តើអ្នកធ្លាប់មានអារម្មណ៍ឈឺ ឆៀបៗនៅម្រាមដៃ, ប្រអប់ដៃ ឬជើងដែរទេនៅពេលអង្គុយយូររាប់ម៉ោង ? បញ្ហានេះកើតឡើងនៅពេលចរន្តឈាមហូរក្នុងរាងកាយទទួលរងការរំខានដែលអាចបណ្ដាលឱ្យអ្នកមានអារម្មណ៍ស្ពឹកស្រពន់ឈឺ ឆៀបៗ ។ អ្វីដែលសំខាន់នោះ គឺចរន្តឈាមហូរមិនប្រក្រតី ឬឧស្សាហ៍ទទួលរងការរំខានអាចបង្កបញ្ហាសុខភាពជាច្រើន ។ ប៉ុន្តែកុំបារម្ភ ! អ្នកអាចចៀសផុតពីបញ្ហា និងថែមទាំងអាចរក្សាបាននូវចរន្តឈាមហូរប្រក្រតីជាប់ជានិច្ចដោយគ្រាន់តែអនុវត្តតាមប៉ុន្មានចំណុច ៖
១. ទទួលទានម្ទេសក្រហម ៖ ប្រសិនបើអ្នកចង់ជំរុញ ឬបង្កើនចរន្តឈាមរត់ អ្នកគួរបន្ថែមម្ទេសក្រហមចំនួនសមល្មមក្នុងរបបអាហារប្រចាំថ្ងៃ ។ ម្ទេសក្រហមមានប្រសិទ្ធភាពសម្រួលដល់មុខងារនៃសសៃឈាមជួយពង្រឹងសសៃឈាមអាកទែ ។ ដូច្នេះប្រសិនបើអ្នកមានអារម្មណ៍ថាឈាមរបស់អ្នករត់មិនប្រក្រតី ចូរបន្ថែមម្ទេសក្រហមក្នុងអាហាររបស់អ្នក ។
២.ធ្វើចលនា ៖ ជាធម្មតាអារម្មណ៍ស្ពឹកស្រពន់ឈឺ ឆៀបៗលើរាងកាយកើតឡើងនៅពេលអ្នកស្ថិតក្នុងទីតាំងមួយយូរពេក ។ សរសៃឈាមត្រូវជួបបញ្ហារាំងស្ទះ ដូច្នេះអ្នកត្រូវក្រោកឈរឡើង ហើយចាប់ផ្ដើមធ្វើចលនារាងកាយខ្លះ ។ ត្រឹមតែការដើររយៈពេលប្រមាណជា១០នាទី ក៏ជួយជំរុញចរន្តឈាមរត់ឱ្យមានលក្ខណៈល្អប្រសើរដែរ។ បង្កើនរយៈពេលនៃការដើរ បន្តិចម្ដងៗ រហូតដល់អ្នកអាចបញ្ចូលសកម្មភាពនេះក្នុងទម្លាប់ប្រចាំថ្ងៃបាន !
៣.ទទួលទានផ្លែឪឡឹក ៖ អាហារដ៏ប្រសើរមួយទៀតដែលអាចជួយដោះស្រាយបញ្ហាចរន្តឈាមរត់បាននោះ គឺផ្លែឪឡឹក ។ នោះក៏ព្រោះតែឪឡឹកមានផ្ទុកសារធាតុ lycopene ជួយជំរុញចរន្តឈាមរត់។ អ្នកជំនាញផ្នែកសុខភាពជាច្រើនបានណែនាំឱ្យអ្នកទទួលទានឪឡឹកចំនួន១ចានគោមរាល់ថ្ងៃដើម្បីរក្សាចរន្តឈាមហូរប្រក្រតី ។
៤.កាត់បន្ថយការទទួលទានភេសជ្ជៈប៉ូវកម្លាំង ៖ ការទទួលទានភេសជ្ជៈមួយចំនួនដូចជា កាហ្វេ, តែ និងភេសជ្ជៈប៉ូវកម្លាំងច្រើនក្នុងរយៈពេលយូរទៅបង្កផលប៉ះពាល់ដល់ចរន្តឈាមរបស់អ្នកដែលអាចនាំឱ្យកើតបញ្ហាសុខភាពគួរឱ្យព្រួយបារម្ភ ។ ដូច្នេះដើម្បីជាការប្រសើរ ចូរព្យាយាមទទួលទានក្នុងកម្រិតសមល្មម ។
៥.ទទួលទានខ្ញី ៖ ខ្ញីមានប្រសិទ្ធភាពជួយបំបាត់អាការចង្អោរចង់ក្អួត រួមទាំងបញ្ហា ផ្សេងៗទាក់ទងនឹងប្រព័ន្ធរំលាយអាហារ ក៏ដូចជាបង្កើនចរន្តឈាមរត់ផងដែរ ។ អ្នកអាចទទួលទានខ្ញីទាំងឆៅ ឬឆ្អិន ហើយក៏អាចបន្ថែមក្នុងអាហារ ឬតែ(ប្រភពពី៖ Health.com.kh) ៕
ចែករំលែកព័តមាននេះ