ប្រទេសឥណ្ឌូណេស៊ី ៖ ក្រោយពីអារចម្រឹងដែកបន្ទប់ឃុំឃាំងរបស់គេ លើកោះLOMBOKឥណ្ឌូណេស៊ី ជនជាតិបារាំងឈ្មោះFELIX DORFIN ជាប់សង្ស័យរត់ពន្ធគ្រឿងញៀន បានលួចរត់ចេញពីគុកបាត់ហើយកាលពីយប់ថៃ្ងទី២០មក២១មករា។
មានដើមកំណើតនៅBETHUNEបុរសអាយុ៣៥ឆ្នាំរូបនេះកំពុងជាប់ឃុំឃាំងរង់ចាំការកាត់ទោស។ រូបគេរត់ចេញតាមបង្អួចពីជាន់ទី២នៃមជ្ឈមណ្ឌលឃុំឃាំង។ គេលួចចុះមកតាមរយៈការហែកសារុងនិងវាំងនន តជាប់គ្នាជាខ្សែដើម្បីសម្រូតចុះមកក្រោម។ នេះជាការអះអាងរបស់អ្នកនាំពាក្យប៉ូលិសតំបន់ខាងកើតនៃប្រជុំកោះSONDE។
ភ្លាមៗប៉ូលិសឥណ្ឌូណេស៊ីដែលនិយាយថាFELIX DORFINមិនទាន់រត់ទៅណាឆ្ងាយពីកោះនោះ បានដាក់ពង្រាយកម្លាំងបន្ថែមត្រួតពិនិត្យកំពង់ផែនានា បណ្ដាព្រលានយន្តហោះនិងផ្លូវថ្នល់ទាំងឡាយ។
កាលពីដំណាច់ខែកញ្ញាជននោះត្រូវចាប់ខ្លួននៅព្រលានយន្តហោះកោះLOMBOK ជាមួយគ្រឿងញៀន៤គីឡូក្រាម ក្នុងនោះមានកូកាអីុន អេស្ដាស៊ីនិងអំហ្វេតាមីន លាក់ក្នុងវ៉ាលីសមួយមាន២ស្រទាប់។
នៅឥណ្ឌូណេស៊ីការរត់ពន្ធគ្រឿងញៀនច្រើនបែបនេះត្រូវមានទោសប្រហារជិវិត៕
ចែករំលែកព័តមាននេះ