កាលពីឆ្នាំ២០១៨ ជាឆ្នាំដែលមានការពិភាក្សាពីផលប៉ះពាល់របស់ស្មាតហ្វូនដែលបង្កឲ្យក្រុមហ៊ុនបច្ចេកវិទ្យាធំៗចាប់ផ្តើមជំរុញឲ្យអ្នកប្រើប្រាស់កាត់បន្ថយពេលចំណាយលើទូរស័ព្ទ ។ ខាងក្រោមជាវិធីងាយៗដែលអ្នកអាចធ្វើដើម្បីសម្រេចគោលបំណងនេះ និងងាកទៅកាន់សៀវភៅអានវិញ ៖
១. យល់ដឹងពីពេលដែលអ្នកចំណាយលើទូរស័ព្ទ
ប្រសិនបើអ្នកចង់ផ្លាស់ប្តូរទម្លាប់ អ្នកគួរដឹងសិនថាតើអ្នកកំពុងតែចំណាយពេលវេលាប៉ុន្មានលើទូរស័ព្ទរបស់អ្នក និងតើអ្នកមានអារម្មណ៍យ៉ាងណាពេលដែលអ្នកប្រើវា ។
អ្នកនាង Catherine Price ដែលជាអ្នកនិពន្ធសៀវភៅ How to Break Up With Your Phone បាននិយាយថា «ពេលដែលអ្នកឈោងដៃទៅកាន់ទូរស័ព្ទរបស់អ្នក សាកល្បងសូរថា តើអ្នកប្រើវាដើម្បីអ្វី? ហេតុអ្វីត្រូវប្រើពេលនេះ?» ។
តើអ្នកកំពុងតែធ្វើអ្វី?តើអ្នកមានកិច្ចការចាំបាច់ត្រូវធ្វើឲ្យចប់ទេ? តើអ្នកប្រើទូរស័ព្ទព្រោះអ្នកកំពុងតែធុញ ឬអ្នកកំពុងទទួលរងសម្ពាធពីសង្គម? តើអ្នកអាចធ្វើអ្វីផ្សេងក្រៅពីប្រើទូរស័ព្ទរបស់អ្នកទេ?
អ្នកនាង Price បាននិយាយថា ទូរស័ព្ទអាចជាថ្នាំញៀនឌីជីថលដែលពួកយើងប្រើដើម្បីទទួលបានភាពសប្បាយរីករាយ ឬជៀសវាងអារម្មណ៍មិនល្អ ឬការឈឺចាប់ណាមួយ។ ការដឹងពីគោលបំណងក្នុងការប្រើទូរស័ព្ទអាចជួយឲ្យអ្នកយល់ដឹងបន្ថែមពីការសម្រេចចិត្តរបស់ខ្លួនដែរ។
២. ដឹងច្បាស់ពីគោលដៅខ្លួន
អ្នកត្រូវតែគិតថាអ្វីដែលអ្នកកំពុងតែធ្វើគឺជារឿងល្អ និងមិនមែនជាការហាមឃាត់ទេ ។ តើអ្នកចង់ចំណាយពេលវេលាច្រើនជាងមុនដើម្បីអាន ឬសាកល្បងរៀនជំនាញផ្សេងៗ? អ្នកប្រហែលជាចង់កាត់បន្ថយការចំណាយពេលលើទូរស័ព្ទព្រោះតែឥទ្ធិពលអវិជ្ជមានរបស់វា ដូចជាការមានអារម្មណ៍ថាអាយុខ្លីជាងមុន ឬឆាប់ភ័យជាងមុន ប៉ុន្តែអ្នកត្រូវដឹងថាវាកាន់តែល្អជាងនេះទៅទៀតប្រសិនបើអ្នកដឹងថាតើអ្នកនឹងប្រើពេលវេលាដែលនៅទំនេរលើអ្វី។
៣. ប្រើទូរស័ព្ទដើម្បីកាត់បន្ថយពេលលើទូរស័ព្ទ
កម្មវិធីផ្សេងៗដូចជា Screen Time និង Digital Well Being អាចជួយឲ្យអ្នកសម្រេចគោលដៅក្នុងការកាត់បន្ថយពេលលើទូរស័ព្ទរបស់អ្នកបានយ៉ាងងាយស្រួលផងដែរ ដូចជាការប្រើ Instagram តែ ៣០នាទីប៉ុណ្ណោះក្នុងមួយថ្ងៃជាដើម ៕
ចែករំលែកព័តមាននេះ