រាជធានីភ្នំពេញ ៖ មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថាវិស័យកសិកម្មកម្ពុជាបាននិងកំពុងមាសក្តានុពល ហើយផលិតផលកសិកម្ម ក៏ដូចជាវត្ថុធាតុដើមមានឧត្តមភាពផ្នែកទីផ្សារទាំងនៅក្នុងតំបន់ និងសកលលោក ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ក្នុងកិច្ចប្រជុំពេញអង្គលើកទី៨ ស្តីពី « ផលិតកម្មស្រូវប្រកបដោយនិរន្តរភាព » កាលពីថ្ងៃទី២២ មករា ថា បច្ចុប្បន្នវិស័យកសិកម្មកម្ពុជាកំពុងមានសក្តានុពល កាលានុវត្តភាព និងឧត្តមភាពសម្រាប់ទីផ្សារផលិតផលកសិកម្ម និងវត្ថុធាតុដើមនៅក្នុងតំបន់ និងនៅលើសកលលោក ដោយប្រទេសកម្ពុជាបានក្លាយជាប្រទេសមួយក្នុងចំណោមប្រទេសនាំចេញអង្ករធំៗទាំង១០ដែលក្នុងឆ្នាំ២០១៧ កម្ពុជាផលិតស្រូវបានចំនួនជាង១០,៥លានតោន សល់ស្រូវចំនួនជាង៥លានតោនសម្រាប់នាំចេញ និងបាននាំចេញអង្ករផ្លូវការចំនួនជាង៦៣,៥ម៉ឺន តោន ។
លោករដ្ឋមន្ត្រីបញ្ជាក់ថា ៖« ដើម្បីឱ្យវិស័យនេះមានការរីកចម្រើនថែមមួយកម្រិតទៀត រាជរដ្ឋាភិបាលកម្ពុជាបានដាក់ចេញនូវគោលនយោបាយ និងចក្ខុវិស័យក្នុងការធ្វើទំនើបភាវូបនីយកម្មផលិតកម្មកសិកម្មឱ្យមានលក្ខណៈប្រកួតប្រជែង បរិយាប័ន្ន ធន់នឹងការប្រែប្រួលអាកាសធាតុ និងមាននិរន្តរភាព ដែលនាំដល់កំណើនប្រាក់ចំណូល វិបុលភាព និងសុខុមាលភាពជូនប្រជាជន ។
ជារួម គោលដៅអភិវឌ្ឍន៍វិស័យកសិកម្មគឺត្រូវបង្កើនការនាំចេញកសិផល ប្រកបដោយគុណភាព និងសុវត្ថិភាព តាមរយៈការលើកកម្ពស់ផលិតភាពផលិតកម្ម បង្កើនតម្លៃបន្ថែម និងពង្រីកការប្រកួតប្រជែងទីផ្សារ ព្រមទាំងរក្សាបានតុល្យភាពនៃការប្រើប្រាស់ដីកសិកម្មប្រកបដោយនិរន្តរភាព »។
ទីប្រឹក្សាសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Markets Consulting លោក ង៉ែត ជូ បានមានប្រសាសន៍ថា ៖« នៅប៉ុន្មានឆ្នាំចុងក្រោយនេះ វិស័យកសិកម្មរបស់កម្ពុជាមានការរីកចម្រើនច្រើនទាក់ទងនឹងការនាំចេញ។ ជាក់ស្ដែងយើងមានរោងម៉ាស៊ីនកិនស្រូវច្រើន និងចាប់ផ្តើមមានរោងចក្រកែច្នៃផ្លែស្វាយ ស្វាយចន្ទីសម្រាប់នាំចេញផងដែរ ។ ដូចនេះនៅមួយរយៈ៤ឬ៥ឆ្នាំចុងក្រោយនេះ វិស័យកសិកម្មមានការលេចចេញនូវសញ្ញាល្អច្រើន »។
ទោះបីយ៉ាងណា លោកលើកឡើង ទីផ្សារកសិកម្មរបស់កម្ពុជាមានភាពល្អច្រើន ប៉ុន្តែទីផ្សារមួយនេះតែងតែមានភាពប្រែប្រួលមិនថានៅកម្ពុជាឬនៅប្រទេសផ្សេងទៀតនោះទេ។ លោកថា ៖« សម្រាប់កម្ពុជាយើង ប្រសិនបើមិនមានការប៉ះពាល់ទាក់ទងបញ្ហារឿងEBA ឬបញ្ហាផ្សេងទៀតនោះទេ ដំណើរការទីផ្សារកសិកម្មកម្ពុជាអាចនឹងល្អច្រើនបន្ថែមទៀតនាពេលខាងមុខ »។
បើតាមលោករដ្ឋមន្ត្រី វេងសាខុន ដើម្បីឱ្យផលិតកម្មស្រូវប្រកបដោយនិរន្ដរភាព កម្ពុជាត្រូវធ្វើពិពិធកម្មបន្ថែមទៀត ដូចជា ត្រូវបង្កើតស្តង់ដាផលិតកម្មស្រូវប្រកបដោយនិរន្តរភាព ព្រមទាំងកំណត់សូចនាករ និងយន្តការក្នុងការវាយតម្លៃបញ្ជាក់គុណភាពឱ្យបានត្រឹមត្រូវ
ដើម្បីទទួលផលិតផលល្អពិតប្រាកដ ដែលទទួលស្គាល់ដោយទីផ្សារជាតិ និងអន្តរជាតិ និងត្រូវបន្តពង្រឹង និងពង្រីកចំណងទំនាក់ទំនងកិច្ចសហប្រតិបត្តិការ និងភាពជាដៃគូឱ្យបានល្អរវាងវិទ្យាស្ថាន IRRI និង UN Environment ជាមួយក្រសួងកសិកម្ម រុក្ខាប្រមាញ់ និងនេសាទ ក្រសួង ស្ថាប័នពាក់ព័ន្ធទាំងអស់ក្នុងប្រទេសដើម្បីជាប្រយោជន៍ដល់គ្រប់ភាគី ជាពិសេសដល់ប្រជាកសិករតាមអភិក្រម រដ្ឋ-ឯកជន-ដៃគូអភិវឌ្ឍន៍ និងសហគមន៍ ៕
ចែករំលែកព័តមាននេះ