រាជធានីភ្នំពេញ ៖ ពេញមួយឆ្នាំ២០១៨កន្លងទៅនេះ ភ្ញៀវទេសចរចិនបានមកកាន់តំបន់អាស៊ានមានរហូតដល់ប្រមាណ២៧.៩៣០.០០០នាក់ ដែលមានចំនួនច្រើនលើសលប់ បើធៀបទៅនឹងទីផ្សារទេសចរណ៍សំខាន់ៗដែលមកកាន់តំបន់នេះ ។ យោងតាមតារាងស្ថិតិភ្ញៀវទេសចរចិនមកកាន់ប្រទេសជាសមាជិកអាស៊ានក្នុងឆ្នាំ២០១៨ ក្នុងនោះ ប្រទេសកម្ពុជាទទួលបានចំនួនប្រមាណ…
រាជធានីភ្នំពេញ ៖ ពេញមួយឆ្នាំ២០១៨កន្លងទៅនេះ ភ្ញៀវទេសចរចិនបានមកកាន់តំបន់អាស៊ានមានរហូតដល់ប្រមាណ២៧.៩៣០.០០០នាក់ ដែលមានចំនួនច្រើនលើសលប់ បើធៀបទៅនឹងទីផ្សារទេសចរណ៍សំខាន់ៗដែលមកកាន់តំបន់នេះ ។
យោងតាមតារាងស្ថិតិភ្ញៀវទេសចរចិនមកកាន់ប្រទេសជាសមាជិកអាស៊ានក្នុងឆ្នាំ២០១៨ ក្នុងនោះ ប្រទេសកម្ពុជាទទួលបានចំនួនប្រមាណ ១,៩លាននាក់, ថៃទទួលបាន១១លាននាក់, ម៉ាឡេស៊ីទទួលបាន២,៩លាននាក់, សិង្ហបុរីទទួលបាន១,៥លាននាក់, វៀតណាមទទួលបាន៥លាននាក់, ឥណ្ឌូណេស៊ីទទួលបាន៣លាននាក់, ហ្វីលីពីនទទួលបាន១លាននាក់,ឡាវទទួលបាន៨សែននាក់, មីយ៉ាន់ម៉ាទទួលបាន៦សែននាក់ និងប្រទេសព្រុយណេ ទទួលបាន២៨ម៉ឺននាក់ ។
តារាងស្ថិតិដដែលក៏បានបង្ហាញទៀតថា ប្រទេសតំបន់អាស៊ានក្នុងឆ្នាំ២០១៨កន្លងមក ភ្ញៀវទេសចរអន្តរជាតិដែលធ្វើដំណើរមកទស្សនាតាមប្រទេសនានាដែលជាសមាជិក មានប្រមាណ១២៩លាននាក់ កើនឡើងប្រមាណ៧,៤% បើធៀបទៅនឹងឆ្នាំ២០១៧ ក្នុងនោះ ប្រទេសថៃទទួលបានភ្ញៀវអន្តរជាតិប្រមាណ៣៨.១៥៤.៤៩៤នាក់, ម៉ាឡេស៊ីទទួលបានប្រមាណ២៣.៤៧៩.៩៣២នាក់,សិង្ហបុរីទទួលបានប្រមាណ១៦.៩០៣.១៦៨នាក់, វៀតណាមទទួលបានប្រមាណ១៥.៤៩៧.៧៩១នាក់, ឥណ្ឌូណេស៊ីទទួលបានប្រមាណ១៤.៣៩១.៨១៦នាក់ , ហ្វីលីពីនទទួលបានប្រមាណ៦.៤៣៩.៩៥២នាក់, កម្ពុជាទទួលបានប្រមាណ ៦.២០០.០០០នាក់, ឡាវទទួលបានប្រមាណ៤.១៨៦.៤៣២នាក់, មីយ៉ាន់ម៉ា ទទួលបានប្រមាណ៣.៥៥១.៤២៨នាក់ និងព្រុយណេដារូសាឡឹមទទួលបានប្រមាណ២០៥.១២៩នាក់ ។
