ស្មាតហ្វូនបច្ចុប្បន្ននេះមានគុណភាពល្អជាងពីមុនមកយ៉ាងខ្លាំងហើយវាអនុញ្ញាតឲ្យអ្នកប្រើប្រាស់ថតរូបបានស្អាតៗដោយមិនចាំបាច់ចំណាយថវិកាក្នុងការទិញកាមេរ៉ាដូចអ្នកជំនាញ ។ ខាងក្រោមនេះជាវិធីសាស្ត្រមួយចំនួនដែលអាចជួយឲ្យអ្នកថតរូបភាពបានស្អាតៗដោយប្រើកាមេរ៉ាលើទូរស័ព្ទរបស់អ្នក ៖
១. យល់ដឹងពីចំណុចខ្លាំងរបស់កាមេរ៉ាស្មាតហ្វូន
ស្មាតហ្វូនរបស់អ្នកមិនអាចថតរូបបានស្អាតដូចកាមេរ៉ាអ្នកជំនាញទេ ប៉ុន្តែវាក៏មានចំណុចខ្លាំងច្រើនដែរ។ កាមេរ៉ាស្មាតហ្វូនមាន Lens ដែលអាចថតរូបភាពបានធំដូចជារូបទេសភាពជាដើម ដូច្នេះអ្នកមិនចាំបាច់ដើរច្រើនដើម្បីរកកន្លែងល្អសម្រាប់ការថតរូបទេ ។
លើសពីនេះទៅទៀត ស្មាតហ្វូនរបស់អ្នកមានកម្មវិធី Software ដូចជា HDR, Portrait Mode និង កម្មវិធីទូរស័ព្ទជាច្រើនសម្រាប់ការថតរូប កែរូប និងបង្ហោះរូបជាដើម ។ស្មាតហ្វូនមួយចំនួនទៀតមាន Lens ច្រើនដែលមានចំណុចពិសេសៗខុសៗគ្នា ដូចជាកាមេរ៉ា Huawei Mate 20 Pro អាចថតរូបបាន Wide-Angle, Ultra Wide-Angle និង Telephoto lens ជាដើម។
២. យល់ដឹងពីចំណុចខ្សោយរបស់កាមេរ៉ាស្មាតហ្វូន
ការដឹងពីចំណុចខ្សោយរបស់កាមេរ៉ាលើស្មាតហ្វូនរបស់អ្នកអាចជួយឲ្យអ្នកដឹងពីវិធីជៀសវាងវា។ បញ្ហាធំជាងគេរបស់កាមេរ៉ាលើស្មាតហ្វូនគឺពួកវាមិនអាចថតរូបបានល្អពេលដែលមិនមានពន្លឺគ្រប់គ្រាន់ឡើយ។ លើសពីនេះទៅទៀត រូបភាពដែលថតពីស្មាតហ្វូនតែងតែមានទំហំតូចដែលធ្វើឲ្យវាមិនសូវច្បាស់ជាដើម។
បញ្ហាមួយទៀតគឺការ Zoom ព្រោះការ Zoom លើស្មាតហ្វូនមិនអាចប្រៀបធៀបបានជាមួយនឹងកាមេរ៉ាអ្នកជំនាញទេបើទោះជាមានទូរស័ព្ទកាន់តែច្រើនដែលមាន Lens ច្រើនពិតមែនក្តី។
៣. ដឹងពីប្រភពពន្លឺ
ពន្លឺមានសារៈសំខាន់ណាស់ពេលដែលថតរូបភាពមិនថាអ្នកប្រើកាមេរ៉ាអ្វីទេ ដូច្នេះអ្នកគួរដឹងពីទិសពន្លឺ។ អ្នកគួរតែថតពេលដែលពន្លឺធ្លាក់មកលើមនុស្ស ឬអ្វីដែលអ្នកចង់ថត។ ប្រសិនបើអ្នកថតរូបនរណាម្នាក់ អ្នកគួរប្រាប់ឲ្យពួកគេងាកមុខទៅរកពន្លឺ។
៤. ជូត Lens កាមេរ៉ាឲ្យបានស្អាត
មុននឹងថតរូបភាព អ្នកគួរតែជូត Lens កាមេរ៉ារបស់អ្នកជាមួយនឹងក្រណាត់ ឬអាវរបស់អ្នកសិនព្រោះទូរស័ព្ទដៃងាយនឹងប្រឡាក់ដោយសារតែអ្នកត្រូវកាន់វានឹងដៃច្រើន ៕
ចែករំលែកព័តមាននេះ