយមុនប្ដីដាច់ខាត កុំអាងថា ឃ្លានណាស់ ។
ប្រពន្ធអាចបរិភោគបាយមុនប្តីបាន លើកលែងតែមានករណីចាំបាច់ ហើយក៏កុំអាងថា មិនទាន់ឃ្លានចាំបរិភោគតាមក្រោយ បណ្ដោយកូន ឬអ្នកផ្សេងឲ្យរៀបចំបាយទឹកជំនួស ដោយខ្លួនឯងមិនមានកិច្ចអ្វីចាំបាច់សោះនោះ ពិតជាមិនល្អឡើយ ។
នៅពេលបរិភោគបាយរួចបើមើលទូរទស្សន៍ក្នុងផ្ទះ ត្រូវមើលទាំងអស់គ្នា កុំបណ្តោយឱ្យកូនមើលតែឯងឱ្យសោះ ហើយត្រូវអធិប្បាយឲ្យកូនស្ដាប់ថា នេះជារឿងបុណ្យ នោះជារឿងបាប ដើម្បីឲ្យកូនស្ដាប់ទៅបានយល់ដឹងកើតកើនគំនិតល្អ ពន្យល់ផ្លូវនៃជីវិតឲ្យកូនដើរទៅរកសេចក្ដីចម្រើនកើនប្រយោជន៍ ពន្យល់ផ្លូវនៃជីវិតឲ្យមានប្រយោជន៍ ដើម្បីគ្រួសារមួយរស់នៅដោយសុភមង្គលដ៏ត្រចះត្រចង់ ។
ចែករំលែកព័តមាននេះ