សូមជម្រាបថា នៅឆ្នាំ២០១៨ ក្នុងចំណោមភ្ញៀវទេសចរបរទេសដែលមកទស្សនាកម្ពុជា ៦,២លាននាក់ កើនឡើង១១% ក្នុងនោះភ្ញៀវទេសចរចិនមានចំនួន១,៩លាននាក់កើន៧០% ហើយនៅឆ្នាំ២០២០ កម្ពុជារំពឹងថា នឹងទទួលបានភ្ញៀវទេសចរចិនប្រមាណ៣លាននាក់ ។
នៅក្នុងកិច្ចប្រជុំរដ្ឋមន្ត្រីទេសចរណ៍អាស៊ានបូកបី (ចិន ជប៉ុន និងកូរ៉េ) លើកទី១៨ នៅទីក្រុងហាឡុង ប្រទេសវៀតណាម លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍បានថ្លែងថា កម្ពុជាពិតជាមានកិត្តិយសណាស់ដែលកំពុងត្រូវបានទទួលស្គាល់ជាប្រទេសមានសេវាកម្មទេសចរណ៍ដែលអាចផ្តល់ភាពកក់ក្តៅដល់ភ្ញៀវទេសចរ និងអាចធ្វើការប្រកួតប្រជែងក្នុងតំបន់ និងពិភពលោកបាន ។
គួរកត់សម្គាល់ថា កម្ពុជាទទួលបានរង្វាន់ស្ដង់ដាអាស៊ានរួមមាន ៖
១- សហគមន៍ទេសចរណ៍ និងអេកូទេសចរណ៍ស្តង់ដាអាស៊ាន ក្នុងនោះមានសហគមន៍អេកូទេសចរណ៍តំបន់ស្ទឹងអារ៉ែង ខេត្តកោះកុង សហគមន៍ទេសចរណ៍បន្ទាយឆ្មារ ខេត្តបន្ទាយមានជ័យ និងសហគមន៍ទេសចរណ៍កំពង់ភ្លុក ខេត្តសៀមរាប ។ ២- ផ្ទះស្នាក់ស្តង់ដាអាស៊ាន ក្នុងនោះមានផ្ទះស្នាក់បាណាណាក្នុងសហគមន៍ទេសចរណ៍រុនតាឯក ខេត្តសៀមរាប ផ្ទះស្នាក់តាំងងិនក្នុងសហគមន៍ទេសចរណ៍ជីផាត ខេត្តកោះកុង ផ្ទះស្នាក់ខឿនស្រីមុំក្នុងសហគមន៍ទេសចរណ៍បន្ទាយឆ្មារ ខេត្តបន្ទាយមានជ័យ ផ្ទះស្នាក់ទន់សារិនក្នុងសហគមន៍ទេសចរណ៍កំពង់ឃ្លាំង ខេត្តសៀមរាប និងផ្ទះស្នាក់ឥសាន្តបុរី៥ក្នុងសហគមន៍ទេសចរណ៍សំបូរព្រៃគុក ខេត្តកំពង់ធំ ។
៣- សេវាស្ប៉ាស្តង់ដាអាស៊ាន ក្នុងនោះមានសេវាស្ប៉ា SO SPA with L’OCCITANCE សេវាស្ប៉ា SPA Temple សេវាស្ប៉ា Sunnaline SPA សេវាស្ប៉ា Jasmine SPA និងសេវាស្ប៉ា SPA at NAGA World ។ ៤- បង្គន់អនាម័យសាធារណៈស្តង់ដាអាស៊ាន ក្នុងនោះមានបង្គន់អនាម័យសាធារណៈសួនសម្តេចក្រទ្បាហោម ស ខេង បង្គន់អនាម័យសាធារណៈសារមន្ទីរប្រល័យពូជសាសន៍ទួលស្លែង បង្គន់អនាម័យសាធារណៈគ្រឹះស្ថានអង្គរ បង្គន់អនាម័យសាធារណៈព្រះនាងប្រាជ្ញាបរមី និងបង្គន់អនាម័យសាធារណៈមណ្ឌលព័ត៌មានទេសចរណ៍ ៕
ចែករំលែកព័តមាននេះ