រាជធានីភ្នំពេញ ៖ រដូវកាលចូលឆ្នាំប្រពៃណីចិន វៀតណាម ខិតជិតមកដល់ គេឃើញថាដើមផ្កាអង្គាសិល្ប៍ ត្រូវបានឈ្មួញដឹកយកមកពីតាមបណ្តាខេត្តចូលមកទីក្រុងភ្នំពេញ និងទីប្រជុំជនសម្រាប់លក់ក្នុងឱកាសបុណ្យចូលឆ្នាំប្រពៃណីចិន-វៀតណាមនាពេលខាងមុខនេះ ។
ជួបជាមួយលោកម៉ាប់ ជាអ្នកប្រកបរបរទិញ-លក់ដើមផ្កាអង្គាសិល្ប៍តាមរដូវកាលបានឲ្យដឹងថា រាល់ឆ្នាំឲ្យតែរដូវកាលចូលឆ្នាំប្រពៃណីចិន វៀតណាមមកដល់ គាត់តែងទៅរកទិញពីតំបន់ព្រៃភ្នំ យកមកលក់បន្តនៅទីក្រុងភ្នំពេញ ហើយសម្រាប់ឆ្នាំនេះគាត់ទៅរកទិញយកមកពីខាងស្រុកភ្នំក្រវ៉ាញ ខេត្តពោធិសាត់ ។
លោកម៉ាប់ បន្តទៀតថា ពីមួយឆ្នាំទៅមួយឆ្នាំ ការរកទិញដើមផ្កាប្រភេទនេះពីតំបន់ព្រៃភ្នំកាន់តែពិបាកទៅៗ និងមានចំងាយឆ្ងាយ ព្រោះអ្នកកាប់ពិបាកដើររក ដោយទិញដើមផ្កាអង្គាសិល្ប៍ពីតំបន់ព្រៃភ្នំមានតម្លៃថ្លៃ រួមទាំងថ្លៃឈ្នួលដឹកជញ្ជូន និងបង់ថ្លៃកុងត្រួលសមត្ថកិច្ចតាមផ្លូវច្រើនកន្លែង ពោលគឺចំណាយដើមទុនច្រើន ទំរាំតែដឹកមកដល់ទីប្រជុំជននាទីក្រុងភ្នំពេញ កាលបើលក់វិញថ្លៃពេកគ្មានអ្នកទិញ ម្ល៉ោះហើយទើបគាត់ជួបការលំបាក ។
បើតាមអ្វីដែលគេលើកឡើង និងត្អូញត្អែរ ដើមផ្កាអង្គាសិល្ប៍មានការលំបាករក ដោយសារតែតំបន់ព្រៃភ្នំ និងតំបន់មួយចំនួនក្លាយជាដីរបស់ក្រុមហ៊ុនឯកជនអស់ហើយ បើចូលទៅរកតាមដីទាំងនោះមិនបានទេ ទាល់តែទិញ ហើយចូលទៅកាប់ដោយខ្លួនឯង បើទៅស្វែងរកនៅដីព្រៃផ្សេងទៀត មានចំងាយឆ្ងាយៗ ។
ផ្កាអង្គាសិល្ប៍ត្រូវបានបងប្អូនបបបខ្មែរកាត់ចិន ឬជនជាតិចិន-វៀតណាមមានជំនឿថា ជាផ្កានាំលាភសក្ការៈជូនពួកគេនៅថ្ងៃបុណ្យចូលឆ្នាំថ្មី ទើបគេនិយមទិញផ្កាអង្គាសិល្ប៍នៅមុនថ្ងៃបុណ្យចូលឆ្នាំ១ថ្ងៃ ឬ២ថ្ងៃ ។ ដោយឡែកសម្រាប់ឆ្នាំនេះ បុណ្យចូលឆ្នាំចិននឹងត្រូវប្រារព្ធទៅនៅថ្ងៃទី៤ ខែកុម្ភៈ ឆ្នាំ២០១៩ (ថ្ងៃសែន) ។
លោក តុង សីហា មានទីលំនៅខណ្ឌសែនសុខ បានឱ្យដឹងថា ដែលជារៀងរាល់ឆ្នាំ គាត់តែងតែទិញផ្កាអង្គាសិល្ប៍ដាក់តាំងនៅផ្ទះនាថ្ងៃបុណ្យចូលឆ្នាំចិន ។ លោកបន្តទៀតថា ផ្កាអង្គាសិល្ប៍គឺស្ថិតក្នុងជំនឿអមតៈរបស់ជនជាតិចិនដោយពួកគេជឿជាក់ថា ជាផ្កានាំសំណាង ប្រសិនបើថ្ងៃចូលឆ្នាំចិន ផ្កាអង្គាសិល្ប៍រីកច្រើនល្អ គឺបានសេចក្តីថា ឆ្នាំនេះពួកគេនឹងរកស៊ីមានបាន ប្រាក់ហូរហៀរ តែប្រសិនបើផ្កានោះរីកមិនសូវល្អ ការរកស៊ីនៅឆ្នាំនេះក៏ទៅតាមនោះដែរ ៕
ចែករំលែកព័តមាននេះ