រាជធានីភ្នំពេញ ៖ ស្ត្រីម្នាក់បានទិញបង់រំលស់រថយន្តកាមរីហាយប្រ៊ីតមួយគ្រឿងពីក្រុមហ៊ុន ខណៈបង់បានរយះពេលជិតមួយឆ្នាំ បែរជាលួចយករថយន្តទៅដាក់បញ្ចាំស្ងាត់ៗក្នុងតម្លៃ៨០០០ដុល្លារ ក៏ត្រូវក្រុមហ៊ុនដឹងរឿង តាមរកឃើញរថយន្តក្នុងហាងបញ្ចាំ បង្កជាការភ្ញាក់ផ្អើលឡើងកាលពីវេលាម៉ោង៦ និង៥០នាទីយប់ថ្ងៃទី២២ មករា…
រាជធានីភ្នំពេញ ៖ ស្ត្រីម្នាក់បានទិញបង់រំលស់រថយន្តកាមរីហាយប្រ៊ីតមួយគ្រឿងពីក្រុមហ៊ុន ខណៈបង់បានរយះពេលជិតមួយឆ្នាំ បែរជាលួចយករថយន្តទៅដាក់បញ្ចាំស្ងាត់ៗក្នុងតម្លៃ៨០០០ដុល្លារ ក៏ត្រូវក្រុមហ៊ុនដឹងរឿង តាមរកឃើញរថយន្តក្នុងហាងបញ្ចាំ បង្កជាការភ្ញាក់ផ្អើលឡើងកាលពីវេលាម៉ោង៦ និង៥០នាទីយប់ថ្ងៃទី២២ មករា ស្ថិតត្រង់ចំណុចក្នុងហាងបញ្ចាំយីហោ «ឆ័រ ប៉ោទ្រី» តាមបណ្ដោយផ្លូវ១៩២ ក្នុងសង្កាត់ទឹកល្អក់ទី៣ ខណ្ឌទួលគោក។
ប្រភពឱ្យដឹងថា ស្ត្រីខាងលើ ឈ្មោះ កើត ភិរម្យ អាយុ៣០ឆ្នាំ ស្នាក់នៅផ្ទះលេខ45B ផ្លូវលេខ២១៥ ក្រុមទី១០ សង្កាត់ផ្សារដើមគ ខណ្ឌទួលគោក ។ តាមប្រភពព័ត៌មានពីបុរសម្នាក់ ដែលជាតំណាងក្រុមហ៊ុន មេត្រីជប៉ុន បានរៀបរាប់ប្រាប់ថា កាលពីថ្ងៃទី០៣ មករា ឆ្នាំ២០១៨ ស្ត្រីរូបនេះបានទិញរំលស់រថយន្តមួយគ្រឿង ម៉ាកកាមរីហាយប្រ៊ីត ស៊េរី០៨ ពណ៌ស្ករ ពាក់ស្លាកលេខ ភ្នំពេញ2T-7189 ពីក្រុមហ៊ុនរបស់គាត់ក្នុងតម្លៃ២៧០០០ដុល្លារ ។
ស្ត្រីខាងលើបង់ប្រាក់រំលស់ដំបូងចំនួន៨០០០ដុល្លារ ដែលជាប្រាក់កក់ឲ្យមកក្រុមហ៊ុន និងធ្វើការបង់រំលស់សងជារៀងរាល់ខែ ក្នុងរយៈពេល៣ឆ្នាំ សម្រាប់ប្រាក់ដែលនៅសេសសល់ ។ ជារៀងរាល់ខែកន្លងមកស្ត្រីខាងលើ តែងតែបានបង់ប្រាក់សង តាមការកំណត់របស់ក្រុមហ៊ុនជាធម្មតា។
ក្នុងអំឡុងប្រមាណ១ខែកន្លងមកនេះ ស្ត្រីខាងលើ មិនបានបង់ប្រាក់សងទៅតាមការកំណត់របស់ក្រុមហ៊ុននោះទេ ។ ក្រុមហ៊ុនក៏ព្យាយាមទំនាក់ទំនងសួរនាំស្ត្រីខាងលើជាបន្តបន្ទាប់ ព្រោះស្ត្រីខាងលើនៅជំពាក់ប្រាក់ក្រុមហ៊ុនចំនួន១៤០០០ដុល្លារទៀត ។ បន្ទាប់មកខាងក្រុមហ៊ុន ធ្វើការណាត់ជួបនិងចុះមកជួបស្ត្រីខាងលើផ្ទាល់ ទើបដឹងថា បាត់រថយន្តរបស់ក្រុមហ៊ុនដែលបានលក់បង់រំលស់ឲ្យ ហើយស្ត្រីនោះក៏បានប្រាប់ថា នាងបានយករថយន្តនោះទៅបញ្ចាំនៅក្នុងហាងបញ្ចាំយីហោ ឆ័រ ប៉ោទ្រី ដែលបានដាក់បញ្ចាំក្នុងតម្លៃ៨០០០ដុល្លារ ដោយគ្មានលិខិតស្នាមត្រឹមត្រូវនោះទេ ។
លុះដល់វេលាកើតហេតុ ខាងក្រុមហ៊ុនបាននាំស្ត្រីខាងលើ មកហាងបញ្ចាំកើតហេតុ ដើម្បីធ្វើការដោះស្រាយគ្នា ខណៈពេលមកដល់ក៏ឃើញរថយន្តខាងលើនៅខាងក្នុងហាងបញ្ចាំនោះផងដែរ ប៉ុន្តែមិនឃើញស្លាកលេខរថយន្តជាប់ជាមួយនិងរថយន្តនោះទេ ។ គាត់ក៏បានរាយការណ៍ជូនទៅសមត្ថកិច្ចមូលដ្ឋាន ដើម្បីឲ្យចុះមកជួយធ្វើការអន្តរាគមន៍។
ចែករំលែកព័តមាននេះ