រាជធានីភ្នំពេញ ៖ បើទោះបីជា ខណៈពេលនេះកាសែតមានការធ្លាក់ចុះនៅទីផ្សារក៏ដោយ គេសង្កេតឃើញថា បុរសម្នាក់គាត់ពិការជើងទាំងសងខាងម្នាក់ ធ្វើដំណើរតាមម៉ូតូកង់បីកែច្នៃ ដើម្បីបន្តលក់កាសែតចិញ្ចឹមជីវិតរបស់គាត់ ។ លោក…
រាជធានីភ្នំពេញ ៖ បើទោះបីជា ខណៈពេលនេះកាសែតមានការធ្លាក់ចុះនៅទីផ្សារក៏ដោយ គេសង្កេតឃើញថា បុរសម្នាក់គាត់ពិការជើងទាំងសងខាងម្នាក់ ធ្វើដំណើរតាមម៉ូតូកង់បីកែច្នៃ ដើម្បីបន្តលក់កាសែតចិញ្ចឹមជីវិតរបស់គាត់ ។
លោក ងួន សុខឿន ដែលបានពិការជើងទាំងសងខាងតាំងពីអាយុប្រាំឆ្នាំ ដោយសារជំងឺនោះ មានអាយុ៤០ឆ្នាំ ចាប់អាជីពលក់កាសែតជាង១០ឆ្នាំមកហើយ ។ លោកបាននិយាយថា កាលពីក្មេងនៅរៀនលោកចង់ក្លាយខ្លួនជាអ្នកកាសែតខ្លាំងណាស់ ។ តែអ្វីៗមិនបានដូច បំណងនោះទេ សព្វថ្ងៃបានត្រឹមតែជិះម៉ូតូកង់បីកែឆ្នៃលក់កាសែតចល័តតាមទីប្រជុំជននានាក្នុងរាជធានីភ្នំពេញប៉ុណ្ណោះ ពីព្រោះរូបលោករៀនបានត្រឹមថ្នាក់ទីបីប៉ុណ្ណោះ ។
លោក សុខឿននិយាយថា លោកធ្លាប់រកចំណូលបានប្រមាណជា១០ម៉ឺនរៀលក្នុងមួយថ្ងៃ ។ ប៉ុន្តែអ្វីៗបានប្រែប្រួលនៅពេលដែលសម័យនេះ គេសំបូរទូរស័ព្ទដៃ ហើយម្នាក់ៗគេនាំគ្នាមើលព័ត៌មានតាមបណ្តាញសង្គម ។ ដូច្នេះការលក់កាសែតរបស់គាត់ត្រូវបានធ្លាក់ចុះជាខ្លាំង ធ្វើឲ្យប៉ះដល់ជីវភាពគ្រួសារ ។
ជាមួយនឹងការដកដង្ហើមធំ លោក សុខឿន បាននិយាយទៀតថា «បច្ចុប្បន្នក្នុងមួយថ្ងៃខ្ញុំរក ចំណូលពីការលក់កាសែតបានត្រឹមតែពី៤ម៉ឺនទៅ៥ម៉ឺនរៀល រួមផ្សំ និងការលក់ទឹកសាប៊ូលាងចានផង» ។
សព្វថ្ងៃគាត់ និងប្រពន្ធព្រមទាំងកូនប្រុសស្រីបីនាក់ ស្នាក់នៅផ្ទះជួល សង្កាត់ទួលសង្កែ ខណ្ឌ ឫស្សីកែវ ដោយសារតែគ្មានដីស្រែនៅឯស្រុកកំណើត ទើបគាត់ចំណាក ស្រុកមករស់ នៅទី ក្រុងក្រោយពីមានប្រពន្ធ ។ គាត់កែឆ្នៃម៉ូតូកង់បី ហើយចាប់អាជីពជាអ្នកលក់កាសែត ចល័ត បើទោះបីជាគាត់មានចំណេះជាជាងម៉ូតូ និងជាងម៉ាញ៉េក៏ដោយ ។
បើទោះបីជាការលក់កាសែតមានការធ្លាក់ចុះក៏ដោយចុះ លោកសុខ ខឿន មិនបានគិតចង់ ផ្លាស់ប្តូរមុខរបរជាអ្នកលក់កាសែតចល័តនេះឡើយ ។
សម្រាប់លោកលក់កាសែតមិនត្រឹមតែជាមុខរបររកចំណូលចិញ្ចឹមជីវិតនោះទេ លោកគិត ថា លោកក៏បានចូលរួមក្នុងការផ្តល់ព័ត៌មាន និងចំណេះដឹងដល់ប្រជាជនតាមរយ:លក់កាសែតនេះ។ លោកមានបំណងចង់ឃើញប្រជាជនកម្ពុជាបន្តគាំទ្រដល់កាសែត ពីព្រោះកាសែតផ្តល់ព័ត៌ មានដែលត្រឹមត្រូវពិតប្រាកដ និងល្អៗដែលពេលខ្លះមិនមានការផ្សព្វផ្សាយតាមបណ្តាញ សង្គមនៅលើទូរស័ព្ទដៃឡើយ ។
លោកបន្តទៀតថា ការជួញទិញកាសែតក៏អាចជួយបន្តទ្រទ្រង់ដល់អ្នកក្រីក្រដូចជា រូបគាត់ដែលចាប់យកមុខរបរជាអ្នកលក់កាសែតចល័តផងដែរ។ លោកនិយាយថា បើសិនជាកាសែតលក់លែងដាច់វានឹងប៉ះពាល់ដល់ការរស់នៅរបស់គាត់ ហើយគាត់ក៏មិនទាន់បាននឹកគិតថា នឹងបន្តធ្វើមុខរបរអ្វីដែរ។
ជាមួយនឹងការគ្រវីក្បាលបន្តិច នៅពេលសួរថាគាត់ធ្លាប់មាននឹងគិតចង់រកស៊ីអ្វីផ្សេង ឬទេនោះលោក សុខ ខឿន គ្រាន់តែនិយាយថា «ខ្ញុំនឹងលក់កាសែតរហូតដរាបណាកាសែតនៅតែចេញផ្សាយ ខ្ញុំនឹងបោះបង់ តែនៅពេលដែលលែងមានការចេញផ្សាយកាសែតទៀតប៉ុណ្ណោះ »៕
ចែករំលែកព័តមាននេះ