ខេត្តស្វាយរៀង ៖ សេចក្តីរាយការណ៍ឱ្យដឹងថា សមត្ថកិច្ចបានឃាត់ខ្លួនជនសង្ស័យម្នាក់ ជាជនជាតិវៀតណាមម្នាក់ធ្វើសកម្មភាពលួចទ្រព្យសម្បត្តិប្រជាពលរដ្ឋខ្មែរ កាលពីវេលាម៉ោង១០ និង៣០នាទីព្រឹកថ្ងៃទី២០ មករា ស្ថិតនៅច្រកទញវារព្រំដែនអន្តរជាតិក្រុងបាវិត ។
សេចក្តីរាយការណ៍បន្តថា ជនសង្ស័យខាងលើ ឈ្មោះង្វៀង យ៉ាំងសាង ភេទប្រុស អាយុ៣៣ឆ្នាំ មករស់នៅក្នុងទឹកដីកម្ពុជាដោយខុសច្បាប់ ។ សមត្ថកិច្ចបានបង្ហើបឱ្យដឹងទៀតថា មុនពេលកើតហេតុ គេបានឃើញជនសង្ស័យជិះម៉ូតូ១គ្រឿងមកដល់ចំណុចផ្ទះឈ្មោះហ៊ុន ណាវី ភេទស្រី អាយុ៥០ឆ្នាំ ស្ថិតនៅភូមិកណ្ដាលឃុំខ្សែត្រ ស្រុកកំពង់រោទិ៍ ។
ប្រភពបន្តថា ជនសង្ស័យបានទុកម៉ូតូចោលរួចដើរចូលទៅលួចយកម៉ូតូមួយគ្រឿងម៉ាកហុងដា១២៥ ស៊េរីឆ្នាំ២០១៨ ពាក់ស្លាកលេខ ស្វាយរៀង1M-0123 របស់ឈ្មោះជា សាវន ភេទប្រុស អាយុ២៧ឆ្នាំ ជាតិ ខ្មែរ មានទីលំភូមិត្រោកឃុំខ្សែត្រ ស្រុកកំពង់រោទិ៍ ខេត្តស្វាយរៀង ពេលជិះមកលេងម្ដាយក្មេក ក៏ចតម៉ូតូទុកនៅមុខផ្ទះ ។
ពេលនោះជនសង្ស័យឃើញឱកាសល្អចូលលួចម៉ូតូនោះ ហើយជិះគេចខ្លួនបាត់ភ្លាមៗ ដោយបន្សល់ទុកម៉ូតូ១គ្រឿងរបស់គេ នៅនិងកន្លែងកើតហេតុវិញ ។ បន្ទាប់មក ជនរងគ្រោះបានប្តឹងសមត្ថកិច្ចឲ្យជួយអន្តរាគមន៍តាមចាប់ជនសង្ស័យ ។
សមត្ថកិច្ចនគបាលស្រុកកំពង់រោទិ៍បានរាយការណ៍ មកខាងស្នងការដ្ឋាននគបាលខេត្ត ឱ្យកម្លាំងជួយស្ទាក់ចាប់ជនសង្ស័យនៅចំណុចច្រកទ្វារអន្ដរជាតិ ក្រុងបាវិត ដែលគេប្រុងចេញទៅប្រទេសវៀតណាម ។
ចែករំលែកព័តមាននេះ