ខេត្តកំពង់ឆ្នាំង ៖ មានករណីអ្នកលក់សត្វព្រៃលើផ្លូវជាតិលេខ៥ ត្រង់ចំណុចភូមិអូរសណ្តាន់ ឃុំទឹកហូត យកសត្វឆ្មាស្រុកបន្លំប្រាប់អ្នកទិញថា ជាសត្វខ្លាត្រី ។ តែយ៉ាងណា លោកអភិបាលស្រុករលាប្អៀរ បានធ្វើការសំណូមពរអ្នកដំណើរថា «សូមកុំទិញ» ។
លើករណីនេះ អាជ្ញាធរស្រុកនឹងវិធានការទប់ស្កាត់ ខណៈតាមបណ្តោយផ្លូវជាតិលេខ៥ ចំណុចភូមិអូរសណ្តាន់ ឃុំទឹកហូតស្រុករលាប្អៀរ បានឃើញមានការដាក់លក់សត្វព្រៃយ៉ាងអនាធិបតេយ្យបំផុត ដោយមិនខ្លាចរអារច្បាប់ទម្លាប់ឡើយ ។ លើពីនេះទៀត មានសត្វស្រុកមួយចំនួន ត្រូវបានអ្នកលក់បន្លំអ្នកទិញយកទៅទទួលទានថា ជាសត្វព្រៃទៀតផង ដែលបញ្ហានេះ គួរតែសមត្ថកិច្ចពាក់ព័ន្ធ គួរមានវិធានការតាមផ្លូវច្បាប់ ដើម្បីទប់ស្កាត់ ។
សត្វព្រៃទាំង ត្រូវបានគេដាក់តាំងលក់ ដោយចងព្យួរ រណេងរណោង នៅតាមបណ្តោយសងខាងផ្លូវជាតិ ឃើញមានសត្វស្លាបដូចជា លលក ដុំដោ កុក ក្រួច មាន់ទឹក និងសត្វទោមជាដើម ។ ក្រៅពីនោះនៅមាន សត្វពស់ សត្វខ្លាត្រី និងសត្វខ្លាត្រីក្លែងក្លាយ ព្រោះសម្លាប់សត្វឆ្មា បន្លំជាសត្វខ្លាត្រី ។
ទាក់ទងបញ្ហានេះ លោក សោម វឺន អភិបាលស្រុករលាប្អៀរ បានប្រាប់កាលពីរសៀលថ្ងៃទី២២ មករា ថា លោកបានដឹងរឿងនេះហើយ ។ មិនត្រឹមតែប៉ុណ្ណឹង មានខ្លះយកកូនឆ្កែ បន្លំជាសត្វនេះសត្វនោះលក់ឱ្យអ្នកទិញទៀតផង ។ បញ្ហានេះ លោកនឹងអញ្ជើញអ្នកលក់សត្វព្រៃទាំងនោះមកប្រជុំអប់រំម្តង កុំអោយដាក់លក់បែបនេះទៀត ។
ចែករំលែកព័តមាននេះ