ខេត្តកំពង់ឆ្នាំង ៖ កាលពីកន្លងទៅថ្មីៗកន្លងមកនេះមានជនមិនស្គាល់អត្តសញ្ញាណមួយក្រុមបាននាំគ្នាដើរចុះបាញ់ថ្នាំសំគាល់លើដើមឈើព័ទ្ធយកដីព្រៃចំការធ្នង់ និងដីព្រៃភ្នំ រាប់រយហិកតានៅក្នុងព្រៃសហគមន៍ ព្រៃឈើ ពោធិជ្រកជម្រករិទ្ធសែន ដែលមានចំការដើមធ្នង់រាប់ម៉ឺនដើម ស្ថិតនៅក្នុងភូមិពោធិ ឃុំពោធិ ស្រុកកំពង់លែង អាជ្ញាធរមូលដ្ឋាន និងសហគមន៍ព្រៃឈើកំពុងមានការព្រួយបារម្ភដោយស្នើសុំស្ថាប័ន និងជំនាញពាក់ព័ន្ធជួយចុះស្រាវជ្រាវ និងទប់ស្កាត់ជាបន្ទាន់ផង ។
លោក សឿន លីត សមាជិកសហគមន៍ព្រៃឈើពោធិជ្រកជម្រករិទ្ធីសែននៅក្នុងភូមិពោធិ៍ ឃុំពោធិ៍ស្រុកកំពង់លែងនៅព្រឹកថ្ងៃទី២៣ ខែមករា ឆ្នាំ២០១៩ បានចុះទៅក្នុងចំការធ្នង់ហើយបាននិយាយឱ្យភ្នាក់ងារកោះសន្តិភាពឱ្យដឹងថា នៅក្នុងអំឡុងខែតុលា ឆ្នាំ២០១៨ កន្លងទៅលោកបានឃើញជនមិនស្គាល់អត្តសញ្ញាណមួយក្រុមបានជិះរថយន្តមួយគ្រឿងមកឈប់នៅក្នុងភូមិពោធិហើយបានបង្ហោះដ្រូនថតយករូបនៅលើចំការដើមធ្នង់ក្នុងព្រៃសហគមន៍បន្ទាប់មកពួគេក៏បានចាកចេញទៅវិញបាត់ ។
លុះក្រោយមកនៅក្នុង ខែវិច្ឆិកា ឆ្នាំ២០១៨ សហគមន៍បានចុះជាមួយនគរបាលប៉ុស្តិ៍រដ្ឋបាលពោធិពិនិត្យព្រៃចំការធ្នង់ដែលគ្រប់គ្រងដោយសហគមន៍ក៏បានឃើញមានគេបាញ់ថ្នាំពណ៌ខៀវ និងពណ៌ក្រហម ព្រមទាំងដាក់សញ្ញាព្រួញតាមដើមធ្នង់ ចាប់ពីចំណុចព្រៃឈើក្រោយសាលាឃុំពោធិ៍ អូរថ្មទឹក ដានជើងតាព្រេង ភ្នំរបងរហូតដល់ថ្នល់ក្រហម ដែលមានប្រវែងដីរាប់គីឡូដីម៉ែត្រ និងមានទំហំប្រមាណរាប់សិបហិកតា ដែលគាត់មិនដឹងថា ការបាញ់ថ្នាំតាមដើមធ្នង់ព័ទ្ធព្រៃខាងលើនេះក្នុងគោលបំណងអ្វីនោះឡើយ ។
ដោយឡែកព្រៃសហគមន៍របស់លោកគ្របដណ្តប់ដើមធ្នង់ជាង២០ហិកតាដែលមានដើមធ្នង់រាប់ម៉ឺនដើម ។ ក្នុងនាមលោកជាសមាជិកសហគមន៍តាំងនាមអោយសហគមន៍ទាំងមូលសូមអំពាវនាវដល់អាជ្ញាធរ និងក្រសួងពាក់ព័ន្ឋសូមមេត្តាជួយទុបស្កាត់នូវទង្វើខាងលើដែលពិតជាមានចេតនាក្នុងការទន្ទ្រានកាន់កាប់ដីតំបន់នោះជាពុំខាន ។
ទាក់ទងនឹងករណីខាងលើនេះលោក សំ ចាន់ថន អភិបាលស្រុកកំពង់លែងនៅព្រឹកថ្ងៃទី២៣ ខែមករា ឆ្នាំ២០១៩ ក៏បានអោយដឹងដែរថា លោកក៏បានដឹងព័ត៌មានដូចខាងលើនេះដែរ ករណីនេះសហគមន៍ព្រៃឈើក៏ដូចជាប្រជាពលរដ្ឋ និងអាជ្ញាធរមូលដ្ឋាន ស្នើសុំមន្ត្រីជំនាញ និងស្ថាប័នពាក់ព័ន្ធមេត្តាចុះស៊ើបអង្កេតស្រាវជ្រាវ និងទប់ស្កាត់ជាបន្ទាន់ផង ដើម្បីវែកមុខជនល្មើស និងបង្ក្រាបការទន្ទ្រានយកដីព្រៃចំការធ្នង់របស់សហគមន៍ ព្រៃឈើរបស់រដ្ឋ នៅក្នុងឃុំពោធិ ស្រុកកំពង់លែង នេះអោយមានប្រសិទ្ធិភាព ។
ដោយឡែកលោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង នៅល្ងាចថ្ងៃទី២៣ ខែមករា ឆ្នាំ២០១៩ បានអោយដឹងថា លោកក៏ទើបតែទទួលបានព័ត៌មានខាងលើដែរទេនៅពេលអ្នកសារព័ត៌មាន ទូរស័ព្ទសួរតែលោកមិនដឹងថា រឿងនេះមានកើតមានពិតមែន ឬយ៉ាងណានោះទេ ពេលនេះលោកកំពុងចាត់មន្ត្រីជំនាញអោយចុះស៊ើបអង្កេត និងស្រាវជ្រាវជាបន្ទាន់ផងដែរដើម្បីស្វែងរកមុខសញ្ញាជនសង្ស័យ និងចាត់ការតាមផ្លូវច្បាប់ ៕
ចែករំលែកព័តមាននេះ